དེ་དག་དེ་བས་ཀྱང་འགྲོ་བ་ཐམས་ཅད་ལ་ཕན་པ་དང་། ཡོངས་སུ་བསྡུ་བའི་དོན་དུ་ཞུགས་པར་གྱུར་ཏེ། དེ་ལྟར་མཉམ་པར་བཞག་པ་དེ་དག་གི་བ་སྤུའི་སྒོ་རེ་རེ་ནས་ཀྱང་། འོད་ཟེར་སངས་རྒྱས་ཀྱི་ཞིང་བརྗོད་དུ་མྱེད་པའི་རྡུལ་ཤིན་ཏུ་ཕྲ་བ་སྙེད་མངོན་པར་འཐོན་པ་གྱུར་ཏེ། འོད་ཟེར་དེ་དག་གི་སྒོ་རེ་རེ་ནས་ཀྱང་། བྱང་ཆུབ་སེམས་དཔའ་འཕྲུལ་བའི་སྤྲིན་འཇིག་རྟེན་གྱི་དབང་པོ་ཐམས་ཅད་དང་འདྲ་བའི་ལུས་དང་། འགྲོ་བ་ཐམས་ཅད་ལ་མངོན་པར་ལྟ་བའི་ལུས་དང་། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། འཕྲོད་པའི་ལུས་དང་ལྡན་པ་མངོན་པར་འཐོན་ཏེ། མངོན་པར་འཐོན་ནས་ཀྱང་། ཕྱོགས་ཐམས་ཅད་ཀྱི་ཆོས་ཀྱི་དབྱིངས་རྒྱས་པར་བཀང་ནས། སེམས་ཅན་ཐམས་ཅད་ཡང་དག་པར་བསྐུལ་ཞིང་ཡོངས་སུ་སྨིན་པར་བྱ་བ་དང་། གདུལ་བར་བྱེད་དོ། །ལྷའི་གནས་ན་ཤི་འཕོ་བ་ཡོངས་སུ་བསྟན་པའི་སྒོ་དང་། འཇིག་རྟེན་གྱི་ཁམས་ཐམས་ཅད་དུ་སྐྱེ་བ་ཡོངས་སུ་བསྟན་པའི་སྒོ་དང་། བྱང་ཆུབ་སེམས་དཔའི་སྤྱོད་པའི་དཀྱིལ་འཁོར་ཡོངས་སུ་བསྟན་པའི་སྒོ་དང་། རྨི་ལམ་ཡོངས་སུ་བསྟན་པའི་སྒོ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱིས་སེམས་ཅན་ཡོངས་སུ་བསྐུལ་བ་བྱེད་དོ། །བྱང་ཆུབ་སེམས་དཔའ་ཐམས་ཅད་ཀྱི་སྨོན་ལམ་གྱིས་བྱུང་བའི་སྒོ་དང་། འཇིག་རྟེན་གྱི་ཁམས་ཡོངས་སུ་བསྐྱོད་པའི་སྒོ་དང་། སྦྱིན་པའི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་བསྟན་པའི་སྒོ་དང་། དེ་བཞིན་གཤེགས་པ་ཐམས་ཅད་ཀྱི་ཡོན་ཏན་ལ་ནན་ཏན་དུ་བྱ་བ་དང་། རབ་ཏུ་བསྒྲུབ་པའི་སྒོ་དང་། ཡན་ལག་དང་ཉིང་ལག་གཅོད་པའི་བཟོད་པའི་ཕ་རོལ་ཏུ་ཕྱིན་པ་ཡོངས་སུ་བསྟན་པའི་སྒོ་དང་། བྱང་ཆུབ་སེམས་དཔའི་རྣམ་པར་འཕྲུལ་པ་ཆེན་པོས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངས་སུ་བསྟན་པའི་སྒོ་དང་། བྱང་ཆུབ་སེམས་དཔའི་བསམ་གཏན་དང་རྣམ་པར་ཐར་པ་དང་། ཏིང་ངེ་འཛིན་དང་སྙོམས་པར་འཇུག་པ་ཐམས་ཅད་དང་། སངས་རྒྱས་ཀྱི་ཡེ་ཤེས་ཀྱི་ལམ་གྱི་དཀྱིལ་འཁོར་སྣང་བ་རབ་ཏུ་བརྗོད་པའི་སྒོ་དང་། སངས་རྒྱས་ཀྱི་ཆོས་ཐམས་ཅད་ཡོངས་སུ་བཙལ་བའི་ཕྱིར།