རྒྱལ་པོ་མེ་གང་ན་བ་དེར་སོང་སྟེ་ཕྱིན་ནས། རྒྱལ་པོ་མེའི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། རྒྱལ་པོ་མེ་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་མདུན་དུ་འདུག་སྟེ། ཐལ་མོ་སྦྱར་ནས་འདི་སྐད་ཅེས་སྨྲས་སོ། །འཕགས་པ་བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་མ་འཚལ་ཏེ། འཕགས་པ་ནི་བྱང་ཆུབ་སེམས་དཔའ་རྣམས་ལ་གདམས་ངག་དང་རྗེས་སུ་བསྟན་པ་མཛད་དོ་ཞེས་བདག་གིས་ཐོས་ན། འཕགས་པ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་བདག་ལ་བཀའ་སྩལ་དུ་གསོལ། དེ་ནས་རྒྱལ་པོ་མྱེས་རྒྱལ་པོའི་བྱ་བ་བྱས་ཏེ། སེང་གེའི་ཁྲི་ལས་ལངས་ནས་ཚོང་དཔོན་གྱི་བུ་ནོར་བཟངས་ཀྱི་ལག་པ་གཡས་པ་ནས་བཟུང་སྟེ། རྒྱལ་པོའི་ཕོ་བྲང་ཏ་ལའི་རྒྱལ་མཚན་དུ་ཁྲིད་དོ། །དེ་མཐར་གྱིས་རང་གི་གནས་སུ་ཕྱིན་ནས། ཚོང་དཔོན་གྱི་བུ་ནོར་བཟངས་བཙུན་མོའི་འཁོར་གྱི་ནང་དུ་ཁྲིད་དེ་ཁྲི་ལ་བཞག་ནས་འདི་སྐད་ཅེས་སྨྲས་སོ། །རིགས་ཀྱི་བུ་ངའི་ཁྱིམ་དང་ལོངས་སྤྱོད་ལ་ལྟོས་ཤེས་ནས། དེས་བལྟས་ན་ཁྱིམ་དེ་རྒྱ་ཆེ་ཞིང་ཡངས་ལ་རིན་པོ་ཆེ་བདུན་གྱི་ར་བས་ཡོངས་སུ་བསྐོར་བ། ནོར་བུ་རིན་པོ་ཆེ་སྣ་ཚོགས་ཀྱི་ཁང་པས་ཤིན་ཏུ་མཛེས་པར་བྱས་པ། རིན་པོ་ཆེའི་ཁང་པ་བརྩེགས་པ་བརྒྱ་སྟོང་དུ་མས་རབ་ཏུ་བརྒྱན་པ། ནོར་བུ་རིན་པོ་ཆེ་བསམ་གྱིས་མི་ཁྱབ་པའི་འོད་ཤིན་ཏུ་འབར་བས་གཟི་བརྗིད་རབ་ཏུ་འབར་བར་བྱས་པ། ནོར་བུ་རིན་པོ་ཆེ་སྣ་ཚོགས་ཀྱིས་རྣམ་པ་ཐ་དད་པ་རྣམ་པར་ཕྱེ་ཞིང་བྲིས་པས་རྣམ་པར་མཛེས་པར་བྱས་པ། མུ་ཏིག་དམར་པོའི་ཀ་བ་བཀྱེ་བ། ནང་དུ་སེང་གེའི་ཁྲི་མུ་སར་གལ་བ་ལས་བྱས་པ། རིན་པོ་ཆེ་བརྒྱ་སྟོང་དུ་མས་རྣམ་པ་སྣ་ཚོགས་སུ་བརྒྱན་པ། ཤིན་ཏུ་བཤམས་པ། ནོར་བུ་རིན་པོ་ཆེའི་སྒྲ་སྣང་བའི་སེང་གེའི་རྒྱལ་མཚན་ཤིན་ཏུ་བསྒྲེང་བ། སྟེང་ནས་ནོར་བུ་རིན་པོ་ཆེ་རྣམ་པར་སྣང་བའི་བླ་རེ་བྲེས་པ། ཡིད་བཞིན་གྱི་ནོར་བུ་རིན་པོ་ཆེ་སྣ་ཚོགས་ཀྱི་དྲ་བས་ཀུན་ནས་ཡོག་པ།