དགེ་བའི་བཤེས་གཉེན་མཐོང་བ་ཡིད་ལ་བྱེད་པ་མ་འཁྲུགས་པའི་སེམས་དང་ལྡན་པ། དགེ་བའི་བཤེས་གཉེན་བལྟ་བ་ལ་བསྒྲིབས་པའི་རི་ཐམས་ཅད་རྣམ་པར་གཏོར་བའི་གླགས་རྙེད་པའི་སེམས་དང་ལྡན་པ། དགེ་བའི་བཤེས་གཉེན་མཐོང་བ་ལ་སེམས་ཅན་གྱི་ཁམས་ཐམས་ཅད་ཡོངས་སུ་བསྐྱབ་པའི་སྙིང་རྗེ་ཆེན་པོའི་ཚུལ་རྒྱ་མཚོ་ལ་འཇུག་པ་ཐོབ་པའི་སེམས་དང་ལྡན་པ། དགེ་བའི་བཤེས་གཉེན་མཐོང་བ་ལ་ཆོས་ཀྱི་དབྱིངས་ཀྱི་ཚུལ་རྒྱ་མཚོའི་ཡེ་ཤེས་སྣང་བ་རབ་ཏུ་ཐོབ་པའི་སེམས་དང་ལྡན་པ་དེ། མཚན་མོའི་ལྷ་མོ་རབ་ཏུ་དགའ་བའི་མྱིག་འགྲོ་བར་རྣམ་པར་སྣང་བ་གང་ན་བ་དེར་སོང་ངོ་། །དེ་ནས་མཚན་མོའི་ལྷ་མོ་རབ་ཏུ་དགའ་བའི་མྱིག་འགྲོ་བར་རྣམ་པར་སྣང་བས། ཚོང་དཔོན་གྱི་བུ་ནོར་བཟངས་དེ་བས་ཀྱང་དགེ་བའི་བཤེས་གཉེན་གྱི་དྲུང་དུ་འགྲོ་བ་དགེ་བའི་རྩ་བའི་ཚོགས་ལས་བྱུང་བས་ཡོངས་སུ་སྨིན་པར་བྱ་བའི་ཕྱིར། དགེ་བའི་བཤེས་གཉེན་གྱི་དྲུང་དུ་འགྲོ་བ་ཚོགས་ཆེན་པོ་ལས་བྱུང་བར་བྱིན་གྱིས་བརླབས་སོ། །དགེ་བའི་བཤེས་གཉེན་གྱི་དྲུང་དུ་འགྲོ་བ་རྣམ་པར་གནོན་པ་ཆེན་པོར་བྱིན་གྱིས་བརླབས་སོ། །དགེ་བའི་བཤེས་གཉེན་གྱི་དྲུང་དུ་འགྲོ་བ་བརྩོན་འགྲུས་ཀྱི་ལས་འཇུག་པར་དཀའ་བར་བྱིན་གྱིས་བརླབས་སོ། །དགེ་བའི་བཤེས་གཉེན་གྱི་དྲུང་དུ་འགྲོ་བ་བསྡད་ཅིང་ཤིན་ཏུ་ལེགས་པར་བྱིན་གྱིས་བརླབས་སོ། །དགེ་བའི་བཤེས་གཉེན་གྱི་དྲུང་དུ་འགྲོ་བ་ཕྱོགས་མཐའ་དང་དབུས་མེད་པ་ལ་འཇུག་པར་བྱིན་གྱིས་བརླབས་སོ། །དགེ་བའི་བཤེས་གཉེན་གྱི་དྲུང་དུ་འགྲོ་བ་ཡུན་རིང་པོར་གནས་པས་བྱུང་བར་བྱིན་གྱིས་བརླབས་སོ། །དགེ་བའི་བཤེས་གཉེན་གྱི་དྲུང་དུ་འགྲོ་བ་དོན་མཐའ་ཡས་པ་ཡོངས་སུ་རྫོགས་པའི་རྣམ་པར་དམྱིགས་པ་འབྱུང་བར་བྱིན་གྱིས་བརླབས་སོ། དགེ་བའི་བཤེས་གཉེན་གྱི་དྲུང་དུ་འགྲོ་བ་ལམ་གྱི་རྒྱན་མཐའ་དང་དབུས་མེད་པའི་ཚོགས་ཀྱིས་ཡོངས་སུ་གནོན་པར་བྱིན་གྱིས་བརླབས་སོ། །དགེ་བའི་བཤེས་གཉེན་གྱི་དྲུང་དུ་འགྲོ་བ་སྒོ་ཀུན་ནས་རྣམ་པར་གནོན་པས་བྱུང་བར་བྱིན་གྱིས་བརླབས་སོ།