།གཞོན་ནུ་དེ་ནི་རྫི་མ་བའི་རྫི་མ་ལྟ་བུ་དང་ལྡན་པར་གྱུར་ཏེ། མིག་གི་སྐྱེ་མཆེད་རིན་པོ་ཆེ་པདྨ་རཱ་ག་ལྟར་ཤིན་ཏུ་དག་པ། མིག་གི་སྤྲིན་མཉམ་པ། མིག་གི་སྤྲིན་མཚུངས་པ། མིག་གི་སྤྲིན་ལེགས་པ། མིག་གི་སྤྲིན་ཡངས་པ། མིག་གི་སྤྲིན་ཤིན་ཏུ་བརྟན་པར་གྱུར་ཏོ། །དེའི་སྨིན་མཚམས་སུ་མཛོད་སྤུ་སྐྱེས་པར་གྱུར་ཏེ། འཇམ་པ་ལས་སུ་རུང་བ། ཤིན་ཏུ་མཉེན་པ། ཤིང་བལ་ལྟར་རེག་ན་བདེ་བ། དང་བ། གསལ་བ་འོད་ཡོད་པ། ཆབ་བྲོམ་ལྟ་བུ་ཁ་བའི་ཁ་དོག་ལྟར་འདུག་པ། འོད་ཟེར་དཀར་པོའི་དཀྱིལ་འཁོར་གྱི་འོད་རབ་ཏུ་སྣང་བ་དང་ལྡན་པར་གྱུར་ཏོ། །དེའི་སྤྱི་བོ་ལ་གཙུག་ཏོར་མངོན་པར་གྲུབ་པར་གྱུར་ཏེ། ཤིན་ཏུ་ལེགས་པ། ཀུན་ནས་ཟླུམ་པ། དབུས་སུ་བབ་པ། སྐྲའི་རྒྱན་དུ་གྱུར་པ། རིན་པོ་ཆེའི་པད་མོ་འདབ་མ་བྱེ་བ་བརྒྱ་ཕྲག་སྟོང་དང་ལྡན་པ་ལྟར་སྣང་བ། ཀུན་ནས་ཆ་མཉམ་པར་གནས་པ། རིན་ཐང་གདབ་ཏུ་ཚད་མེད་པས་གཅེས་པའི་གཙུག་ཏུ་གྱུར་པ་དང་ལྡན་པར་གྱུར་ཏོ། །གཞོན་ནུ་དེ་ནི་པགས་པ་ཤིན་ཏུ་འཇམ་པ་དང་ལྡན་པར་གྱུར་ཏེ། དེའི་ལུས་ལ་རྡུལ་ལམ། དྲི་མའམ། རྔུལ་ལམ། སེར་གའམ། གཉེར་མའམ། ལྷོད་པའམ། འཁུམས་པའམ། འཕྱང་བའམ། སློད་བག་ཏུ་གནས་པ་མེད་པར་གྱུར་ཏོ། །གཞོན་ནུ་དེ་ནི་མདོག་གསེར་གྱི་ཁ་དོག་ལྟ་བུ་དང་ལྡན་པར་གྱུར་ཏེ། འཛམ་བུ་ཆུ་ཀླུང་གི་གསེར་གྱི་མདོག་ལྟ་བུ་དང་ལྡན་ཞིང་འོད་ཀུན་ཏུ་འདོམ་གང་བ་དང་། གསེར་ལྟར་གཅིག་ཏུ་འབར་བའི་འོད་ཀྱི་དཀྱིལ་འཁོར་གྱིས་མཛེས་པར་བརྒྱན་པ་དང་། བ་སྤུའི་བུ་ག་ཐམས་ཅད་ནས་དྲི་ཞིམ་པོའི་འོད་ཟེར་འབྱུང་བས་ལུས་ཀྱི་རྒྱན་རབ་རིབ་མེད་ཅིང་འོད་གསལ་བ་དང་ལྡན་པར་གྱུར་ཏོ། །གཞོན་ནུ་དེ་ནི་བ་སྤུ་རེ་རེར་བྱུང་བ་དང་ལྡན་པར་གྱུར་ཏེ། བ་སྤུའི་བུ་ག་རེ་རེ་ནས་བ་སྤུ་རེ་རེ་སྐྱེས་པར་གྱུར་པ། བཻཌཱུཪྻ་སྔོན་པོའི་ཁ་དོག་ལྟ་བུ་གཡས་ཕྱོགས་སུ་འཁྱིལ་བ། ལེགས་པར་སྐྱེས་པ། མཐང་ལ་ཞ་བར་འདུག་པ་ཤིན་ཏུ་ལེགས་པར་གནས་པ་དང་ལྡན་པར་གྱུར་ཏོ། །གཞོན་ནུ་དེའི་སྤུ་ཡན་ལག་གྱེན་དུ་འཁྱིལ་པར་གྱུར་ཏེ།