རྒྱང་མི་རིང་བ་ཞིག་ན་མཚན་མོའི་ལྷ་མོ་སེམས་ཅན་ཀུན་ཏུ་སྐྱོང་བའི་གཟི་བརྗིད་དཔལ་ཞེས་བྱ་བ་འདུག་གིས། དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས། བྱང་ཆུབ་སེམས་དཔའི་སྤྱོད་པའི་དཀྱིལ་འཁོར་ལ་འཇུག་པར་བྱ་བ་དང་། ཇི་ལྟར་ཡོངས་སུ་སྦྱང་བར་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟངས་ཀྱིས། མཚན་མོའི་ལྷ་མོ་རབ་ཏུ་དགའ་བའི་མིག་འགྲོ་བར་རྣམ་པར་སྣང་བའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། མཚན་མོའི་ལྷ་མོ་རབ་ཏུ་དགའ་བའི་མིག་འགྲོ་བར་རྣམ་པར་སྣང་བ་ལ། ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་ཡང་དང་ཡང་བལྟས་ཏེ། མཚན་མོའི་ལྷ་མོ་རབ་ཏུ་དགའ་བའི་མིག་འགྲོ་བར་རྣམ་པར་སྣང་བའི་དྲུང་ནས་སོང་ངོ་།། །།སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། །བམ་པོ་བདུན་པ། །དེ་ནས་ཚོང་དཔོན་གྱི་བུ་ནོར་བཟངས་མཚན་མོའི་ལྷ་མོ་རབ་ཏུ་དགའ་བའི་མིག་འགྲོ་བར་རྣམ་པར་སྣང་བའི་བྱང་ཆུབ་སེམས་དཔའ་རྣམ་པར་ཐར་པ་ཀུན་ཏུ་བཟང་པོའི་དགའ་བ་ཤིན་ཏུ་ཡངས་ཤིང་དྲི་མ་མེད་པའི་ཤུགས་ཀྱི་རྒྱལ་མཚན་དེ་ལ་མོས་པར་བྱ་བ་དང་། ཁོང་དུ་ཆུད་པར་བྱ་བ་དང་། རྟོགས་པར་བྱ་བ་དང་། ཤེས་པར་བྱ་བ་དང་། ཡིད་ཆེས་པར་བྱ་བ་དང་། རབ་ཏུ་གཞོལ་བར་བྱ་བ་དང་། རྒྱས་པར་དགང་བར་བྱ་བ་དང་། རྗེས་སུ་ཤེས་པར་བྱ་བ་དང་། རྗེས་སུ་དྲན་པར་བྱ་བ་དང་། རྗེས་སུ་གཞོལ་བར་བྱ་བ་དང་། བསྒོམ་པ་བྱེད་ཅིང་དགེ་བའི་བཤེས་གཉེན་གྱི་གདམས་ངག་ལ་ནན་ཏན་དུ་བྱ་བ་དང་། གདམས་ངག་རྗེས་སུ་བསྟན་པ་ལ་བར་ཆད་མེད་པར་བྱ་བའི་ཕྱིར་མཚན་མོའི་ལྷ་མོ་རབ་ཏུ་དགའ་བའི་མིག་འགྲོ་བར་རྣམ་པར་སྣང་བས། འགྲོ་ཁར་གདམས་པ་རྗེས་སུ་དྲན་པར་བྱེད་ཅིང་། དགེ་བའི་བཤེས་གཉེན་བལྟ་བའི་རྗེས་སུ་སེམས་པའི་དབང་པོའི་དཀྱིལ་འཁོར་དང་། དགེ་བའི་བཤེས་གཉེན་མཐོང་བ་ཐོབ་པར་བྱ་བ་ལ་ཡང་དག་པར་སྤྱོད་པ། ཕྱོགས་ཀུན་ཏུ་མངོན་པར་ལྟས་པ་དང་། དགེ་བའི་བཤེས་གཉེན་བཙལ་བར་ཡིད་ལ་བྱ་བ་དང་། ང་རྒྱལ་ཐམས་ཅད་དང་བྲལ་བ་དང་། དགེ་བའི་བཤེས་གཉེན་བསྙེན་བཀུར་བའི་མཐུ་ཚོགས་ཆེན་པོས་ཡོངས་སུ་བསྒྲུབ་པར་ཞེ་ནོན་པ་དང་།