།བྱང་སེམས་དཔའ་ཐམས་ཅད་ཀྱི་ཆོས་ལ་དབང་བསྒྱུར་བ་རབ་ཏུ་གནས་པར་བྱ་བའི་ཕྱིར་དགེ་བའི་བཤེས་གཉེན་རྣམས་ལ་དོན་ཐམས་ཅད་ཡོངས་སུ་སྒྲུབ་པའི་འདུ་ཤེས་རབ་ཏུ་ཐོབ་སྟེ། འདུ་ཤེས་རྣམ་པར་དག་པ་བཅུ་པོ་དེ་དག་རབ་ཏུ་ཐོབ་པར་གྱུར་ཏོ། །དེ་དག་ཐོབ་པས་མཚན་མོའི་ལྷ་མོ་འགྲོ་བ་ཐམས་ཅད་བསྲུང་བའི་སྨོན་ལམ་ལ་བརྩོན་པའི་འོད་སྣང་བ་ལས་བྱང་ཆུབ་སེམས་དཔའ་དང་། བསྐལ་པ་མཐུན་པ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཐོབ་པར་གྱུར་ཏེ། འདི་ལྟར་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་དུས་གསུམ་རྗེས་སུ་དྲན་པའི་ཚུལ་ལ་དྲན་པའི་སྐལ་བ་མཉམ་པ་དང་། ཆོས་རྒྱ་མཚོའི་ཚུལ་ཐམས་ཅད་ཐ་མྱི་དད་པར་ཁོང་དུ་ཆུད་པར་བྱ་བ་ལ་བློ་གྲོས་ཀྱི་སྐལ་པ་མཉམ་པ་དང་། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོའི་དཀྱིལ་འཁོར་རིག་པས་རྗེས་སུ་ཤེས་པར་བྱ་བའི་བྱེ་བྲག་དང་། ཚུལ་ཐ་དད་པར་མཁས་པ་ལ་རེག་པའི་སྐལ་བ་མཉམ་པ་དང་། བློ་ནམ་མཁའ་དང་མཉམ་པས་དུས་གསུམ་ཐམས་ཅད་ཀྱི་ཚུལ་རྒྱ་མཚོ་སྣང་བ་རབ་ཏུ་ཐོབ་པར་བྱ་བའི་ཕྱིར་བློའི་སྐལ་བ་མཉམ་པ་དང་། བྱང་ཆུབ་སེམས་དེའི་ཐམས་ཅད་ཀྱི་དབང་པོ་རྒྱ་མཚོ་ཤེས་པའི་སྣང་བ་རབ་ཏུ་ཐོབ་པར་བྱ་བའི་ཕྱིར་དབང་པོ་རྣམ་པར་དག་པའི་སྐལ་བ་མཉམ་པ་དང་། རྣམ་པ་ཐམས་ཅད་དུ་སེམས་ཅན་ཡོངས་སུ་བསྡུ་བའི་རྒྱན་གྱིས་རྣམ་པར་བརྒྱན་པའི་བྱང་ཆུབ་སེམས་དཔའི་ལམ་གྱི་ཡོན་ཏན་ལ་ནན་ཏན་དུ་བྱ་བའི་རྒྱན་གྱི་ལམ་ཁོང་དུ་ཆུད་པར་བྱ་བའི་ཕྱིར་སེམས་རྣམ་པར་དག་པའི་སྐལ་བ་མཉམ་པ་དང་། དེ་བཞིན་གཤེགས་པའི་ཡེ་ཤེས་ཀྱི་སྤྱོད་ཡུལ་སྣང་བར་རབ་ཏུ་ཐོབ་པར་བྱ་བའི་ཕྱིར་སྤྱོད་ཡུལ་གྱི་སྐལ་བ་མཉམ་པ་དང་། ཐམས་ཅད་མཁྱེན་པའི་ཚུལ་རྒྱ་མཚོ་ལ་འཇུག་པའི་ལམ་སྣང་བ། རྣམ་པ་ཐམས་ཅད་རབ་ཏུ་ཐོབ་པར་བྱ་བའི་ཕྱིར་ཚུལ་གྱི་རྗེས་སུ་འབྲང་བའི་སྐལ་པ་མཉམ་པ་དང་། ཆོས་ཐམས་ཅད་ཀྱི་རང་བཞིན་ཤེས་ཤིང་ཁོང་དུ་ཆུད་པ་རབ་ཏུ་ཐོབ་པར་བྱ་བའི་ཕྱིར། དོན་ཁོང་དུ་ཆུད་པའི་སྐལ་པ་མཉམ་པ་དང་། ཆོས་ཀྱི་ཚུལ་རྒྱ་ཚོ་ཐམས་ཅད་ལ་ཆོས་ལ་རྣམ་པར་སྤྱོད་པའི་སྐལ་བ་མཉམ་པ་དང་།