དགེ་བའི་བཤེས་གཉེན་གྱི་ཚིག་ལ་ཐེ་ཙོམ་མི་ཟ་བའི་བྱང་ཆུབ་སེམས་དཔའ་ལ་ནི་དགེ་བའི་བཤེས་གཉེན་རྣམས་ཀྱང་ཉེ་བར་བསྙེན་པ་ཡིན། དགེ་བའི་བཤེས་གཉེན་ཡིད་ལ་བྱ་བ་དང་མི་འབྲལ་བའི་བྱང་ཆུབ་སེམས་དཔའ་ལ་ནི་དོན་ཐམས་ཅད་ཀྱང་མངོན་དུ་འགྱུར་བ་ཡིན་གྱིས། རིགས་ཀྱི་བུ་རྒྱལ་པོའི་ཕོ་བྲང་བརྟན་པར་དགེ་བསྙེན་མ་མི་གཡོ་བ་གང་ན་བ་དེར་སོང་ཤིག་དང་། དེ་ལས་བྱང་ཆུབ་སེམས་དཔའི་སྤྱོད་པ་ཐོས་པར་འགྱུར་རོ། །དེ་ནས་ཚོང་དཔོན་གྱི་བུ་ནོར་བཟངས་ཏིང་ངེ་འཛིན་གྱི་ཡེ་ཤེས་སྣང་བ་ལས་ལངས་ནས་མཐར་གྱིས་རྒྱལ་པོའི་ཕོ་བྲང་བརྟན་པར་དགེ་བསྙེན་མ་མི་གཡོ་བ་གང་ན་བ་དེར་སོང་ནས། དགེ་བསྙེན་མ་མི་གཡོ་བ་ཡོངས་སུ་ཚོལ་ཞིང་རྨེད་རྨེད་པ་ལས། དེ་ལ་འགྲོ་བ་མང་པོས་བསྟན་པ། རིགས་ཀྱི་བུ་དགེ་བསྙེན་མ་མི་གཡོ་བ་དེ་ནི་རང་གི་ཁྱིམ་ན་ཕ་མ་དང་། འགྲོགས་ཤིང་གཞོན་ནུར་གྱུར་པ་སྟེ། རང་གི་གཉེན་བཤེས་ཀྱི་ཚོགས་ཀྱིས་ཡོངས་སུ་བསྐོར་ཅིང་། སྐྱེ་བོའི་ཚོགས་ཆེན་པོ་ལ་ཆོས་སྟོན་ཏོ། །དེ་ནས་ཚོང་དཔོན་གྱི་བུ་ནོར་བཟངས་དགའ་བ་ཆེན་པོ་དང་། མོས་ཤིང་སྤྲོ་བས། ཡོངས་སུ་རྒྱས་པའི་སེམས་དང་ལྡན་པ་དེ་དགེ་བསྙེན་མ་མི་གཡོ་བའི་ཁྱིམ་གང་ན་བ་དེར་སོང་སྟེ་ཕྱིན་ནས། དགེ་བསྙེན་མ་མི་གཡོ་བའི་ཁྱིམ་གྱི་སྒོ་ན་སྡོད་པའི་ཚེ། དེས་ཁྱིམ་དེ་ཐམས་ཅད་འོད་ལུས་དང་སེམས་ཤིན་ཏུ་བདེ་བར་བྱེད་པ། གསེར་གྱི་ཁ་དོག་ཏུ་འདུག་པ་ཞིག་གིས་ཁྱབ་ཅིང་གསལ་བར་གྱུར་ནས། འོད་དེས་ཚོང་དཔོན་གྱི་བུ་ནོར་བཟངས་ལ་ཕོག་པར་གྱུར་མ་ཐག་ཏུ་ཚོར་བ་ཐམས་ཅད་ལ་དབང་བསྒྱུར་བའི་ཏིང་ངེ་འཛིན་གྱི་སྒོ་མང་པོ་དང་། ཞི་བའི་གནས་ཀྱི་ཏིང་ངེ་འཛིན་གྱི་སྒོ་མང་པོ་དང་། འགྲོ་བ་ཐམས་ཅད་དང་བྲལ་བའི་ཏིང་ངེ་འཛིན་གྱི་སྒོ་མང་པོ་དང་། ཀུན་ཏུ་ལྟ་བའི་བཏང་སྙོམས་དང་ལྡན་པའི་ཏིང་ངེ་འཛིན་གྱི་སྒོ་མང་པོ་དང་། དེ་བཞིན་གཤེགས་པའི་མཛོད་ཀྱི་ཏིང་ངེ་འཛིན་གྱི་སྒོ་མང་པོ་ལ་སྩོགས་པ། ཏིང་ངེ་འཛིན་གྱི་སྒོ་ལྔ་བརྒྱ་ཙམ་ལ་ཞུགས་པར་གྱུར་ཏེ། ཡོངས་སུ་སྐྱེས་སོ། །དེ་དག་ཀྱང་ཤིན་ཏུ་ཕྲ་ཞིང་གཞོན་པ་སྟེ། འདི་ལྟར་དཔེར་ན་ཐོག་མ་མངལ་དུ་ཞུགས་པའི་རྣམ་པར་ཤེས་པ་ལྟ་བུ་སྟེ། ཏིང་ངེ་འཛིན་དེ་དག་ཀྱང་ཤིན་ཏིུ་ཕྲ་ཞིང་གཞོན་པར་སྐྱེས་པར་གྱུར་ཏོ། །དེས་དྲི་ཞིམ་པོ་ཞིག་ཚོར་ནའང་དེ་ནི་ལྷ་ལའང་མེད་ལྷའི་བུ་མོ་ལ་ཡང་མེད།