རྣམ་པར་དབྱེ་བ་མྱེད་པའི་ཆོས་ལ་ཞུགས་ནས་མཐའ་དང་དབུས་མེད་པའི་ལུས་ཀྱི་ཁ་དོག་དང་དབྱིབས་ཡོངས་སུ་བསྟན་ཏེ། སྤྱོད་པའི་ལུས་རེ་རེ་ལས་མཐའ་དང་དབུས་མེད་པའི་ཁ་དོག་རྒྱ་མཚོ་འཇིག་རྟེན་དུ་རྣམ་པར་དམྱིགས་པར་བྱས་ཏེ། སྤྱོད་པའི་ཁ་དོག་རེ་རེ་ལས་མཐའ་དང་དབུས་མེད་པའི་འོད་གཟེར་གྱི་སྤྲིན་ཡོངས་སུ་བཀྱེ་ཞིང་འོད་གཟེར་རེ་རེ་ལས་ཀྱང་སངས་རྒྱས་ཀྱི་ཞིང་གི་གཟུགས་བརྙན་མཐའ་དང་དབུས་མེད་པ་ཡོངས་སུ་བསྟན་ནས། སངས་རྒྱས་ཀྱི་ཞིང་རེ་རེར་ཡང་དེ་བཞིན་གཤེགས་པ་འབྱུང་བ་མཐའ་དང་དབུས་མེད་པ་ཡོངས་སུ་བསྟན་ཏེ། དེ་བཞིན་གཤེགས་པ་རེ་རེ་ཞིང་ཡང་སངས་རྒྱས་ཀྱི་རྣམ་པར་འཕྲུལ་པ་མཐའ་དང་དབུས་མེད་པ་ཡོངས་སུ་སྟོན་པ་བྱེད་ཅིང་སྔོན་གྱི་དགེ་བའི་རྩ་བས་ཡང་དག་པར་བསྐུལ་བ་བྱེད་དོ། །དགེ་བའི་རྩ་བ་མ་བསྐྱེད་པ་རྣམས་ཀྱང་ཡོངས་སུ་བསྐྱེད་དོ། །བསྐྱེད་པ་རྣམས་ཀྱང་ཡངས་པར་བྱེད་དོ། །དགེ་བའི་རྩ་བ་ཡངས་པར་བྱས་པ་རྣམས་ནི་རྣམ་པར་འཕེལ་བར་བྱེད་དེ། ཁོ་མོ་ནི་སེམས་ཀྱི་སྐད་ཅིག་རེ་རེ་ལ་ཡང་། སེམས་ཅན་ཀྱི་ཁམས་མཐའ་དང་དབུས་མེད་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་ས་ལ་རབ་ཏུ་འགོད་པར་བྱེད་དོ།། །།སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་བཅུ་གཉིས་པ། རིགས་ཀྱི་བུ་གཞན་ཡང་ཁྱོད་ཀྱིས་འདི་སྐད་དུ་སྨྲས་ཏེ། ཁྱོད་བླ་ན་མྱེད་པ་ཡང་དག་པར་རྫོགས་པའི་བྱང་ཆུབ་ཏུ་ཞུགས་ནས་ནི་ཇི་སྲིད་ཅིག་ལོན། བསྐལ་པ་བརྒྱ་ཕྲག་ཇི་སྙེད་ཅིག་ནས་ནི་བྱང་ཆུབ་ཀྱི་སྤྱོད་པ་ལ་སྤྱོད་སྤྱོད་ཅེས་ཟེར་བ་དེའི་དོན་ཀྱང་། སངས་རྒྱས་ཀྱི་བྱིན་གྱི་རླབས་ཀྱིས་བསྟན་པར་བྱའོ། །རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་ཡེ་ཤེས་ཀྱི་དཀྱིལ་འཁོར་ནི་རྟོག་པ་དང་། རྣམ་པར་རྟོག་པའི་ཡུལ་དང་ལྡན་པ། དེ་ལ་འཁོར་བ་རིང་བ་འམ། འཁོར་བ་ཐུང་བར་རྣམ་པར་དགོད་ཅིང་བརྗོད་པར་བྱ་བ་བྱེད་དོ། །བསྐལ་པ་ཀུན་ནས་ཉོན་མོངས་པའམ། བསྐལ་པ་རྣམ་པར་དག་པའམ། བསྐལ་པ་ཆུང་བའམ། བསྐལ་པ་ཆེ་བའམ། བསྐལ་པ་མང་བའམ། བསྐལ་བ་ཐ་དད་པའམ།