དེ་དག་འཇིགས་པ་མེད་པ་དང་། བདེ་བ་ལ་རབ་ཏུ་བཀོད་ནས། སེམས་ཀྱང་དགེ་བའི་རྩ་བ་འདིས་སེམས་ཅན་འཁོར་བའི་འབྲོག་དགོན་པ་ན་འཐོམས་པ་ངན་སོང་ཐམས་ཅད་ཀྱི་ལམ་དུ་ཞུགས་པ་རྣམས་སྡུག་བསྔལ་ཐམས་ཅད་ལས་ཡོངས་སུ་བཀྲོལ་ཏེ་ཤིན་ཏུ་ཕུན་སུམ་ཚོགས་པས། བདེ་བ་ཐམས་ཅད་མཁྱེན་པའི་ལམ་ལ་རབ་ཏུ་དགོད་པར་བྱ་བར་ཤོག་ཤིག་པར་བསྐྱེད་དེ། རིགས་ཀྱི་བུ་ཡུལ་དང་ལྗོངས་ལ་ཆགས་པའི་སེམས་ཅན་མངོན་པར་ཆགས་པའི་རྒྱུ་ལས་བྱུང་བའི་སྡུག་བསྔལ་ཉམས་སུ་མྱོང་བར་གྱུར་པ་རྣམས་ལའང་ཁོ་མོ་ནི་སྐྱོ་བར་བྱ་བའི་ཐབས་སྣ་ཚོགས་ཀྱིས་ཡུལ་ལ་མངོན་པར་ཆགས་པ་དེ་ལས་གྱེན་དུ་བསྐྱོད་པར་བྱེད་དེ་སེམས་ཀྱང་འདི་ལྟར་དགེ་བའི་རྩ་བ་འདིས་སེམས་ཅན་ཐམས་ཅད་ཕུང་པོ་ལ་མངོན་པར་ཆགས་པ་ལས་གྱེན་དུ་བསྐྱོད་དེ། གནས་མེད་པའི་ཐམས་ཅད་མཁྱེན་པའི་ཡེ་ཤེས་ལ་དགོད་པར་བྱ་བར་ཤོག་ཤིག་པར་བསྐྱེད་དོ། །རིགས་ཀྱི་བུ་ཁོ་མོ་ནི་གྲོང་ན་སྤྱོད་པའི་སེམས་ཅན་ཁྱིམ་དང་གནས་ཀྱི་འཆིང་བས་གླགས་པ་རྣམས་མཚན་མོ་མུན་པ་ཤིན་ཏུ་གནག་པས་ཆོད་པའི་ནང་ན་ཁྱིམ་གྱི་དོན་སྣ་ཚོགས་ཉམས་སུ་གནོད་པས། སྡུག་བསྔལ་བར་གྱུར་པ་རྣམས་ཀྱང་སྐྱོ་བར་འགྱུར་བའི་སྒོ་སྣ་ཚོགས་ཀྱིས་སྐྱོ་བར་བྱས་ཏེ། ཆགས་པ་མེད་པའི་སེམས་ཡོངས་སུ་བསྐྱེད་ནས། ཆོས་ཀྱི་སྦྱིན་པས་ཡོངས་སུ་བཟུང་སྟེ། ཚིམ་པར་བྱས་ནས་རྟེན་པ་མེད་པའི་ཆོས་ལ་བཀོད་དེ། སེམས་ཀྱང་འདི་ལྟར་དགེ་བའི་རྩ་བ་འདིས་སེམས་ཅན་སྐྱེ་མཆེད་དྲུག་གི་གྲོང་ལ་གནས་པ་རྣམས་འཁོར་བའི་ལམ་གྱི་རྒྱུད་ཀྱི་སྤྱོད་ཡུལ་ལས་གྱེན་དུ་བསྐྱོད་དེ། ཐམས་ཅད་མཁྱེན་པའི་ཡེ་ཤེས་ཀྱི་སྤྱོད་ཡུལ་ལ་དགོད་པར་བྱ་བར་ཤོག་ཤིག་པར་བསྐྱེད་དོ། །རིགས་ཀྱི་བུ་གང་ཡང་མཚན་མོ་མུན་པ་ཤིན་ཏུ་གནག་པའི་ནང་ན། ཤར་ཕྱོགས་ལ་སོགས་པའི་ཕྱོགས་དང་། ཕྱོགས་མཚམས་རེ་རེར་ཕྱོགས་བསླད་པར་གྱུར་པ།