ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་འགྲོ་བ་ཐམས་ཅད་མོས་པར་བྱེད་ཅིང་རྗེས་སུ་འབྲང་བའི་དཀྱིལ་འཁོར་ཞེས་བྱ་བ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཕྱི་བཞིན་འབྲང་བའི་ཚུལ་གྱི་དཀྱིལ་འཁོར་ཞེས་བྱ་བ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་རྒྱ་མཚོའི་སྙིང་པོ་ཞེས་བྱ་བ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཀུན་ཏུ་ལྟ་བའི་བཏང་སྙོམས་ཐོབ་པ་ཞེས་བྱ་བ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་མི་ཟད་པའི་མཛོད་དང་ལྡན་པ་ཞེས་བྱ་བ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཆོས་ཐམས་ཅད་ཀྱི་ཚུལ་རྒྱ་མཚོ་ཞེས་བྱ་བ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་འགྲོ་བ་རྒྱ་མཚོའི་རྗེས་སུ་སོང་བ་ཞེས་བྱ་བ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཐོགས་པ་མྱེད་པའི་སྤོབས་པ་ཞེས་བྱ་བ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཆོས་ཀྱི་སྤྲིན་ལ་དམྱིགས་པས་རིམ་པས་མྱི་དམྱིགས་པའི་གནས་ཤེས་བྱ་བ་དང་། དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་དེ་དག་ལ་སྩོགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་གྲངས་མྱེད་པ་བརྒྱ་སྟོང་ཕྲག་བཅུ་ཚང་བར་ཡང་དག་པར་བགྲོ་བ་བྱེད་ཅིང་། རྒྱན་བརྗོད་དུ་མྱེད་པ་ཤིན་ཏུ་རྣམ་པར་ཕྱེ་བའི་འཁོར་གྱི་དཀྱིལ་འཁོར་ན་འཁོད་པ་མཐོང་བར་གྱུར་ཏོ། །རིམ་ཁང་བདུན་པའི་ནང་ན་བྱང་ཆུབ་སེམས་དཔའ་སྒྲ་བརྙན་ལྟ་བུའི་བཟོད་པ་རབ་ཏུ་ཐོབ་པ་ཐབས་དང་ཡེ་ཤེས་རྣམ་པར་གདོན་མི་ཟ་བ་ལ་ཤིན་ཏུ་བྱུང་བ། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་སྤྲིན་ཡང་དག་པར་འཛིན་པ་ཤ་སྟག་འདུས་ཤིང་འཁོད་པ་མཐོང་ངོ་། །རིམ་ཁང་བརྒྱད་པའི་ནང་ན་བྱང་ཆུབ་སེམས་དཔའ་མ་ཉམས་པར་འགྲོ་བའི་མངོན་པར་ཤེས་པ་རབ་ཏུ་ཐོབ་པ། འཇིག་རྟེན་གྱི་ཁམས་ཐམས་ཅད་དུ་རྣམ་པར་རྒྱུ་བ། འཁོར་གྱི་དཀྱིལ་འཁོར་ཐམས་ཅད་དུ་གཟུགས་བརྙན་རབ་ཏུ་འབྱུང་བ། ཆོས་ཀྱི་དབྱིངས་ཐམས་ཅད་དུ་ལུས་ཤིན་ཏུ་རྣམ་པར་ཕྱེ་བ། དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་ནས་གུད་དུ་མི་འཕགས་པའི་ཡུལ་དང་ལྡན་པ། སངས་རྒྱས་ཐམས་ཅད་ཀྱི་སྐུ་ལ་ཡང་དག་པར་གཞོལ་བ། དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་དུ་སྔོན་དུ་བརྗོད་པའི་གཏམ་གྱི་སྐྱེས་བུར་གྱུར་པ་ཤ་སྟག་ཀུན་ནས་འདུས་ཤིང་འཁོད་པ་མཐོང་ངོ་།