ལ་ལ་ནི་མིའི་གནས་སུ་ཕྱིན་པར་སྣང་ངོ་། །ལ་ལ་ནི་གཤིན་རྗེའི་གནས་སུ་ཕྱིན་པར་སྣང་ངོ་། །ལ་ལ་ནི་ཡི་དགས་ཀྱི་གནས་ཐམས་ཅད་དུ་ཕྱིན་པར་སྣང་ངོ་། །ལ་ལ་ནི་སེམས་ཅན་དམྱལ་བའི་འཇིག་རྟེན་ཐམས་ཅད་དུ་ཕྱིན་པར་སྣང་ངོ་། །ལ་ལ་ནི་ཡི་དགས་ཀྱི་སྐྱེ་གནས་ཀྱི་རྒྱུད་ཐམས་ཅད་དུ་ཕྱིན་པར་སྣང་སྟེ། མཐོང་བས་འདུལ་བའི་སེམས་ཅན་དང་། ཐོས་པས་འདུལ་བ་དང་རྗེས་སུ་དྲན་པས་འདུལ་བ་དང་། དབྱངས་ཀྱི་དཀྱིལ་འཁོར་གྱིས་འདུལ་བ་དང་། མྱིང་གི་ཆུ་ཀླུང་གི་སྒྲས་འདུལ་བ་དང་། འོད་ཀྱི་དཀྱིལ་འཁོར་གྱིས་འདུལ་བ་དང་། འོད་ཟེར་གྱི་དྲ་བ་རབ་ཏུ་དགྱེ་བས་འདུལ་བ་དང་། སེམས་ཅན་རྣམས་ཀྱི་བསམ་པའི་ཚུལ་ཇི་ལྟ་བ་བཞིན་དུ་ཡོངས་སུ་སྨིན་པར་བྱ་བ་དང་། གདུལ་བའི་ཕྱིར་སྙིང་རྗེ་ཆེན་པོ་ཐ་མྱི་དད་པ་དང་སྨོན་ལམ་ཐ་མི་དད་པ་དང་ཡེ་ཤེས་ཐ་མྱི་དད་པ་དང་། སེམས་ཅན་ཡོངས་སུ་བསྡུ་བ་ཐ་མྱི་དད་པའི་ཚུལ་དུ་བྱང་ཆུབ་སེམས་དཔའ་དེ་དག་ཛེ་ཏའི་ཚལ་ནས་རྣམ་པར་འཕྲུལ་པའི་རྒྱན་རྣམ་པ་སྣ་ཚོགས་ཀྱིས་འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་དང་། སེམས་ཅན་གྱི་ཁམས་འབྱམ་ཀླས་པ་ཐམས་ཅད་དུ་རྒྱས་པར་འགེངས་པར་བྱེད་པར་སྣང་ཡང་དེ་བཞིན་གཤེགས་པའི་ཞབས་ཀྱི་དྲུང་ནས་མྱི་གཡོ་སྟེ། ལ་ལ་ནི་རང་གི་གནས་དང་ཁང་པ་བརྩེགས་པ་དང་། སྟན་དང་འཁོར་དང་བཅས་པས། ཕྱོགས་བཅུ་རྒྱས་པར་བྱེད་པར་སྣང་ཡང་། དེ་བཞིན་གཤེགས་པའི་ཞབས་ཀྱི་དྲུང་ནས་མྱི་གཡོའོ། །ལ་ལ་ནི་སྤྲུལ་པའི་སྤྲིན་རབ་ཏུ་འགྱེད་པར་སྣང་ངོ་། །ལ་ལ་ནི་སེམས་ཅན་ཡོངས་སུ་སྨིན་པར་བྱ་བའི་དོན་དུ་གཅིག་པུ་གཉིས་སུ་མྱེད་པར་འགྲོ་བར་སྣང་ཡང་། དེ་བཞིན་གཤེགས་པའི་འཁོར་གྱི་དཀྱིལ་འཁོར་ནས་མྱི་གཡོའོ། །ལ་ལ་ནི་དགེ་སྦྱོང་གི་གཟུགས། ལ་ལ་ནི་ཚངས་པའི་གཟུགས། །ལ་ལ་ནི་བརྟུལ་ཞུགས་ཅན་ཐམས་ཅད་ཀྱི་ཆ་བྱད་དང་། ཆོ་ག་དང་ཆུ་ཞེང་གི་གཟུགས། ལ་ལ་ནི་སྨན་པའི་གཟུགས། ལ་ལ་ནི་ཚོང་པའི་གཟུགས། ལ་ལ་ནི་སྙན་པས་འཚོ་བའི་གཟུགས། ལ་ལ་ནི་གར་མཁན་གྱི་གཟུགས།