འཕགས་པ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་བདག་ལ་བཀའ་སྩལ་དུ་གསོལ། སྨྲས་པ་རིགས་ཀྱི་བུ་ཁྱོད་ཀྱིས་དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། ཡེ་ཤེས་ཆེན་པོ་འཐོབ་པ་འབྱུང་བའི་རྒྱུ་འདྲི་བ་དང་། འཁོར་བའི་སྡུག་བསྔལ་སྣ་ཚོགས་ཀྱི་རྒྱུད་འགྱུར་བའི་རྒྱུ་དང་། ཐམས་ཅད་མཁྱེན་པ་ཉིད་ཀྱི་གླིང་གི་གནས་སུ་འགྲོ་བ་འབྱུང་བའི་རྒྱུ་དང་། དབྱེར་མེད་པའི་ཐེག་པ་ཆེན་པོ་འབྱུང་བའི་རྒྱུ་དང་། ཉན་ཐོས་དང་རང་སངས་རྒྱས་ཀྱི་སར་ལྟུང་བས་འཇིགས་པ་དང་འབྲལ་བར་འགྱུར་བའི་ལམ་གྱི་ནན་ཏན་འབྱུང་བའི་རྒྱུ་དང་། ཞི་བའི་ཏིང་ངེ་འཛིན་གྱི་སྒོ་དང་། རྒྱུད་སྣ་ཚོགས་ཁོང་དུ་ཆུད་པར་བྱ་བའི་ཡེ་ཤེས་ཀྱི་ལམ་འབྱུང་བའི་རྒྱུ་དང་། བྱང་ཆུབ་སེམས་དཔའི་སྤྱོད་པ་ཐམས་ཅད་དུ་འགྲོ་བས་རྣམ་པར་སྤྱོད་པའི་སྨོན་ལམ་གྱི་ཤིང་རྟའི་འཁོར་ལོ་ཐོགས་པ་མེད་པའི་ལམ་འབྱུང་བ་དང་། རྣམ་པར་དག་པར་འགྱུར་བའི་རྒྱུ་དང་། བྱང་ཆུབ་སེམས་དཔའི་སྤྱོད་པ་གཟི་བརྗིད་ཀྱི་དབའ་རླབས་ཀྱིས་རྣམ་པར་བརྒྱན་པ་ཐམས་ཅད་ཀྱི་རང་བཞིན་དང་། ཚུལ་གྱི་ལམ་འབྱུང་བ་དང་། རྣམ་པར་དག་པར་འགྱུར་བའི་རྒྱུ་དང་། ཆོས་ཀྱི་ཕྱོགས་དང་། སྒོ་ཐམས་ཅད་ཀྱི་ཕྱི་མའི་མཐའི་ལམ་འབྱུང་བ་དང་། རྣམ་པར་དག་པར་འགྱུར་བའི་རྒྱུ་དང་། ཐམས་ཅད་མཁྱེན་པའི་རྒྱ་མཚོར་འཇུག་པའི་ལམ་འབྱུང་བ་དང་། རྣམ་པར་དག་པར་འགྱུར་བའི་རྒྱུ་འདི་འདྲི་བ་ལེགས་སོ་ལེགས་སོ། །རིགས་ཀྱི་བུ་ཁོ་བོ་ནི་རྒྱ་མཚོའི་ངོགས་ཀྱི་གྲོང་ཁྱེར་ཁང་པ་བརྩེགས་པ་འདི་ན། བྱང་ཆུབ་སེམས་དཔའི་སྤྱོད་པ་སྙིང་རྗེ་ཆེན་པོའི་རྒྱལ་མཚན་ཡོངས་སུ་སྦྱོང་ཞིང་གནས་ཏེ། རིགས་ཀྱི་བུ་ཁོ་བོ་ནི་འཛམ་བུའི་གླིང་གི་སེམས་ཅན་ཕོངས་པ་རྣམས་མཐོང་ནས། དེ་དག་གི་དོན་དུ་དཀའ་བ་སྤྱོད་དེ། དེ་དག་གི་བསམ་པ་ཡོངས་སུ་རྫོགས་པར་བྱའོ། །འཇིག་རྟེན་གྱི་ཟང་ཟིང་གིས་ཡོངས་སུ་བསྡུ་བར་བྱའོ། །ཆོས་ཀྱི་ལོངས་སྤྱོད་ཀྱིས་དེ་དག་ཡོངས་སུ་ཚིམ་པར་བྱའོ། །དེ་དག་ལ་བསོད་ནམས་ཀྱི་ཚོགས་ཀྱི་ལམ་མན་ངག་དུ་བསྟན་པར་བྱའོ། །ཡེ་ཤེས་ཀྱི་ཚོགས་རྣམ་པར་སྤེལ་བར་བྱའོ།