དེ་དག་ལ་སྩོགས་པའི་དགེ་སློང་དྲུག་ཅུ་ཙམ་ཀུན་ཀྱང་། སྔོན་གྱི་རྒྱལ་བ་ལ་བྱ་བ་བྱས་པ། དགེ་བའི་རྩ་བ་བསྐྱེད་པ། མོས་པ་ཟབ་མོར་གྱུར་པ། དད་པའི་མྱིག་ཡོངས་སུ་དག་པ། སེམས་རྒྱ་ཆེན་པོས་ཡོངས་སུ་སྤྱོད་པ། སངས་རྒྱས་ཀྱི་ཕྱོགས་རྣམ་པར་བལྟ་བ་ལ་མཐུ་ཡོད་པ། ཆོས་ཀྱི་ངོ་བོ་ཉིད་དང་། རང་བཞིན་ངེས་པར་རྟོགས་པའི་སེམས་དང་ལྡན་པ། གཞན་ལ་ཕན་པར་གྱུར་པའི་བློ་ཅན། དེ་བཞིན་གཤེགས་པའི་ཡོན་ཏན་ལ་མངོན་པར་མོས་པ། འཇམ་དཔལ་གཞོན་ནུར་གྱུར་པས་ཆོས་བསྟན་པས་འདུལ་བ་ཤ་སྟག་དང་འགྲོགས་ཤིང་མདུན་དུ་བྱས་ཏེ་སྔོན་དུ་བདར་ནས། འཇམ་དཔལ་གཞོན་ནུར་གྱུར་པ་གང་ན་བ་དེར་དོང་ངོ་། །དེ་ནས་ཚེ་དང་ལྡན་པ་ཤ་ར་དྭ་ཏིའི་བུས་དེ་ལྟར་ལམ་དུ་ཞུགས་ཏེ། འདོང་བའི་ཚེ་དགེ་སློང་དེ་དག་ཀུན་ལ་བལྟས་ནས། དགེ་སློང་རྒྱ་མཚོའི་བློ་ལ་སྨྲས་པ། རྒྱ་མཚོའི་བློ་བྱང་ཆུབ་སེམས་དཔའ་འཇམ་དཔལ་གྱི་ལུས་མཚན་དང་དཔེ་བྱད་བཟང་པོས་རྣམ་པར་བརྒྱན་ཅིང་། ཡོངས་སུ་དག་པ། ལྷ་དང་མིར་བཅས་པ་བསམ་གྱིས་མྱི་ཁྱབ་པ་དང་། འོད་ཀྱི་དཀྱིལ་འཁོར་ཡོངས་སུ་དག་ཅིང་སེམས་ཅན་ཚད་མྱེད་པའི་དགའ་བ་ཡོངས་སུ་སྐྱེད་པ་དང་། འོད་ཟེར་གྱི་དྲ་བའི་རྒྱན་སེམས་ཅན་དཔག་ཏུ་མྱེད་པའི་སྡུག་བསྔལ་རབ་ཏུ་ཞི་བར་བྱེད་པ་དང་། འཁོར་ཕུན་སུམ་ཚོགས་པ་སྔོན་གྱི་དགེ་བའི་རྩ་བས་ཡོངས་སུ་བཟུང་བ་དང་། ལམ་གྱི་རྒྱན་འགྲོ་ན་ལམ་མྱིག་མངས་རིས་སུ་གནས་པ་དང་ལམ་རྣམ་པར་གནོན་པའི་རྒྱན་ཕྱོགས་ཀྱི་དཀྱིལ་འཁོར་ཐམས་ཅད་ལ་མངོན་པར་ལྟ་བར་གནས་པ་དང་། བསོད་ནམས་ཕུན་སུམ་ཚོགས་པའི་རྒྱན་གཡས་གཡོན་ནས་གཏེར་ཆེན་པོ་མངོན་པར་འཐོན་པ་དང་སྔོན་གྱི་སངས་རྒྱས་ལ་རིམ་གྲོ་བྱས་པའི་དགེ་བའི་རྩ་བ་དང་རྒྱུ་མཐུན་པས། ཤིང་གི་གསེབ་ཐམས་ཅད་ནས་རྒྱན་མང་པོ་འབྱུང་བ་དང་། འཇིག་རྟེན་གྱི་དབང་པོ་ཐམས་ཅད་ལ་མཆོད་པའི་སྤྲིན་གྱི་ཆར་མངོན་པར་འབེབས་ཤིང་བཏུད་དེ་ཕྱག་འཚལ་བ་དང་། ཕྱོགས་བཅུ་ནས་དེ་བཞིན་གཤེགས་པ་ཐམས་ཅད་ཀྱིས་འོད་ཟེར་གྱི་དྲ་བའི་དཀྱིལ་འཁོར་མང་པོ་བཀྱེ་བ།