།དེ་བཞིན་དུ་བྱང་ཆུབ་ཏུ་སེམས་བསྐྱེད་པ་འགྲོ་བ་ཐམས་ཅད་ཀྱི་རྒྱན་གྱི་དམ་པའི་ནོར་བུ་རིན་པོ་ཆེ་ཆེན་པོ་ཡང་སེམས་ཅན་ཐམས་ཅད་ཀྱི་བསམ་པ་དང་བྱང་ཆུབ་སེམས་དཔའི་སྨོན་ལམ་ཡོངས་སུ་རྫོགས་པར་བྱ་བས་ནམ་ཡང་བྱང་བར་མི་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན། རྒྱལ་པོ་འཁོར་ལོས་སྒྱུར་བའི་ནོར་བུ་རིན་པོ་ཆེ་ཆེན་པོ་ནི་མུན་པ་ཐམས་ཅད་ཡོངས་སུ་སེལ་ཅིང་འགྲོ་སྟེ། ཁྱིམ་གྱི་ནང་ན་གནས་ན་ཡང་རབ་ཏུ་སྣང་བར་བྱེད་དོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་འཁོར་ལོས་སྒྱུར་བའི་ནོར་བུ་རིན་པོ་ཆེ་ཡང་མ་རིག་པའི་མུན་པ་ཐམས་ཅད་སེལ་ཅིང་འགྲོ་བའི་རྒྱུད་ཐམས་ཅད་དུ་འགྲོ་སྟེ། འདོད་པའི་ཁམས་ན་གནས་ན་ཡང་ཡེ་ཤེས་ཀྱི་སྣང་བ་ཆེན་པོར་རབ་ཏུ་འགྱེད་དོ། །རིགས་ཀྱི་བུ་འདི་ལྟ་སྟེ་དཔེར་ན། གང་ཅི་ཡང་རུང་སྟེ་ནོར་བུ་རིན་པོ་ཆེ་ཆེན་པོ་ཨིན་དྲ་ནཱི་ལའི་འོད་ཀྱིས་ཕོག་པ་དེ་དག་ཐམས་ཅད་ནི་ནོར་བུ་རིན་པོ་ཆེ་ཆེན་པོ་ཨིནྡྲ་ནཱི་ལའི་ཁ་དོག་ཏུ་འགྱུར་རོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་ནོར་བུ་རིན་པོ་ཆེ་ཆེན་པོ་ཨིན་དྲ་ནཱི་ལ་ཡང་ཆོས་གང་དང་གང་ལ་རྣམ་པར་སྤྱད་པ་དང་། ཡོངས་སུ་བཏང་བ་དང་། དགེ་བའི་རྩ་བ་གང་ཅི་ཡང་རུང་སྟེ། ཐམས་ཅད་མཁྱེན་པ་ཉིད་དུ་སེམས་བསྐྱེད་པས་ཡོངས་སུ་བསྔོས་པ་དེ་དག་ཐམས་ཅད་ཀྱང་ཐམས་ཅད་མཁྱེན་པ་ཉིད་ཀྱི་ནོར་བུ་རིན་པོ་ཆེ་ཆེན་པོའི་ཁ་དོག་ཏུ་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན། ནོར་བུ་རིན་པོ་ཆེ་བཻཌཱུརྱ་ནི་ལོ་བརྒྱ་ཕྲག་སྟོང་དུ་མི་གཙང་བའི་ནད་ཞིག་ན་འདུག་ཀྱང་དྲི་མི་ཞིམ་པ་ཐམས་ཅད་དང་ལྷན་ཅིག་མི་གནས་ཏེ། དེའི་རང་བཞིན་འོད་གསལ་བ་ནི་དེ་བཞིན་དུ་གསལ་ཞིང་ཤིན་ཏུ་དྲི་མ་མེད་དོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་ནོར་བུ་རིན་པོ་ཆེ་བཻཌཱུརྱ་ཡང་བསྐལ་པ་བརྒྱ་ཕྲག་སྟོང་ཞིག་ཏུ་འདོད་པའི་ཁམས་ཐམས་ཅད་དུ་གནས་ཀྱང་འདོད་པའི་ཁམས་ཀྱི་སྐྱོན་ཐམས་ཅད་ཀྱིས་ཀུན་ནས་ཉོན་མོངས་པར་མི་འགྱུར་ཏེ། ཆོས་ཀྱི་དབྱིངས་ཀྱི་རང་བཞིན་འོད་གསལ་བ་ནི་དེ་བཞིན་དུ་ཤིན་ཏུ་དག་པར་གནས་སོ། །རིགས་ཀྱི་བུ་འདི་ལྟ་སྟེ་དཔེར་ན། ནོར་བུ་རིན་པོ་ཆེ་ཆེན་པོ་དྲི་མ་མེད་པས་རྣམ་པར་དག་པའི་འོད་ཅེས་བྱ་བ་ནི་རིན་པོ་ཆེའི་འབྱུང་གནས་ཐམས་ཅད་ཟིལ་གྱིས་གནོན་ཏོ།