།དེ་ལྟར་རབ་ཏུ་བྱུང་ནས་རིང་པོ་མ་ལོན་པར་གཟུངས་ཀྱི་སྒོ་ཆོས་ཐམས་ཅད་ལ་རབ་རིབ་མེད་པའི་དོན་གྱི་སྒྲོན་མ་ཞེས་བྱ་བ་དེ་འཁོར་དང་བཅས་པར་ཡོངས་སུ་བསྒྲུབས་སོ། །བསྒོམས་སོ། །ཤིན་ཏུ་བསྒོམས་སོ། །དེ་སྙེད་ཀྱི་ཏིང་ངེ་འཛིན་གྱི་སྒོ་ཡང་རབ་ཏུ་ཐོབ་པར་གྱུར་ཏོ། །བྱང་ཆུབ་སེམས་དཔའི་མངོན་པར་ཤེས་པ་བཅུ་ཡང་རབ་ཏུ་ཐོབ་བོ། །སོ་སོ་ཡང་དག་པར་རིག་པའི་ཚུལ་རྒྱ་མཚོ་ལ་ཡང་དག་པར་ཞུགས་པར་གྱུར་ཏོ། །ཕྱོགས་བཅུའི་དེ་བཞིན་གཤེགས་པའི་དྲུང་དུ་འགྲོ་བ་ཐོགས་པ་མེད་པའི་སྤྱོད་ཡུལ་ཞེས་བྱ་བའི་ལུས་ཡོངས་སུ་དག་པ་ཡང་རབ་ཏུ་ཐོབ་སྟེ། དེས་བཅོམ་ལྡན་འདས་དེའི་ཆོས་ཀྱི་འཁོར་ལོ་ཡང་དག་པར་བླངས་སོ། །ཡོངས་སུ་བཟུང་ངོ་། །གཏམ་གྱི་སྐྱེས་བུ་ཡང་བྱས་སོ། །ཆོས་སྨྲ་བ་ཆེན་པོ་ཡང་བྱས་སོ། །བསྟན་པ་ཡོངས་སུ་གཟུང་བ་ཡང་བྱས་སོ། །མངོན་པར་ཤེས་པ་ཐོབ་པའི་སྟོབས་ཀྱིས་ཀྱང་འཇིག་རྟེན་གྱི་ཁམས་ཐམས་ཅད་རྒྱས་པར་བཀང་སྟེ། བསམ་པ་ཇི་ལྟ་བ་བཞིན་དུ་སེམས་ཅན་རྣམས་ལ་ལུས་ཡོངས་སུ་བསྟན་ནས། སངས་རྒྱས་བྱུང་བ་དེ་རབ་ཏུ་བརྗོད་པ་དང་། སྔོན་གྱི་དེ་བཞིན་གཤེགས་པས་ཡོངས་སུ་བསྒྲུབ་པའི་ཆོས་ཉིད་མངོན་པར་བརྗོད་པ་དང་། སྔོན་གྱི་སྦྱོར་བ་ཕུན་སུམ་ཚོགས་པ་དེ་དག་ཡོངས་སུ་བརྗོད་པ་དང་། སངས་རྒྱས་ཀྱི་རྣམ་པར་འཕྲུལ་པའི་མཐུ་དེ་དག་ཡོངས་སུ་བརྗོད་པར་བྱ་བས་བསྟན་པ་ཡོངས་སུ་གཟུང་བ་བྱས་སོ། །རྒྱལ་པོའི་སྲས་གཟི་བརྗིད་ཀྱི་བདག་པོས་ཀྱང་དེའི་ཉིན་པར་ཟླ་བ་ཉ་སྟེ། རྒྱས་པའི་ཚེ་རིན་པོ་ཆེ་བདུན་རབ་ཏུ་ཐོབ་པར་གྱུར་ཏེ། དེ་ཁང་བའི་སྟེང་ན་བུད་མེད་ཀྱི་ཚོགས་ཀྱིས་བསྐོར་ཅིང་འདུག་པའི་མདུན་དུ་འཁོར་ལོ་རིན་པོ་ཆེ་ཆེན་པོ་ཤུགས་ལ་ཐོགས་པ་མེད་པ་ཞེས་བྱ་བ་རྩིབས་སྟོང་ཕྲག་བརྒྱ་དང་ལྡན་པ་རིན་པོ་ཆེ་ཐམས་ཅད་ཀྱིས་བརྒྱན་པ། ལྷ་རྫས་ཀྱི་འཛམ་བུ་ཆུ་ཀླུང་གི་གསེར་ལས་གྲུབ་པ། འོད་ཀུན་ཏུ་འབྱུང་བ་རྣམ་པའི་མཆོག་ཐམས་ཅད་དང་ལྡན་བ་བྱུང་བར་གྱུར་ཏོ། །གླང་བོ་རིན་པོ་ཆེ་ཆེན་པོ་རྡོ་རྗེ་རིན་པོ་ཆེའི་རིའི་གཟི་བརྗིད་ཅེས་བྱ་བ་འབྱུང་བར་གྱུར་ཏོ། །རྟ་རིན་པོ་ཆེ་རི་སྔོ་རླུང་གི་ཤུགས་ཤེས་བྱ་བ་བྱུང་བར་གྱུར་ཏོ། །ནོར་བུ་རིན་པོ་ཆེ་ཆེན་པོ་ཉི་མའི་སྙིང་པོ་འོད་སྤྲིན་རྒྱལ་པོ་ཞེས་བྱ་བ་བྱུང་བར་གྱུར་ཏོ། །བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པ་དེ་ཡང་བུད་མེད་རིན་པོ་ཆེར་བྱུང་བར་གྱུར་ཏོ།