ཁྱིམ་ཐབ་དང་བཅས་པས་དེ་བཞིན་གཤེགས་པའི་མཆོད་པ་མཆོད་པའི་སྒོ་རྣམ་པ་ཐམས་ཅད་དུ་བཤམས་པས་མཆོད་པ་བྱས་ནས་བཅོམ་ལྡན་འདས་དེ་ལས་ཆོས་ཀྱི་རྣམ་གྲངས་དེ་བཞིན་གཤེགས་པ་ཐམས་ཅད་སྐྱེ་བ་འབྱུང་བའི་སྒྲོན་མ་ཞེས་བྱ་བ་ཐོས་སོ། །དེ་ཐོས་ནས་ཁོ་མོས་ཡེ་ཤེས་ཀྱི་མིག་རབ་ཏུ་ཐོབ་སྟེ། བྱང་ཆུབ་སེམས་དཔའི་རྣམ་པར་ཐར་པ་བྱང་ཆུབ་སེམས་དཔའི་ཏིང་ངེ་འཛིན་གྱི་ཚུལ་རྒྱ་མཚོ་ཐམས་ཅད་ལ་རྣམ་པར་ལྟ་བའི་ཡུལ་འདི་ཡང་རབ་ཏུ་ཐོབ་པར་གྱུར་ཏེ། རིགས་ཀྱི་བུ་དེ་ལྟར་ཁོ་མོ་རྣམ་པར་ཐར་བ་འདི་ལ་སྒོམ་ཞིང་བྱང་ཆུབ་སེམས་དཔའ་དང་ལྷན་ཅིག་ཏུ་བྱང་ཆུབ་སེམས་དཔའི་སྤྱོད་པ་སྤྱོད་ཅིང་བསྐལ་པ་སངས་རྒྱས་ཀྱི་ཞིང་བརྒྱ་ཕྲག་སྟོང་གི་རྡུལ་ཤིན་ཏུ་ཕྲ་བ་སྙེད་ཅིག་ཏུ་རྒྱུ་རྒྱུ་སྟེ། སངས་རྒྱས་ཀྱི་ཞིང་དེ་སྙེད་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་བསྐལ་པ་དེ་དག་ལ་དེ་བཞིན་གཤེགས་པ་མཐའ་དང་དབུས་མེད་པ་ཞིག་བསྙེན་བཀུར་ནས། བསྐལ་པ་ལ་ལ་ནི་དེ་བཞིན་གཤེགས་བ་བསྐལ་པར་བཞུགས་པ་གཅིག་ཀྱང་བསྙེན་བཀུར་ཏོ། །བསྐལ་པ་ལ་ལ་ནི་དེ་བཞིན་གཤེགས་པ་གཉིས་ཀྱང་བསྙེན་བཀུར་ཏོ། །བསྐལ་པ་ལ་ལ་ལ་ནི་དེ་བཞིན་གཤེགས་པ་བརྗོད་དུ་མེད་པའི་བར་དག་ཀྱང་བསྙེན་བཀུར་ཏོ། །བསྐལ་པ་ལ་ལ་ལ་ནི་དེ་བཞིན་གཤེགས་པ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱང་བསྙེན་བཀུར་ཏེ། དེ་སྲིད་དུ་ཁོ་མོས་བྱང་ཆུབ་སེམས་དཔའི་སྐུ་ཡང་ཚད་ནི་ཇི་ཙམ་ཞིག །དབྱིབས་ནི་ཇི་ལྟ་བུ་ཞིག། སྐུ་མདོག་ནི་ཅི་འདྲ་བ་ཞིག་ཡིན་པ་ཁོང་དུ་ཆུད་དོ། །སྐུའི་ཕྲིན་ལས་ཀྱང་ཁོང་དུ་མ་ཆུད། གསུང་གི་ཕྲིན་ལས་དང་ཐུགས་ཀྱི་ཕྲིན་ལས་ཀྱང་ཁོང་དུ་མ་ཆུད་དོ། །ཡེ་ཤེས་ཀྱི་གཟིགས་པ་དང་། ཡེ་ཤེས་ཀྱི་སྤྱོད་ཡུལ་དང་། ཡེ་ཤེས་ཀྱི་ཏིང་ངེ་འཛིན་གྱི་ཡུལ་ཡང་ཁོང་དུ་མ་ཆུད་དོ། །རིགས་ཀྱི་བུ་བྱང་ཆུབ་སེམས་དཔའ་ཇི་སྙེད་ཅིག་གིས་བྱང་ཆུབ་སེམས་དཔའི་སྤྱོད་པ་མཛད་པ་མཐོང་ནས། བྱང་ཆུབ་སེམས་དཔལ་ལ་དགའ་བའི་སེམས་སྐྱེས་ཏེ། བརྡ་སྣ་ཚོགས་དང་བསྙེན་པ་སྣ་ཚོགས་ཀྱིས་མོས་པ་བསྐྱེད་པར་གྱུར་པ་དེ་དག་ཐམས་ཅད་ཀྱང་བྱང་ཆུབ་སེམས་དཔའ་འཇིག་རྟེན་དང་འཇིག་རྟེན་ལས་འདས་པའི་ཐབས་སྣ་ཚོགས་ཀྱིས་ཡོངས་སུ་བཟུང་སྟེ། བྱང་ཆུབ་སེམས་དཔའི་འཁོར་དུ་གྱུར་རོ། །དེ་དག་ཀྱང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱོད་པ་མཛད་པའི་ཚེ་འཁོར་དུ་འགྲོགས་འགྲོགས་པས་བླ་ན་མྱེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མྱི་ལྡོག་པར་གྱུར་ཏོ།