།སྲིན་པོའི་དབང་པོ་མིག་བཟངས་ཀྱིས་དེ་སྐད་ཅེས་སྨྲས་པ་དང་། ཚོང་དཔོན་གྱི་བུ་ནོར་བཟངས་ཀྱིས་ནམ་མཁའི་དབྱིངས་ལ་བལྟས་ཏེ་འདི་སྐད་ཅེས་སྨྲས་སོ། །འཕགས་པ་བདག་ལ་ཐུགས་བརྩེ་བར་མཛད་དེ། དགེ་བའི་བཤེས་གཉེན་བསྟེན་པས་སྨན་ཡོན་བཏགས་པ་མ་ནོངས་སོ། །ད་དུང་ཡང་དགེ་བའི་བཤེས་གཉེན་བལྟ་བའི་སླད་དུ། ཇི་ལྟར་བརྩོན་པར་བགྱི་བ་དང་། ཕྱོགས་གང་ལོགས་སུ་མཆི་བར་བགྱི་བ་དང་། གནས་གང་ཞིག་དུ་ཡོངས་སུ་བཙལ་བ་དང་། དམིགས་པ་གང་ཞིག་བསམ་པར་བགྱི་བའི་ཐབས་ཀྱི་སྒོ་མ་ནོར་བར་བསྟན་དུ་གསོལ། སྨྲས་པ་རིགས་ཀྱི་བུ་དེ་བས་ན་ཕྱོགས་ཀུན་ཏུ་རབ་ཏུ་འདུད་པའི་ལུས་དང་། དམིགས་པ་ཐམས་ཅད་དུ་དགེ་བའི་བཤེས་གཉེན་དྲན་པ་དང་། འབྲེལ་པའི་བསམ་པ་དང་། ཀུན་ཏུ་འགྲོ་བའི་ཏིང་ངེ་འཛིན་གྱི་རྗེས་སུ་འབྲང་བ་དང་། སེམས་ཀྱི་ཤུགས་རྨི་ལམ་ལྟ་བུ་དང་། ཡིད་ཀྱི་ལུས་གཟུགས་བརྙན་ལྟ་བུས་རྣམ་པར་རྒྱུ་སྟེ། འགྲོ་བས་དགེ་བའི་བཤེས་གཉེན་གྱི་གན་དུ་སོང་ཤིག །དེ་ནས་ཚོང་དཔོན་གྱི་བུ་ནོར་བཟངས་ཀྱིས་སྲིན་པོའི་དབང་པོ་མིག་བཟངས་ཀྱིས་ཇི་སྐད་དུ་གཏམས་པ་དེ་ལྟར་ནན་ཏན་དུ་བྱས་པ་དང་། མདུན་གྱི་སའི་ནང་ནས་པད་མོ་ཆེན་པོ་རྡོ་རྗེ་རིན་པོ་ཆེ་ཐམས་ཅད་ལས་གྲུབ་པའི་ཆུ་བ་ཅན། ནང་རིམ་རིན་པོ་ཆེའི་རྒྱལ་པོ་འགྲོ་བ་རྒྱ་མཚོ་སྣ་ཚོགས་ལས་བྱས་པ། རིན་པོ་ཆེའི་རྒྱལ་པོ་ཐམས་ཅད་ལས་འདབ་མའི་ཕྲེང་བ་གྲུབ་པ། རིན་པོ་ཆེའི་རྒྱལ་པོ་རྣམ་པར་སྣང་བའི་སྙིང་པོ་ཅན་སྤོས་ཀྱི་རིན་པོ་ཆེའི་རྒྱལ་པོ་རིན་པོ་ཆེ་ཐམས་ཅད་ཀྱི་མདོག་གི་ཟེ་བ་དང་ལྡན་པ། རིན་པོ་ཆེའི་དྲ་བ་གྲངས་མེད་པས་ཀུན་ནས་ཡོག་པ་བྱུང་བ་མཐོང་ངོ་། །རིན་པོ་ཆེའི་རྒྱལ་པོའི་པད་མོ་ཆེན་པོ་དེའི་སྙིང་པོ་ལའང་། ཁང་པ་བརྩེགས་པ་ཆོས་ཀྱི་ཕྱོགས་སུ་ཡང་དག་པར་གཞོལ་བའི་སྙིང་པོ་ཞེས་བྱ་བ་ཤིན་ཏུ་སྤ་ལ་བལྟ་ན་སྡུག་པ་སའི་གཞི་རྣམ་པར་སྣང་བའི་དབྱིབས་དང་ལྡན་པ། རིན་པོ་ཆེའི་རྒྱལ་པོ་ཐམས་ཅད་ལས་བྱས་པའི་ཀ་བ་སྟོང་ཚང་བས་མཛེས་པར་བརྒྱན་པ།