དེ་ལྟར་ཚོང་དཔོན་གྱི་བུ་ནོར་བཟངས་རིམ་གྲོ་དང་། ཕུ་དུད་དང་། མཆོད་པ་དང་། བསྟོད་པ་དང་། ཕྱག་བྱ་བ་དང་། བལྟ་བའི་བྱིན་གྱི་རླབས་དང་། སྨོན་ལམ་དང་། འདུ་ཤེས་ཀྱི་རྗེས་སུ་སོང་བ་དེ་ལྟ་བུའི་ཡིད་དང་ལྡན་པ་དང་། ཡེ་ཤེས་ཀྱི་སྤྱོད་ཡུལ་ཚད་མེད་པའི་ས་དེ་ལྟ་བུ་ལ་ཞུགས་པའི་ཡེ་ཤེས་ཀྱི་མིག་གིས་ཁང་པ་བརྩེགས་པ་ཆེན་པོ་རྣམ་པར་སྣང་མཛད་ཀྱི་རྒྱན་གྱིས་བརྒྱན་པའི་སྙིང་པོའི་སྒོ་ནས་ལུས་ཐམས་ཅད་ཀྱིས་ཕབ་སྟེ། ཕྱག་བྱས་སོ། །དེས་རྣམ་པ་དེ་ལྟ་བུའི་མངོན་པར་བསྒྲུབ་པའི་ཚུལ་ཡུད་ཙམ་ཏུ་རྣམ་པར་དཔྱད་དེ་མོས་པ་དང་དད་པ་ལས་བྱུང་བའི་ལྷག་པའི་བསམ་པ་དང་། སྨོན་ལམ་གྱིས་མངོན་པར་བསྒྲུབས་པའི་མཐུས་དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་དུ་བདག་ཉིད་རྒྱུན་མི་འཆད་པར་བྱིན་གྱིས་བརླབས་སོ། །དེ་བཞིན་དུ་བྱང་ཆུབ་སེམས་དཔའ་ཐམས་ཅད་དང་མངོན་སུམ་དུ་གནས་པ་དང་། དགེ་བའི་བཤེས་གཉེན་གྱི་གནས་ཐམས་ཅད་དང་། དེ་བཞིན་གཤེགས་པའི་མཆོད་རྟེན་ཐམས་ཅད་དང་། དེ་བཞིན་གཤེགས་པའི་སྐུ་གཟུགས་ཐམས་ཅད་དང་། སངས་རྒྱས་དང་བྱང་ཆུབ་སེམས་དཔའི་ཕོ་བྲང་ཐམས་ཅད་དང་། ཆོས་རིན་པོ་ཆེའི་གནས་ཐམས་ཅད་དང་། ཉན་ཐོས་དང་རང་སངས་རྒྱས་ཐམས་ཅད་ཀྱི་གནས་དང་། མཆོད་རྟེན་ཐམས་ཅད་དང་། མངོན་སུམ་དུ་གནས་པ་ནས། འཕགས་པའི་ཚོགས་དང་སྦྱིན་པའི་གནས་དང་། བླ་མ་དང་ཕ་མ་ཐམས་ཅད་ཀྱི་བར་གྱི་འགྲོ་བའི་ཚོགས་ཐམས་ཅད་དང་། མངོན་སུམ་དུ་གནས་པ་རྒྱུན་མི་འཆད་པར་ཡེ་ཤེས་ཀྱི་ལུས་ཐ་མི་དད་པའི་ཚུལ་ལ་འཇུག་པ་ཐམས་ཅད་ཀྱི་རྗེས་སུ་སོང་བ་དང་། འདུ་ཤེས་ཀྱི་བྱིན་གྱི་རླབས་དང་། ཡེ་ཤེས་ཡིད་ལ་བྱ་བས་བྱིན་གྱིས་བརླབས་སོ། །ཁང་པ་བརྩེགས་པ་ཆེན་པོ་རྣམ་པར་སྣང་མཛད་ཀྱི་རྒྱན་གྱིས་བརྒྱན་པའི་སྙིང་པོའི་སྒོ་ནས་ཇི་ལྟ་བ་དེ་བཞིན་དུ་གོང་དུ་བརྗོད་པའི་དམིགས་པ་ཐམས་ཅད་ལ་ཡང་། ཆོས་ཀྱི་དབྱིངས་ཐམས་ཅད་རྒྱས་པར་འགེངས་པའི་འདུད་ཅིང་ཕྱག་བྱ་བར་བྱིན་གྱིས་བརླབས་སོ། །དེ་བཞིན་དུ་ཕྱི་མའི་མཐའི་མུར་ཐུག་པར་རྒྱུན་འཆད་པ་མེད་པར་བྱིན་གྱིས་བརླབས་ཏེ། ནམ་མཁའི་དབྱིངས་ཚད་མེད་པ་དང་མཉམ་པ་ཉིད་དང་།