དེ་ནས་ཚོང་དཔོན་གྱི་བུ་ནོར་བཟངས་ཀྱིས་ལྷ་ལྷ་ཆེན་པོའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། ལྷ་ལྷ་ཆེན་པོ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། ཡང་དང་ཡང་བལྟས་ཏེ། ལྷ་ལྷ་ཆེན་པོའི་དྲུང་ནས་སོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་མཐར་གྱིས་ཡུལ་མ་གདྷའི་སྙིང་པོ་བྱང་ཆུབ་ཏུ་སའི་ལྷ་མོ་བརྟན་མ་གང་ན་བ་དེར་སོང་བ་དང་དེ་འགྲོ་བའི་ཚེ་སའི་ལྷ་མོ་བརྒྱ་སྟོང་ཕྲག་བཅུ་གཅིག་ལ་གཅིག་འདི་སྐད་ཅེས་འཛེར་ཏོ། །སེམས་ཅན་ཐམས་ཅད་ཀྱི་རྟེན་དུ་འགྱུར་བ་ཞིག་ནི་འདི་ནས་ཚུར་འོང་ངོ་། །དེ་བཞིན་གཤེགས་པའི་སྙིང་པོ་ཅན་སེམས་ཅན་ཐམས་ཅད་ཀྱི་མ་རིག་པའི་སྒོ་ངའི་སྦུབས་འདྲ་ལ་བར་འགྱུར་བ་ཞིག་ནི་འདི་ནས་ཚུར་འོང་ངོ་། །ཆོས་ཀྱི་རྒྱལ་པོའི་རིགས་སུ་བྱུང་བ་ཆགས་པ་མེད་ཅིང་དྲི་མ་མེད་པའི་ཆོས་ཀྱི་རྒྱལ་པོའི་གོ་འཕང་དམ་པ་འཐོབ་པར་འགྱུར་བ་ཞིག་ནི་འདི་ནས་ཚུར་འོང་ངོ་། །ཡེ་ཤེས་ཀྱི་མཐུ་བོ་ཆེ་རྡོ་རྗེའི་མཚོན་ཆ་ཅན་དཔའ་བོ་ཕས་ཀྱི་རྒོལ་བའི་འཁོར་ཐམས་ཅད་རབ་ཏུ་འདུལ་བ་ཞིག་ནི་འདི་ནས་ཚུར་འོང་ངོ་ཞེས་ནས། དེའི་མོད་ལ་ལྷ་མོ་བརྟན་མ་ལ་སྩོགས་པ། སའི་ལྷ་མོ་བརྒྱ་སྟོང་ཕྲག་བཅུས་ས་ཆེན་པོ་རབ་ཏུ་བསྐྱོད་དེ། འབྲུག་སྒྲ་ཟབ་མོ་ལྟ་བུའི་སྒྲ་ཆེན་པོ་གྲག་པར་བྱས་ནས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འོད་ཆེན་པོས་སྣང་བར་བྱས་ཏེ། ལུས་རིན་པོ་ཆེའི་རྒྱན་དང་། ལྷབ་ལྷུབ་ཐམས་ཅད་ཀྱིས་ཤིན་ཏུ་བརྒྱན་ནས། གློག་གི་ཕྲེང་བའི་ཚོགས་ནམ་མཁའི་དབྱིངས་ལས་འགྱུ་ཞིང་སྣང་བ་ལྟ་བུ་ཤ་སྟག་དུ་བྱས་ཏེ། ཤིང་ཐམས་ཅད་ཀྱི་མྱུ་གུ་ནི་སྐྱེ་བར་བྱེད། མེ་ཏོག་གི་ཤིང་ཐམས་ཅད་ནི་ཁ་འབུ་བར་བྱེད། ཆུ་ཀླུང་གི་རྒྱུན་ཐམས་ཅད་ནི་འབབ་པར་བྱེད། མཚོ་དང་མཚེའུ་དང་ལུ་མ་ཐམས་ཅད་ནི་རྒྱས་པར་བྱེད། སྤོས་ཆུའི་ཆར་པ་ནི་རབ་ཏུ་འབབ་པར་བྱེད། མེ་ཏོག་གི་སྤྲིན་རབ་ཏུ་འཐོར་བའི་རླུང་ཆེན་པོ་ནི་ལྡང་བར་བྱེད། སིལ་སྙན་བྱེ་བ་ཁྲག་ཁྲིག་བརྒྱ་སྟོང་ནི་རབ་ཏུ་སྒྲ་སྒྲོག་པར་བྱེད།