།གནོད་པ་ཐམས་ཅད་སེལ་བས་ནོར་བུ་ལྟ་བུའོ། །བྱང་ཆུབ་སེམས་དཔའི་སྤྱོད་པ་ཐམས་ཅད་ཀྱིས་འབྱུང་བའི་ལམ་མངོན་པར་ཤེས་པར་བྱེད་པས་གཙུག་ལག་ལྟ་བུའོ། །བསོད་ནམས་མི་ཟད་པས་གཏེར་ལྟ་བུའོ། །ཡེ་ཤེས་མི་ཟད་པས་ཆུ་མིག་ལྟ་བུའོ། །ཆོས་ཐམས་ཅད་ཀྱི་གདོང་གི་གཟུགས་བརྙན་སྟོན་པས་མེ་ལོང་གི་དཀྱིལ་འཁོར་ལྟ་བུའོ། །འགོ་བ་མེད་པས་མེ་ཏོག་པུན་ད་རི་ཀ་ལྟ་བུའོ། །ཕ་རོལ་ཏུ་ཕྱིན་པ་དང་བསྡུ་བའི་དངོས་པོ་རྒྱུན་ཏུ་འབབ་པས་ཆུ་ཀླུང་ཆེན་པོ་ལྟ་བུའོ། །ཆོས་ཀྱི་སྤྲིན་གྱི་ཆར་མངོན་པར་འབེབ་པས་ཀླུའི་རྒྱལ་པོ་ཆེན་པོ་ལྟ་བུའོ། །བྱང་ཆུབ་སེམས་དཔའ་ཐམས་ཅད་ཀྱི་སྙིང་རྗེ་ཆེན་པོ་ཡོངས་སུ་འཛིན་པས་འཚོ་བའི་དབང་པོ་ལྟ་བུའོ། །འཆི་བ་མེད་པའི་དབྱིངས་སུ་ཕྱིན་པར་བྱེད་པས་བདུད་རྩི་ལྟ་བུའོ། །འདུལ་བའི་སེམས་ཅན་ཐམས་ཅད་ཡོངས་སུ་སྡུད་ཅིང་འདྲེན་པས་ཀུན་ནས་འཁོར་བའི་སྙིང་ལྟ་བུའོ། །འཁོར་བའི་ཆུ་ལ་རྒྱུ་བ་མངོན་པར་འདོན་པས་མཆིལ་པ་ལྟ་བུའོ། །ཡོན་ཏན་ཐམས་ཅད་ཀྱི་དྲི་ཞིམ་པོ་འཛིན་པས་སྤོས་ཀྱི་སྣོད་ལྟ་བུའོ། །ཤིན་ཏུ་ནད་མེད་པར་བྱེད་པས་དུག་སྨན་ལྟ་བུའོ། །འདོད་པས་དགའ་བའི་དུག་མེད་པར་བྱེད་པས་དུག་གི་གཉེན་པོ་ལྟ་བུའོ། །ཚུལ་བཞིན་མ་ཡིན་པའི་དུག་ཐམས་ཅད་འབྱང་བར་བྱེད་པས་སྔགས་དང་གཟུངས་ལྟ་བུའོ། །སྒྲིབ་པ་དང་བར་ཆད་ཀྱི་རྩྭ་ཐམས་ཅད་རྣམ་པར་འཐོར་བས་རླུང་གི་དཀྱིལ་འཁོར་ལྟ་བུའོ། །བྱང་ཆུབ་ཀྱི་ཕྱོགས་ཀྱི་ཆོས་རིན་པོ་ཆེ་ཐམས་ཅད་ཀྱི་འབྱུང་གནས་སུ་གྱུར་པས་རིན་པོ་ཆེའི་གླིང་ལྟ་བུའོ། །ཆོས་དཀར་པོ་ཐམས་ཅད་འབྱུང་བས་རིགས་ལྟ་བུའོ། །ཡོན་ཏན་གྱི་ཆོས་ཐམས་ཅད་སྐྱེ་བའི་སྒོར་གྱུར་པས་འབྱུང་གནས་ལྟ་བུའོ། །བྱང་ཆུབ་སེམས་དཔའི་ཚོང་པ་ཐམས་ཅད་ཀྱིས་སྤྱོད་པས་ཚོང་དུས་ལྟ་བུའོ། །ལས་དང་ཉོན་མོངས་པའི་སྒྲིབ་པ་དང་དྲི་མ་ཐམས་ཅད་ཡོངས་སུ་སྦྱོང་བས་ཆུའི་ཁམས་ལྟ་བུའོ། །ཐམས་ཅད་མཁྱེན་པ་ཉིད་ཀྱི་ཚོགས་ཡོངས་སུ་རྫོགས་པར་བྱེད་པས་སྦྲང་རྩིའི་གནས་ལྟ་བུའོ། །