གང་དེ་དག་འཕགས་པའི་བདེན་པ་བཞི་རྣམ་པར་ལྟ་བ་ལ་རྣམ་པར་སྤྱོད་ཀྱང་འབྲས་བུ་མངོན་དུ་བྱ་བའི་ཕྱིར་རྣམ་པར་མི་སྤྱོད་པ་དང་གང་དེ་དག་རྟེན་ཅིང་འབྲེལ་པར་འབྱུང་བ་ཟབ་མོ་བརྟགས་པ་ལ་རྣམ་པར་སྤྱོད་ཀྱང་ཤིན་ཏུ་འགོག་པར་ལྟུང་བར་རྣམ་པར་མི་སྤྱོད་པ་དང་། གང་དེ་དག་འཕགས་པའི་ལམ་གྱི་ཡན་ལག་བརྒྱད་བསྒོམ་པ་ལ་རྣམ་པར་སྤྱོད་ཀྱང་ཤིན་ཏུ་འབྱུང་བ་ལ་རྣམ་པར་མི་སྤྱོད་པ་དང་། གང་དེ་དག་སོ་སོའི་སྐྱེ་བོའི་ས་ལས་ཤིན་ཏུ་འདས་པར་རྣམ་པར་སྤྱོད་ཀྱང་ཉན་ཐོས་དང་། རང་སངས་རྒྱས་ཀྱི་སར་ལྟུང་བ་ལ་རྣམ་པར་མི་སྤྱོད་པ་དང་། གང་དེ་དག་ཉེ་བར་ལེན་པའི་ཕུང་པོ་ལྔ་ཡོངས་སུ་ཤེས་པ་ལ་རྣམ་པར་སྤྱོད་ཀྱང་ཕུང་པོ་ཤིན་ཏུ་འགོག་པར་ལྟུང་བ་ལ་རྣམ་པར་མི་སྤྱོད་པ་དང་། གང་དེ་དག་བདུད་ཀྱི་ལས་བཞི་ལས་ཤིན་ཏུ་འདས་པར་རྣམ་པར་སྤྱོད་ཀྱང་བདུད་དུ་རྟོག་པ་ལ་རྣམ་པར་མི་སྤྱོད་པ་དང་། གང་དེ་དག་སྐྱེ་མཆེད་དྲུག་ལས་ཤིན་ཏུ་འདས་པར་རྣམ་པར་སྤྱོད་ཀྱང་ཤིན་ཏུ་མངོན་པར་འགྲུབ་པ་ལ་རྣམ་པར་མི་སྤྱོད་པ་དང་། གང་དེ་དག་དེ་བཞིན་ཉིད་ལ་རྣམ་པར་སྤྱོད་ཀྱང་ཡང་དག་པའི་མཐར་ལྟུང་བ་ལ་རྣམ་པར་མི་སྤྱོད་པ་དང་། གང་དེ་དག་ཐེག་པ་ཐམས་ཅད་ཀྱིས་འབྱུང་བ་ཡོངས་སུ་སྟོན་པ་ལ་རྣམ་པར་སྤྱོད་ཀྱང་ཐེག་པ་ཆེན་པོ་ལས་ཉམས་པ་ལ་རྣམ་པར་མི་སྤྱོད་པ་དེ་དག་དེ་ལྟ་བུར་ཡོན་ཏན་གྱི་གནས་ཐམས་ཅད་ལ་རྣམ་པར་སྤྱོད་པ་རྣམས་ཀྱི་གནས་སོ། །དེ་ནས་ཚོང་དཔོན་གྱི་བུ་ནོར་བཟངས་ཀྱིས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །འདི་ལ་ཐུགས་རྗེ་ཆེན་པོ་བརྙེས་པས་རྣམ་དག་པ། །བྱམས་པ་བཤེས་གཉེན་དཔལ་ཆེན་འཇིག་རྟེན་ཕན་བརྩོན་པ། །དབང་བསྐུར་ས་གནས་རྒྱལ་བའི་སྲས་ཀྱི་ཐུ་བོ་སྟེ། །སངས་རྒྱས་ཡུལ་ལ་རྗེས་སུ་དགོངས་ཤིང་རྣམ་པར་སྤྱོད། །རྒྱལ་བའི་སྲས་པོ་གྲགས་པ་ཆེན་པོ་མངའ་བ་རྣམས། །ཡེ་ཤེས་ཆེན་པོའི་སྤྱོད་ཡུལ་རྣམ་ཐར་བཞུགས་པ་དག །གང་རྣམས་ཆོས་དབྱིངས་ཀུན་ཏུ་ཐོགས་མེད་རྣམ་རྒྱུ་བ། །དཔེ་ཟླ་མེད་པ་དེ་དག་གནས་ནི་འདི་འདྲ་ཡིན། །དུས་སྦྱིན་ཚུལ་ཁྲིམས་བཟོད་པ་བརྩོན་འགྲུས་སྟོབས་ཀྱིས་འཕགས། །བསམ་གཏན་མངོན་ཤེས་སྟོབས་ཀྱི་མཐར་ཕྱིན་ཤེས་རྟོགས་པས། །ཤེས་རབ་ཐབས་དང་སྨོན་ལམ་སྟོབས་ལ་གནས་པ་རྣམས། །