བཅོམ་ལྡན་འདས་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པ་དང་། འཁོར་ཐམས་ཅད་དང་བཅས་ཏེ། བཅོམ་ལྡན་འདས་དེའི་སྤྱན་སྔ་ནས་དོང་ངོ་། །དེ་ནས་རྒྱལ་པོའི་གནས་སྡོང་བོ་རི་བོའི་དཔལ་གང་ན་བ་དང་། རྒྱལ་པོ་ཡབ་ནོར་གྱི་བདག་པོ་གང་ན་བ་དེར་དོང་སྟེ། དྲུང་དུ་ཕྱིན་ནས། རྒྱལ་པོ་ཡབ་ནོར་གྱི་བདག་པོའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། དོན་འདི་བརྗོད་དོ། །ལྷའི་ཞལ་སྔ་ནས་མཁྱེན་པར་མཛད་དུ་གསོལ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྐུ་ཉི་མ་དམ་པ་ཞེས་བགྱི་བ་མཁྱེན་པ་དང་ཞབས་སུ་ལྡན་པ་བདེ་བར་གཤེགས་པ་འཇིག་རྟེན་མཁྱེན་པ་བླ་ན་མེད་པ་སྐྱེས་བུ་འདུལ་བ་ཁ་ལོ་བསྒྱུར་བ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་སྟེ། ཁྱོད་ཀྱི་ཁམས་འདི་ཉིད་ཀྱི་སྙིང་པོ་བྱང་ཆུབ་ཆོས་ཀྱི་སྤྲིན་ཤིན་ཏུ་སྡུག་པའི་འོད་ན་རྣམ་པར་སྤྱོད་དེ། མངོན་པར་རྫོགས་པར་སངས་རྒྱས་ནས་རིང་པོ་མ་ལགས་སོ། །དེ་ནས་རྒྱལ་པོ་ནོར་གྱི་བདག་པོས། གཞོན་ནུ་གཟི་བརྗིད་ཀྱི་བདག་པོ་ལ་འདི་སྐད་ཅེས་སྨྲས་སོ། །གཞོན་ནུ་ཁྱོད་ལ་དོན་འདི་ལྷ་འམ་མི་འམ་སུ་ཞིག་གི་སྦྲན། དེས་སྨྲས་པ། བདག་ལ་བུ་མོ་དགའ་བའི་འོད་ཀྱི་དཔལ་ཤིན་ཏུ་སྦྱངས་པས་སྦྲན་ཏོ། །དེ་ནས་རྒྱལ་པོ་ནོར་གྱི་བདག་པོས་སངས་རྒྱས་བྱུང་བར་ཐོས་ནས། སངས་རྒྱས་སྐྱེ་བ་ལ་ནི་གཏེར་རབ་ཏུ་ཐོབ་ཙམ་དུ་སེམས། སངས་རྒྱས་རིན་པོ་ཆེ་དང་ཕྲད་པར་ནི་དཀའ་བར་སེམས། དེ་བཞིན་གཤེགས་པ་མཐོང་བས་ནི་ངན་སོང་གི་གཡང་སའི་འཇིགས་པ་ཐམས་ཅད་ཀྱང་རྣམ་པར་ལྡོག་པར་སེམས། ཉོན་མོངས་པའི་ནད་ཆེན་པོ་རབ་ཏུ་ཞི་བར་བྱ་བ་ལ་ནི་སྨན་པའི་རྒྱལ་པོ་ཆེན་པོ་དང་ཕྲད་པ་ཙམ་དུ་སེམས། འཁོར་བའི་སྡུག་བསྔལ་ཐམས་ཅད་ལས་ནི་ཡོངས་སུ་འགྲེལ་བ་ཡིན་པར་སེམས། ཤིན་ཏུ་བདེ་ཞིང་ལྡན་པ་ལ་ནི་རབ་ཏུ་གཞོག་པར་སེམས། རབ་རིབ་མེད་པའི་ཡེ་ཤེས་ཀྱི་སྣང་བ་ནི་ཡང་དག་པར་སྟོན་པར་སེམས། མ་རིག་པའི་མུན་པ་བསྩལ་བ་ལ་ནི་སྒྲོན་མ་ཆེན་པོ་བྱུང་བ་ཙམ་དུ་སེམས།