ཆུས་གང་བ་གཞི་གསེར་གྱི་གྲམ་པས་གང་བ། ལྷ་རྫས་ཀྱི་ཨུཏྤ་ལ་དང་། པདྨོ་དང་། ཀུ་མུད་དང་། བུནྡ་རི་ཀས་ཀུན་ནས་ཡོག་པ། དུས་དང་འཐུན་པའི་ཙན་དན་གྱི་འདམ་དང་། ལུ་མས་འཁོར་བ་བདུན་གྱིས་ཀུན་ནས་ཡོངས་སུ་བསྐོར་བ། རིན་པོ་ཆེ་སྣ་བདུན་གྱི་ཏ་ལའི་ཕྲེང་བ་རིམ་པ་བདུན་གྱིས་ཀུན་ནས་ཡོངས་སུ་བསྐོར་བ། རྡོ་རྗེ་རིན་པོ་ཆེའི་ར་བ་བདུན་གྱིས་ཀུན་ནས་ཡོངས་སུ་བསྐོར་བ། འདི་ལྟ་སྟེ། སེང་གེ་ཡིད་དུ་འོང་བའི་རྡོ་རྗེའི་ར་བ་དང་། རྡོ་རྗེ་གཞན་གྱིས་ཐུབ་པ་མེད་པའི་ར་བ་དང་། འབུག་པའི་ངང་ཚུལ་གྱི་རྡོ་རྗེའི་ར་བ་དང་། ཐུབ་པར་དཀའ་བའི་ངང་ཚུལ་གྱི་རྡོ་རྗེའི་ར་བ་དང་། རྡོ་རྗེ་བརྟན་པ་ཆགས་པ་མེད་པའི་ར་བ་དང་། རྡོ་རྗེའི་འོད་གཟེར་དྲ་བའི་སྙིང་པོའི་ར་བ་དང་། རྡུལ་དང་བྲལ་བའི་ཁ་དོག་གི་རྒྱན་གྱི་རྡོ་རྗེའི་ར་བས་ཡོངས་སུ་བསྐོར་བ་སྟེ། རྡོ་རྗེ་རིན་པོ་ཆེའི་ར་བ་དེ་དག་ཐམས་ཅད་ཀྱང་། ནོར་བུ་རིན་པོ་ཆེ་གྲངས་མེད་པས་ཡོངས་སུ་སྤྲས་པ། འཛམ་བུ་ཆུ་ཀླུང་གི་གསེར་གྱི་ལན་ཀན་དང་། བ་སོ་མཛེས་པར་བཀྱེ་བ་དངུལ་རིན་པོ་ཆེའི་བ་སོ་ཕྲེང་བ་མཛེས་པས་བརྒྱན་པ། རིན་པོ་བཻཌཱུཪྻའི་བ་སོའི་ཕྲེང་བ་མཛེས་པས་བརྒྱན་པ། རིན་པོ་ཆེ་ཤེལ་གྱི་བ་སོའི་ཕྲེང་བ་མཛེས་པས་བརྒྱན་པ། རིན་པོ་ཆེ་བྱི་རུའི་བ་སོའི་ཕྲེང་བ་མཛེས་པས་བརྒྱན་པ། མུ་ཏིག་དམར་པོའི་བ་སོའི་ཕྲེང་བ་མཛེས་པས་བརྒྱན་པ། མུ་ཏིག་རིན་པོ་ཆེ་རྒྱ་མཚོའི་སྙིང་པོའི་བ་སོའི་ཕྲེང་བ་མཛེས་པས་བརྒྱན་པ་སྟེ། གྲོང་ཁྱེར་ཆེན་པོ་དེའི་སྒོ་ཆེན་པོ་བརྒྱད་ཀྱི་བར་བར་ན་ཡང་དཔག་ཚད་བཅུ་བཅུ་ཡོད་དོ། །སྒོ་དེ་དག་ཀྱང་རིན་པོ་ཆེ་སྣ་བདུན་ལས་སྣ་ཚོགས་མཛེས་པར་བྱས་པ་སྟེ། བལྟ་ན་ཡིད་དུ་འོང་བའོ། །གྲོང་ཁྱེར་ཆེན་པོ་དེ་ནི་དེ་ལྟར་རྒྱ་ཆེ་ཞིང་ཡངས་ལ་ཡན་ལག་རྣམ་པར་བརྒྱད་དུ་རྣམ་པར་ཕྱེ་བ། བཻཌཱུརྱ་སྔོན་པོའི་ས་ལ་གནས་པ་སྟེ། གྲོང་ཁྱེར་ཆེན་པོ་དེའི་ནང་ན་ཡང་སྲང་ཆེན་པོ་བྱེ་བ་ཕྲག་བཅུ་ཡོད་དེ། སྲང་རེ་རེའི་གློ་གཉིས་ནས་ཀྱང་ཁྱིམ་ཆེན་པོ་བརྒྱ་ཕྲག་སྟོང་སྟོང་མཁོས་ལེགས་པར་འགྲིགས་པ་སྟེ། ཀུན་ཀྱང་རིན་པོ་ཆེ་སྣ་ཚོགས་ལས་བྱས་པ་དག་གོ །རིན་པོ་ཆེའི་རྒྱན་སྣ་ཚོགས་ཀྱིས་རབ་ཏུ་བརྒྱན་པ་དག་གོ