མྱིག་དཀར་ནག་འབྱེས་ཤིང་རིང་ལ། རྫི་མ་བའི་རྫི་མ་ལྟར་འདུག་པ། སྣའི་དབྱིབས་ལེགས་ཤིང་བཟང་ལ་རན་པར་མཛེས་པ་དང་ལྡན་པ། མཆུ་མཚལ་ལྟར་མདོག་བཟང་ཞིང་ཤིན་ཏུ་ལེགས་པ་དང་ལྡན་པ། སོ་མཉམ་ཞིང་ཐགས་བཟང་ལ་ཤིན་ཏུ་དཀར་བ་བཞི་བཅུ་ཚང་བ་དང་ལྡན་པ། འགྲམ་པའི་ལྷ་ང་སེང་གེའི་འགྲམ་པ་ལྟར་འདུག་པ་ཁུར་བ་ཤས་རྒྱས་པ། སྨིན་ཚུགས་གཞུ་ལྟར་འདུག་ཅིང་རིང་ལ་ཤིན་ཏུ་མཛེས་པ། མཛོད་སྤུ་ཟླ་བའི་ཁ་དོག་ལྟར་འདུག་པའི་ཐིག་ལེ་ཅན། རྣ་བའི་ཤལ་རིང་ཞིང་ལྷོད་པར་འཕྱང་བ། ཟླ་བ་ཉ་བ་ལྟར་བཞིན་མདངས་དང་ལྡན་ཞིང་ཤིན་ཏུ་བཟང་བ། མགུལ་ཟླུམ་ཞིང་དུང་ལྟར་མཛེས་པ། སྙིང་ཀ་དཔལ་གྱི་བེ་འུས་བརྒྱན་པ། རོ་སྟོད་སེང་གེའི་རོ་སྟོད་ལྟར་འདུག་པ། ཐལ་གོང་ཤིན་ཏུ་རྒྱས་ལ། དཔུང་མགོའི་ལྷུན་ལེགས་ཤིང་ཟླུམ་པ། ལག་པ་རིང་བ་དྲ་བར་འབྲེལ་བའི་སོར་མོ་ཅན། རྐང་ལག་འཁོར་ལོས་བརྒྱན་པ། རྐང་ལག་འཇམ་ཞིང་གཞོན་ལ་ཤས་རྒྱས་པ། བདུན་ཤིན་ཏུ་མཐོ་བ། རྐེད་པ་རྡོ་རྗེ་ལྟར་འདུག་པ། ལུས་ཆེ་ཞིང་དྲང་བ། བརླ་ཟླུམ་པ། ཕོ་མཚན་གསང་བའི་སྦུབས་ན་འདུག་པ། བྱིན་པ་རི་དགས་ཨེ་ནེ་ཡའི་བྱིན་པ་ལྟར་འདུག་པ། སོར་མོ་རིང་བ། རྐང་པའི་རྟིང་བ་ཡངས་པ། འོད་འདོམ་གང་བ་དང་ལྡན་པ་མདོག་གསེར་གྱི་ཁ་དོག་ལྟར་འདུག་པ། བ་སྤུ་རེ་རེ་ནས་གཡས་ཕྱོགས་སུ་གྱེན་དུ་འཁྱིལ་བ། ཤིང་ནྱ་གྲོ་དའི་རྒྱལ་པོ་ལྟར་ཆུ་ཞེང་གབ་པ། ལུས་མཚན་དང་དཔེ་བྱད་བཟང་པོས་ཤིན་ཏུ་བརྒྱན་པ། མགོ་ལ་ནོར་བུ་རིན་པོ་ཆེ་ཡིད་བཞིན་གྱི་ཅོད་པན་ཐོགས་པ། འཛམ་བུ་ཆུ་ཀླུང་གི་གསེར་ལས་བྱས་པའི་འབྲལ་བའི་རྒྱན་ཟླ་གམ་གྱིས་མཛེས་པར་བརྒྱན་པ། རྣ་བ་ལས་རིན་པོ་ཆེ་ཨིན་དྲ་ནཱི་ལའི་རྣ་ཆ་དྲི་མ་མེད་པ་འཕྱང་བ། ནོར་བུ་རིན་པོ་ཆེ་རིན་ཐང་མྱེད་པའི་སེ་མོ་དེའི་འོད་ཀྱིས་སྣང་བར་བྱས་པས། དྲི་མ་མྱེད་པའི་རོ་སྟོད་རྒྱས་པ་དང་ལྡན་པ། ལྷ་རྫས་ཀྱི་ནོར་བུ་དམ་པའི་དཔུང་རྒྱན་དང་། གདུ་བུས་ལག་པ་མཛེས་པར་བརྒྱན་པ་ཞིག་སྟེ། རིན་པོ་ཆེའི་གདུགས་ཆེན་པོ་རིན་པོ་ཆེ་བཻཌཱུརྱ་དྲི་མ་མྱེད་པའི་ཡུ་བ་ཅན།