།དེ་བཞིན་དུ་ཡོན་ཏན་ཐམས་ཅད་ཀྱིས་ཡོངས་སུ་སྦྱངས་པའི་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་ནོར་བུ་རིན་པོ་ཆེ་ཆེན་པོ་དབང་གི་རྒྱལ་པོ་ཡང་འཁོར་བའི་གནས་ན་འདུག་བཞིན་དུ། ཆོས་ཀྱི་དབྱིངས་ཀྱི་ནམ་མཁའི་སྤྱོད་ཡུལ་ལས་རྒྱུ་བའི་དེ་བཞིན་གཤེགས་པའི་ཡེ་ཤེས་ཆེན་པོའི་གཉི་ཟླ་དང་སངས་རྒྱས་ཀྱི་ཡུལ་གྱི་དཀྱིལ་འཁོར་ཐམས་ཅད་ཀྱི་གཟུགས་བརྙན་གྱི་རྒྱན་ཡོངས་སུ་སྟོན་ཏོ། །རིགས་ཀྱི་བུ་འདི་ལྟ་སྟེ་དཔེར་ན། ཇི་སྲིད་དུ་གཉི་ཟླའི་དཀྱིལ་འཁོར་འོད་ཀྱིས་སྣང་བར་བྱེད་པ་དེ་སྲིད་དུ་ནོར་དང་། འབྲུ་དང་། རིན་པོ་ཆེའི་རྣམ་པ་དང་། གསེར་དང་དངུལ་དང་། མྱེ་ཏོག་དང་སྤོས་དང་ཕྲེང་བ་དང་། གོས་དང་ལོངས་སྤྱོད་གང་ཇི་སྙེད་པ་དེ་དག་ཐམས་ཅད་ཀྱིས་ནོར་བུ་རིན་པོ་ཆེ་ཆེན་པོ་དབང་གི་རྒྱལ་པོའི་རིན་དུ་མི་ཆོག་གོ །དེ་བཞིན་དུ་ཇི་སྲིད་དུ་དུས་གསུམ་ལ་ཐམས་ཅད་མཁྱེན་པའི་ཡེ་ཤེས་ཆོས་ཀྱི་དབྱིངས་ཀྱི་ཡུལ་སྣང་བར་མཛད་པ་དེ་སྲིད་དུ་ལྷ་དང་མི་དང་། ཉན་ཐོས་དང་རང་སངས་རྒྱས་ཐམས་ཅད་ཀྱི་དགེ་བའི་རྩ་བ་ཟག་པ་ཡོད་པ་འམ། ཟག་པ་མེད་པ་གང་ཇི་སྙེད་པ་དེ་དག་ཐམས་ཅད་ཀྱིས་ཀྱང་བྱང་ཆུབ་ཏུ་སེམས་བསྐྱེད་པའི་ནོར་བུ་རིན་པོ་ཆེ་ཆེན་པོ་དབང་གི་རྒྱལ་པོའི་རིན་དུ་མི་ཆོག་གོ །རིགས་ཀྱི་བུ་འདི་ལྟ་སྟེ་དཔེར་ན། ནོར་བུ་རིན་པོ་ཆེ་ཆེན་པོ་རྒྱ་མཚོའི་རྒྱན་ཀྱི་དམ་པ་ཞེས་བྱ་བ་ཡོད་དེ། དེ་ནི་རྒྱ་མཚོའི་རྒྱན་ཐམས་ཅད་ཡོངས་སུ་སྟོན་ཏོ། །དེ་བཞིན་དུ་བྱང་ཆུབ་ཏུ་སེམས་བསྐྱེད་པའི་ནོར་བུ་རིན་པོ་ཆེ་ཆེན་པོ་རྒྱ་མཚོའི་རྒྱན་གྱི་དམ་པ་ཡང་ཐམས་ཅད་མཁྱེན་པའི་ཡེ་ཤེས་ཀྱི་ཡུལ་རྒྱ་མཚོའི་རྒྱན་ཐམས་ཅད་ཡོངས་སུ་སྟོན་ཏོ། །རིགས་ཀྱི་བུ་འདི་ལྟ་སྟེ་དཔེར་ན། ནོར་བུ་རིན་པོ་ཆེ་ཆེན་པོ་ཡིད་བཞིན་གྱི་རྒྱལ་པོ་མ་གཏོགས་པར་ལྷ་རྫས་ཀྱི་འཛམ་བུ་ཆུ་ཀླུང་གི་གསེར་ལས་ལྷག་པར་འཕགས་པ་གང་ཡང་མེད་དོ། །དེ་བཞིན་དུ་ཐམས་ཅད་མཁྱེན་པའི་ཡེ་ཤེས་ནོར་བུ་རིན་པོ་ཆེ་ཆེན་པོ་ཡིད་བཞིན་གྱི་རྒྱལ་པོ་མ་གཏོགས་པར་བྱང་ཆུབ་ཏུ་སེམས་བསྐྱེད་པའི་ལྷ་རྫས་ཀྱི་འཛམ་བུ་ཆུ་ཀླུང་གི་གསེར་ལས་ལྷག་པར་ཁྱད་པར་དུ་འཕགས་པ་གང་ཡང་མེད་དོ། །རིགས་ཀྱི་བུ་འདི་ལྟ་སྟེ་དཔེར་ན། ཀླུའི་ཚོགས་གྲུབ་པར་གྱུར་པའི་སྦྲུལ་འདུལ་བ་ནི་ཀླུ་དང་སྦྲུལ་ཐམས་ཅད་ལ་དབང་བསྒྱུར་རོ།