།རིགས་ཀྱི་བུ་ཁོ་བོས་ནི་བྱང་ཆུབ་སེམས་དཔའི་རྣམ་པར་ཐར་བ་སྨོན་ལམ་གྱི་དཀྱིལ་འཁོར་ཐོགས་པ་མྱེད་པའི་རྒྱན་ཅེས་བྱ་བ་འདི་ཤེས་པར་ཟད་ན། ཁོ་བོས་བྱང་ཆུབ་སེམས་དཔའ་ཡོན་ཏན་རིན་པོ་ཆེ་ཚད་མྱེད་པའི་འབྱུང་གནས་སུ་གྱུར་པ། སངས་རྒྱས་ཀྱི་སྐུ་རྒྱ་མཚོ་དང་། ཐ་མྱི་དད་པ་ལ་ཞུགས་པ། ཐ་མྱི་དད་པའི་ཆོས་ཀྱི་སྤྲིན་གྱི་ཆར་ཡང་དག་པར་འཛིན་པ། ཐ་མྱི་དད་པའི་ཡོན་ཏན་རྒྱ་མཚོ་ལ་ཞུགས་པ། ཀུན་ཏུ་བཟང་པོའི་སྤྱོད་པའི་དྲ་བ་རྣམ་པར་རྒྱས་པར་གྱུར་པ། ཏིང་ངེ་འཛིན་ཐ་མྱི་དད་པའི་ཡུལ་ལ་ཞུགས་པ་བྱང་ཆུབ་སེམས་དཔའ་ཐམས་ཅད་ཐ་མྱི་དད་པས་དགེ་བའི་རྩ་བ་རྒྱུན་གཅིག་ཏུ་གྱུར་པ། དེ་བཞིན་གཤེགས་པ་ཐམས་ཅད་དང་ཐ་མྱི་དད་ཅིང་རྣམ་པར་མྱི་རྟོག་པར་སྤྱོད་པ། དུས་གསུམ་ཐ་མྱི་དད་པས་མཉམ་པ་ཉིད་ལ་ཞུགས་པ། བསྐལ་པ་ཐམས་ཅད་ཐ་མྱི་དད་པར་ཡོངས་སུ་གནས་པས་མྱི་སྐྱོ་བ། ཀུན་ཏུ་ལྟ་བ་ཐ་མྱི་དད་པའི་ཡུལ་གྱི་ས་ལ་གནས་པ་དེ་དག་གི་སྤྱོད་པ་ཤེས་པའམ། ཡོན་ཏན་བརྗོད་པར་ནུས་རེ་སྐན། །སོང་རིགས་ཀྱི་བུ་ལྷོ་ཕྱོགས་ཀྱི་རྒྱུད་འདི་ཉིད་ན་ཡུལ་སྦའི་རྩ་བ་ཞེས་བ་བ་ཡོད་དེ། དེའི་གྲོང་ཁྱེར་ཀུན་ནས་སྒོ་ཞེས་བྱ་བ་ན། ཚོང་དཔོན་སྤོས་འཚོང་ཀུན་ཏུ་ལྟ་བ་ཞེས་བྱ་བ་འདུག་གིས། དེའི་གན་དུ་སོང་ལ་ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བྱ་བ་དང་། ཇི་ལྟར་ནན་ཏན་དུ་བྱ་བ་དྲིས་ཤིག །དེ་ནས་ཚོང་དཔོན་གྱི་བུ་ནོར་བཟངས་ཀྱིས་ཆོས་ཀྱི་ཚོང་དཔོན་རིན་ཆེན་གཙུག་ཕུད་ཀྱི་རྐང་པ་གཉིས་ལ་སྤྱི་བོས་ཕྱག་འཚལ་ཏེ། ཆོས་ཀྱི་ཚོང་དཔོན་རིན་ཆེན་གཙུག་ཕུད་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས་ཡང་དང་ཡང་བལྟས་ཏེ། ཆོས་ཀྱི་ཚོང་དཔོན་རིན་ཆེན་གཙུག་ཕུད་ཀྱི་དྲུང་ནས་སོང་ངོ་།། །།སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་ཆེན་པོའི་མདོ། །བམ་པོ་གཉིས་པ། དེ་ནས་ཚོང་དཔོན་གྱི་བུ་ནོར་བཟངས་སངས་རྒྱས་མཐའ་ཡས་པ་མཐོང་བ་ལ་ཞུགས་པ། བྱང་ཆུབ་སེམས་དཔའ་མཐའ་ཡས་པ་དང་འགྲོགས་པ་རབ་ཏུ་ཐོབ་པ། བྱང་ཆུབ་སེམས་དཔའི་ལམ་མཐའ་ཡས་པའི་ཚུལ་གྱིས་སྣང་བར་གྱུར་བ།