ཆོས་ཀྱི་དབྱིངས་ཀུན་ཏུ་རྒྱས་པར་འགེངས་པས་དགེ་བའི་བཤེས་གཉེན་གྱི་དྲུང་དུ་འགྲོ་བས་མཚན་མོའི་ལྷ་མོ་རབ་ཏུ་དགའ་བའི་མིག་འགྲོ་བར་རྣམ་པར་སྣང་བ་གང་ན་བ་དེར་ཕྱིན་པ་དང་། དེས་མཚན་མོའི་ལྷ་མོ་རབ་ཏུ་དགའ་བའི་མིག་འགྲོ་བར་རྣམ་པར་སྣང་བ། བཅོམ་ལྡན་འདས་ཀྱི་འཁོར་གྱི་དཀྱིལ་འཁོར་ན་སེང་གེའི་ཁྲི་མེ་ཏོག་གི་སྙིང་པོ་ཅན་ལ་འདུག་ཅིང་། བྱང་ཆུབ་སེམས་དཔའི་ཏིང་ངེ་འཛིན་ཀུན་ཏུ་བཟང་པོའི་དགའ་བ་ཡངས་ཤིང་དྲི་མ་མེད་པའི་ཤུགས་ཀྱི་རྒྱལ་མཚན་ལ། མཉམ་པར་བཞག་པ་མཐོང་ངོ་། །དེའི་བ་སྤུའི་བུ་ག་ཐམས་ཅད་ནས་སྦྱིན་པ་ལ་སྩོགས་པའི་ཕ་རོལ་ཏུ་ཕྱིན་པའི་སྤྱོད་པ་མངོན་པར་སྟོན་པའི་སྤྲིན་སེམས་ཅན་ཐམས་ཅད། མངོན་པར་དགའ་བ། སེམས་ཅན་ཐམས་ཅད་ཀྱི་ཡིད་དུ་འོང་བ། སེམས་ཅན་ཐམས་ཅད་ཀྱིས་བལྟ་ན་ཉམས་སུ་བདེ་བ། སེམས་ཅན་ཐམས་ཅད་ཀྱིས་བལྟ་ན་སྡུག་པ་རྣམ་པ་སྣ་ཚོགས་འབྱུང་བ་ཡང་མཐོང་སྟེ། འདི་ལྟར་སེམས་ཅན་ཐམས་ཅད་ལ་ཕན་གདགས་ཤིང་རྩོད་པ་མེད་པར་བྱ་བ་དང་། དངོས་པོ་ཐམས་ཅད་ལ་ཕངས་པར་རྩི་བ་མེད་པར་བྱ་བ་དང་། སེམས་ཅན་ཐམས་ཅད་ལ་སྦྱོར་བ་མཚུངས་པས་ཡོངས་སུ་གཏང་བར་བྱ་བ་དང་། སེམས་ཅན་ཐམས་ཅད་ལ་མཉམ་པའི་སེམས་སུ་བྱ་བ་དང་། སེམས་ཅན་ཐམས་ཅད་ལ་བརྙས་པ་མེད་པར་ཡོངས་སུ་གཏང་བ་དང་། ནང་དང་ཕྱིའི་དངོས་པོ་ཐམས་ཅད་ཡོངས་སུ་གཏང་བ་དང་དགའ་བ་ཆེན་པོ་ཡོངས་སུ་གཏང་བར་བསྟན་པ་དང་། འཇིག་རྟེན་ཐམས་ཅད་དུ་སེམས་ཅན་གྱི་བསམ་པ་ཇི་བཞིན་གྱི་སྦྱིན་པའི་སྤྱོད་པ་ཡོངས་སུ་བསྟན་པར་བྱ་བའི་ཕྱིར། སེམས་ཅན་ཐམས་ཅད་ཀྱི་བསམ་པ་ཇི་ལྟ་བ་བཞིན་དུ་རྣམ་པར་དམིགས་པ་དང་མཐུན་པའི་སྒྲས་སྦྱིན་པའི་སྤྱོད་པ་ཡོངས་སུ་སྟོན་པའི་སྤྲིན་དང་། དུས་གསུམ་དུ་བྱུང་བའི་བྱང་ཆུབ་སེམས་དཔའ་རྣམས་གཏང་བར་དཀའ་བ་ཡོངས་སུ་གཏོང་བའི་སྤྲུལ་པ་བསམ་གྱིས་མི་ཁྱབ་པའི་སྤྲིན་འཐོན་ནས། ཕྱོགས་བཅུའི་འཇིག་རྟེན་གྱི་ཁམས་འབྱམ་ཀླས་པར་གཏོགས་པའི་སེམས་ཅན་ཐམས་ཅད་ཀྱིས་རྣམ་པར་དམྱིགས་པར་གྱུར་པ་མཐོང་ངོ་།