།རིགས་ཀྱི་བུ་དེ་ལྟར་ཁོ་མོའི་ལུས་སུ་བྱང་ཆུབ་སེམས་དཔའི་མངལ་གྱི་གནས་དང་། ཁང་ཁྱིམ་དང་རྒྱན་དང་ལོངས་སྤྱོད་བྱུང་བར་གྱུར་པ་དང་། དེའི་མོད་ལ་བྱང་ཆུབ་སེམས་དཔའ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་བྱང་ཆུབ་སེམས་དཔའ་སྨོན་ལམ་གཅིག་པ་སྐལ་བ་མཉམ་པར་སྤྱོད་སྤྱོད་པ། དགེ་བའི་རྩ་བ་གཅིག་པ་རྒྱན་གཅིག་པ། རྣམ་པར་ཐར་པ་གཅིག་ལ་རྣམ་པར་སྤྱོད་པ། ཡེ་ཤེས་ཀྱིས་གཅིག་ལ་གནས་པ། རྣམ་པར་འཕྲུལ་པ་གཅིག་གིས་བྱུང་བ། སྨོན་ལམ་གཅིག་གིས་གྲུབ་པ། སྤྱོད་པ་གཅིག་གིས་བྱུང་བ། ཆོས་ཀྱི་ལུས་ཡོངས་སུ་དག་པ། གཟུགས་ཀྱི་ལུས་མཐའ་དང་དབུས་མེད་པའི་བྱིན་གྱི་རླབས་དང་ལྡན་པ། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་། སྨོན་ལམ་དང་རྣམ་པར་འཕྲུལ་པས་བྱུང་བ་དག་དང་། རིན་པོ་ཆེའི་ཀླུའི་དབང་པོའི་སྙིང་པོའི་ཁང་པ་བརྩེགས་པ་ན་འཁོད་ཅིང་། ཀླུའི་རྒྱལ་པོ་གང་ཆེན་མཚོ་ལ་སྩོགས་པ་ཀླུའི་དབང་པོ་སྟོང་ཕྲག་བརྒྱད་ཅུ་དང་། འཇིག་རྟེན་གྱི་དབང་པོ་ཐམས་ཅད་ཀྱིས་ཀྱང་མངོན་པར་མཆོད་ཅིང་། བྱང་ཆུབ་སེམས་དཔའི་རྣམ་པར་འཕྲུལ་བ་དགའ་ལྡན་གྱི་ཕོ་བྲང་ཐམས་ཅད་ནས་ཤི་འཕོ་ཡོངས་སུ་སྟོན་པས། དགའ་ལྡན་གྱི་གནས་རེ་རེ་ནས་ཀྱང་འཇིག་རྟེན་གྱི་ཁམས་ཐམས་ཅད་དུ་འདལ་བའི་གླིང་བཞི་པར་སྐྱེ་བ་ལེན་པ་ཡོངས་སུ་སྟོན་པ། སེམས་ཅན་ཡོངས་སུ་སྨིན་པར་བྱ་བའི་ཐབས་ཀྱི་ཚུལ་བསམ་གྱིས་མི་ཁྱབ་པ་ལ་མཁས་པའི་རྗེས་སུ་སོང་བ་དང་སེམས་ཅན་བག་མེད་པ་ཐམས་ཅད་ཡོངས་སུ་བསྐུལ་ཞིང་མངོན་པར་ཞེན་པ། ཐམས་ཅད་ལས་གྱེན་དུ་བསྐྱོད་པ་དང་། འོད་ཟེར་གྱི་དྲ་བ་ཆེན་པོ་རབ་ཏུ་དགྱེ་བས་འཇིག་རྟེན་གྱི་མུན་པ་ཐམས་ཅད་རྣམ་པར་སེལ་བ་དང་། ངན་སོང་ཐམས་ཅད་ཀྱི་སྡུག་བསྔལ་ཞི་བར་བྱེད་པ་དང་། སེམས་ཅན་དམྱལ་བའི་ལམ་གྱི་རྒྱུད་ཐམས་ཅད་ནས་རྣམ་པར་བཟློག་པ་དང་། སེམས་ཅན་ཐམས་ཅད་ཀྱི་སྔོན་གྱི་ལས་ཡོངས་སུ་བསྐུལ་བ་དང་།