།དེ་སྐད་དུ་ཁྱོད་ཀྱིས་བྱང་ཆུབ་སེམས་དཔའི་རྣམ་པར་ཐར་པ་དགའ་བ་ཡངས་པའི་ཤུགས་འབྱུང་བས་སེམས་ཀྱི་སྐད་ཅིག་རྣམ་པར་བརྒྱན་པ་འདི་ཐོབ་ནས་ཇི་སྲིད་ཅིག་ལོན་ཞེས་ཟེར་བ་ནི། དེ་ལྟར་ཁོ་མོས་བསྐལ་པ་སངས་རྒྱས་ཀྱི་ཞིང་གཉིས་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་ཕ་རོལ་གྱི་འཇིག་རྟེན་གྱི་ཁམས་གསེར་ལྟར་དྲི་མ་མེད་པའི་འོད་དུ་བྱང་ཆུབ་ཀྱི་ཤིང་གི་ལྷ་མོ་བསོད་ནམས་སྒྲོན་མ་ཕུན་སུམ་ཚོགས་པ་ཀུན་ནས་དཔལ་གྱི་འོད་ཅེས་བྱ་བར་གྱུར་ཏེ། དེ་བཞིན་གཤེགས་པ་ཕྱིར་མི་ལྡོག་པའི་ཆོས་ཀྱི་དབྱིངས་ཀྱི་དབྱངས་ཀྱིས་ཆོས་བསྟན་པ་ཐོས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། བསྐལ་པ་སངས་རྒྱས་ཀྱི་ཞིང་གཉིས་ཀྱི་རྡུལ་ཤིན་ཏུ་ཕྲ་བ་སྙེད་པོ་དེ་དག་ཏུ་བྱང་ཆུབ་སེམས་དཔའི་སྤྱོད་པ་སྤྱད་ན། མི་མཇེད་ཀྱི་འཇིག་རྟེན་གྱི་ཁམས་འདིར་སྐྱེས་ཏེ། ལོག་པར་དད་སེལ་ལ་སྩོགས་པ་ཐ་མ་ཤཱཀྱ་ཐུབ་པའི་བར་གྱི་དེ་བཞིན་གཤེགས་པ་བསྐལ་པ་བཟང་པོ་པ་དག་ཀྱང་བསྙེན་བཀུར་ཏོ། །མ་བྱོན་པའི་སངས་རྒྱས་རྣམས་ཀྱང་བསྙེན་བཀུར་རོ། །འཇིག་རྟེན་གྱི་ཁམས་འདིར་ཇི་ལྟ་བ་དེ་བཞིན་དུ་འཇིག་རྟེན་གྱི་ཁམས་ཐམས་ཅད་དུའང་སངས་རྒྱས་ཀྱི་རྒྱུད་མ་བྱོན་པ་རྣམས་ཡོངས་སུ་བསྙེན་ཅིང་བཀུར་རོ། །མཆོད་དོ། །རིགས་ཀྱི་བུ་ད་དུང་དུའང་འཇིག་རྟེན་གྱི་ཁམས་གསེར་ལྟར་དྲི་མ་མེད་པའི་འོད་དེ་ཡང་ཡོད་ལ་སངས་རྒྱས་ཀྱི་རིགས་ཀྱང་རྒྱུན་མ་ཆད་ཀྱིས། དེ་བས་ན་རིགས་ཀྱི་བུ་ཚུལ་འདི་ལ་བྱང་ཆུབ་སེམས་དཔའི་རྣམ་པར་གནོན་པ་ཆེན་པོས་བརྩོན་པར་གྱིས་ཤིག །དེ་ནས་མཚན་མོའི་ལྷ་མོ་སྒྲ་རྒྱ་མཚོ་རབ་ཏུ་ཞི་བ་དང་ལྡན་པས། དེའི་ཚེ་བྱང་ཆུབ་སེམས་དཔའི་རྣམ་པར་ཐར་པ་དགའ་བ་ཡངས་པའི་ཤུགས་འབྱུང་བས་སེམས་ཀྱི་སྐད་ཅིག་རྣམ་པར་བརྒྱན་པ་འདི་ཉིད་བརྣན་ཏེ་བསྟན་པར་བྱ་བའི་ཕྱིར། ཚོང་དཔོན་གྱི་བུ་ནོར་བཟངས་ལ་ཚིགས་སུ་བཅད་དེ་སྨྲས་པ། རྣམ་ཐར་དགེ་འདི་ཇི་ལྟར་ཐོབ་འགྱུར་བ། །ཁོ་མོའི་ཚིག་འདི་ནོར་བཟངས་ཁྱོད་ཉོན་ཅིག །ཐོས་ནས་དགའ་བའི་སྟོབས་ཀྱང་ཡོངས་སྐྱེད་དེ། །རྣམ་ཐར་ཚུལ་འདི་ལ་ནི་འཇུག་པར་གྱིས། །བདག་གི་སེམས་དང་བསམ་པ་ཡོངས་སྦྱོང་ཞིང་། །མོས་པའི་ཤུགས་ཡངས་ཡོངས་སུ་སྐྱེད་བྱས་ཏེ