སངས་རྒྱས་བྱུང་བ་ཐམས་ཅད་ཀྱི་ཆོས་ཀྱི་འཁོར་ལོ་རབ་ཏུ་བསྐོར་བའི་ཕྱིར་མཆོད་སྦྱིན་གྱིས་ཆོས་བཟང་པོ་ལ་རབ་ཏུ་གནས་པའི་སྐལ་བ་མཉམ་པ་དང་། དེ་བཞིན་གཤེགས་པ་ཐམས་ཅད་ཀྱི་ཡུལ་དང་ཡེ་ཤེས་ལ་ཡང་དག་པར་གནས་པར་བྱ་བའི་ཕྱིར། ཚངས་པའི་སྤྱོད་པ་རྣམ་པར་དག་པའི་བསྐལ་བ་མཉམ་པ་དང་། བྱམས་པའི་ཚུལ་སྣ་ཚོགས་ཀྱིས་སྐད་ཅིག་རེ་རེ་ལ་སེམས་ཅན་རྒྱ་མཚོ་ཐམས་ཅད་དུ་རྒྱས་པར་དགང་བར་བྱ་བའི་ཕྱིར་བྱམས་པ་ཆེན་པོའི་སྐལ་བ་མཉམ་པ་དང་། སེམས་ཅན་གྱི་ཁམས་ཐམས་ཅད་ཡོངས་སུ་བསྐྱབས་པའི་ཆོས་ཀྱི་སྤྲིན་གྱི་ཆེར་མངོན་པར་དབབ་པའི་ཕྱིར། སྙིང་རྗེ་ཆེན་པོའི་ཚུལ་རྒྱ་མཚོ་ལ་འཇུག་པའི་སྐལ་བ་མཉམ་པ་དང་། སེམས་ཅན་ཐམས་ཅད་ཡོངས་སུ་སྨྱིན་པར་བྱེད་པའི་ཐབས་ཀྱི་རྒྱུད་དུ་སྐལ་བ་མཉམ་པར་བྱ་བའི་ཕྱིར་ལུས་ཀྱི་ལས་ཀྱི་སྐལ་བ་མཉམ་པ་དང་། ཆོས་ཐམས་ཅད་བརྗོད་ཅིང་སྨོས་པ་ལ་ངག་གི་ལས་རྣམ་པར་དག་པའི་སྐལ་བ་མཉམ་པ་དང་། སེམས་ཅན་ཐམས་ཅད་ཀྱི་སེམས་ལ་ཐམས་ཅད་མཁྱེན་པ་ཉིད་དུ་དམིགས་པ་ཉེ་བར་བསྒྲུབ་པའི་ཕྱིར་ཡིད་ཀྱི་ལས་ཀྱི་སྐལ་བ་མཉམ་པ་དང་། སངས་རྒྱས་ཀྱི་ཞིང་ཐམས་ཅད་ལ་རྒྱན་རྣམ་པ་སྣ་ཚོགས་ཐམས་ཅད་ཀྱིས་རབ་ཏུ་བརྒྱན་པའི་སྐལ་པ་མཉམ་པ་དང་། སངས་རྒྱས་འབྱུང་བ་རྒྱ་མཚོ་ཐམས་ཅད་དུ་དེ་བཞིན་གཤེགས་པ་ཐམས་ཅད་ཀྱི་སྤྱན་སྔར་འགྲོ་བའི་སྐལ་བ་མཉམ་པ་དང་། དེ་བཞིན་གཤེགས་པ་ཐམས་ཅད་ལ་ཆོས་ཀྱི་འཁོར་ལོ་བསྐོར་བར་གསོལ་བ་གདབ་པའི་སྐལ་བ་མཉམ་པ་དང་། དེ་བཞིན་གཤེགས་པ་ཐམས་ཅད་ལ་དུས་མ་ལུས་པར་མཆོད་པ་ཐམས་ཅད་ཀྱིས་རིམ་གྲོ་བྱ་བའི་ཕྱིར། མཆོད་པས་རིམ་གྲོ་བྱ་བའི་སྐལ་བའི་མཉམ་པ་དང་། སེམས་ཅན་གྱི་ཁམས་ཐམས་ཅད་དུ་སེམས་ཅན་ཡོངས་སུ་སྨྱིན་པར་བྱ་བ་དང་། གདུལ་བའི་སྐལ་པ་མཉམ་པ་དང་། ཆོས་ཀྱི་ཚུལ་ཐམས་ཅད་ལ་སྣང་བ་རབ་ཏུ་ཐོབ་པའི་སྐལ་བ་མཉམ་པ་དང་།