།དེ་བཞིན་དུ་བྱང་ཆུབ་སེམས་དཔའ་བྱང་ཆུབ་ཀྱི་སེམས་ཀྱི་རྩི་འཆང་བའི་ཡོན་ཏན་གྱི་དྲི་ཙམ་གྱིས་ཀྱང་ཉོན་མོངས་པའི་སྦྲུལ་ཐམས་ཅད་འབྱེར་བར་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན། སྐྱེས་བུ་གཞན་གྱིས་མི་ཐུབ་པའི་རྩི་འཆང་བ་ནི་དགྲ་ཡི་དཀྱིལ་འཁོར་ཐམས་ཅད་ཀྱིས་མི་ཚུགས་སོ། །དེ་བཞིན་དུ་བྱང་ཆུབ་སེམས་དཔའ་ཐམས་ཅད་མཁྱེན་པ་ཉིད་ཀྱི་སེམས་གཞན་གྱིས་མི་ཐུབ་པའི་རྩི་འཆང་བ་ཡང་བདུད་དང་ཕྱིར་རྒོལ་བའི་དཀྱིལ་འཁོར་ཐམས་ཅད་ཀྱིས་ཐུབ་པར་དཀའོ། །རིགས་ཀྱི་བུ་འདི་ལྟ་སྟེ་དཔེར་ན། རྣམ་པར་སེལ་བ་ཞེས་བྱ་བའི་རྩི་ཡོད་དེ། དེ་བཅངས་ན་ཟུག་རྔུ་ཐམས་ཅད་འབྱིན་པར་འགྱུར་རོ། །དེ་བཞིན་དུ་བྱང་ཆུབ་སེམས་དཔའ་བྱང་ཆུབ་ཀྱི་སེམས་རྣམ་པར་སེལ་བ་འཆང་བ་ནི་འདོད་ཆགས་དང་ཞེ་སྡང་དང་གཏི་མུག་གི་ཟུག་རྔུ་ཐམས་ཅད་མི་འབྱུང་ངོ་། །རིགས་ཀྱི་བུ་འདི་ལྟ་སྟེ་དཔེར་ན། རྩིའི་རྒྱལ་པོ་ཆེན་པོ་བལྟ་ན་སྡུག་པ་ཞེས་བྱ་བ་ཡོད་དེ། དེ་བཅངས་ན་ནད་ཐམས་ཅད་སེལ་བར་འགྱུར་རོ། །དེ་བཞིན་དུ་བྱང་ཆུབ་སེམས་དཔའ་བྱང་ཆུབ་ཀྱི་སེམས་རྩིའི་རྒྱལ་པོ་ཆེན་པོ་བལྟ་ན་སྡུག་པ་འཆད་པ་ཡང་ཉོན་མོངས་པ་དང་མི་ཤེས་པའི་ནད་ཐམས་ཅད་རབ་ཏུ་སེལ་བར་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན། རྩིའི་ཤིང་ཆེན་པོ་སྦྱོར་བ་ཞེས་བྱ་བ་ཡོད་དེ། དེའི་ཤུན་པས་རྨ་ལ་རེག་མ་ཐག་ཏུ་ཐམས་ཅད་འཚོ་བར་འགྱུར་རོ། གང་ནས་བཤུས་པ་དེའི་ཤུན་ཕྲགས་ཀྱང་ཕྱིར་སྐྱེའོ། །དེ་བཞིན་དུ་བྱང་ཆུབ་ཀྱི་སེམས་ཀྱི་ས་བོན་ལས་སྐྱེས་པའི་ཤིང་ཐམས་ཅད་མཁྱེན་པ་ཉིད་དུ་སྦྱོར་བ་ཡང་མཐོང་མ་ཐག་ཏུ་རིགས་ཀྱི་བུ་དད་པ་རྣམས་ཀྱི་ལས་དང་ཉོན་མོངས་པའི་རྨ་ཡོངས་སུ་འཚོ་བར་འགྱུར་རོ། །ཐམས་ཅད་མཁྱེན་པ་ཉིད་ཀྱི་ཤིང་དེ་ལ་ཡང་འཇིག་རྟེན་ཐམས་ཅད་ཀྱིས་རྨད་བྱུང་བའམ་ཉམས་པར་མི་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན། རྩི་ཆེན་པོའི་རྣམ་པ་རྩ་བ་མ་གྲུབ་པ་ཞེས་བྱ་བ་ཡོད་དེ། དེའི་མཐུས་འཛམ་བུའི་གླིང་གི་ཤིང་ཐམས་ཅད་ཀྱང་ཡན་ལག་ཐམས་ཅད་དུ་རྣམ་པར་འཕེལ་ལོ། །དེ་བཞིན་དུ་བྱང་ཆུབ་ཀྱི་སེམས་རྩ་བ་མ་གྲུབ་པའི་རྩི་ཆེན་པོའི་མཐུས་ཀྱང་། སློབ་པ་དང་མི་སློབ་པ་དང་རང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་དགེ་བའི་རྩ་བའི་ཆོས་ཀྱི་ཤིང་རྣམས་རྣམ་པར་འཕེལ་ལོ།