གཡས་ཕྱོགས་སུ་བསྐོར་བ་བྱས་ནས། མདུན་དུ་འདུག་སྟེ་ཐལ་མོ་སྦྱར་ནས་འདི་སྐད་ཅེས་སྨྲས་སོ། །འཕགས་པ་བདག་གིས་བླ་ན་མྱེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། ཇི་ལྟར་བྱང་ཆུབ་སེམས་དཔས་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་མ་འཚལ་ན། འཕགས་པ་ལམ་གང་གིས་བདག་ཐམས་ཅད་མཁྱེན་པ་ཉིད་དུ་འབྱུང་བར་འགྱུར་བ་དེ་ལྟ་བུའི་བྱང་ཆུབ་སེམས་དཔའི་ལམ་གྱི་མ་ན་ངག་ལེགས་པར་མྱི་སྩལ་ཏམ། དེ་ནས་ཆོས་ཀྱི་ཚོང་དཔོན་རིན་ཆེན་གཙུག་ཕུད་ཀྱིས་ཚོང་དཔོན་གྱི་བུ་ནོར་བཟངས་ཀྱི་ལག་པ་ནས་བཟུང་སྟེ། རང་གི་ཁྱིམ་གང་ན་བ་དེར་ཁྲིད་དེ་ཁྱིམ་དེ་བསྟན་ནས་འདི་སྐད་ཅེས་སྨྲས་སོ། །རིགས་ཀྱི་བུ་ཁོ་བོའི་ཁྱིམ་ལ་ལྟོས་ཤིག་ཅེས་ནས། དེས་བལྟས་ན་ཁྱིམ་དེ་དག་ཅིང་འོད་གསལ་བ་འཛམ་བུ་ཆུ་ཀླུང་གི་གསེར་ལས་བྱས་པ་སྟེ། ཡངས་ཤིང་མཐོ་ལ་དངུལ་གྱི་ར་བས་བསྐོར་བ། ཤེལ་གྱི་རྩིག་པས་ཤིན་ཏུ་ལེགས་པར་བརྩིགས་ཏེ། མཛེས་པར་བྱས་བ། བཻ་ཌཱུརྱའི་ཕུང་པོ་བརྒྱ་ཕྲག་སྟོང་གིས་རབ་ཏུ་བརྒྱན་པ། མུས་རག་ལ་པའི་ཀ་བ་བཀྱེ་བ། མུ་ཏིག་དམར་པོ་ལས་བྱས་པའི་སེང་གེའི་ཁྲི་ཤིན་ཏུ་བཤམས་པ། ནོར་བུ་རིན་པོ་ཆེ་རང་བཞིན་སྣང་བའི་སེང་གེའི་རྒྱལ་མཚན་བསྒྲེང་བ། ནོར་བུ་རིན་པོ་ཆེ་རྣམ་པར་སྣང་བའི་བླ་རེ་བྲེས་པ། གསེར་གྱི་དྲ་བ་ཡིད་བཞིན་གྱི་ནོར་བུས་བརྒྱན་པས་ཀུན་ནས་ཡོག་པ། ནོར་བུ་རིན་པོ་ཆེ་སྣ་ཚོགས་གྲངས་མྱེད་པས་རབ་ཏུ་བརྒྱན་པ། ཨ་སྨ་གར་བྷ་ལས་བརྩིགས་པའི་རྫིང་བུ་ཆུ་བསིལ་བས་གང་བ་དང་ལྡན་པ། རིན་པོ་ཆེ་ཐམས་ཅད་ཀྱི་ཤིང་གིས་བསྐོར་བ། རྒྱ་ཆེ་ཞིང་ཡངས་པ་རིམ་པ་བཅུར་བརྩེགས་པ། ཤིན་ཏུ་མཐོ་བ། སྒོ་བརྒྱད་དང་ལྡན་པར་འདུག་པ་མཐོང་ནས། དེས་ཁྱིམ་དེའི་ནང་དུ་ཕྱིན་ཏེ། ཀུན་ཏུ་བལྟས་ན་རིམ་ཁང་ཐ་མའི་ནང་ན་བཟའ་བ་དང་བཏུང་བའི་རྣམ་པ་ཡོངས་སུ་གཏོང་བ་མཐོང་ངོ་། རིམ་ཁང་གཉིས་པའི་ནང་ན་གོས་ཀྱི་རྣམ་པ་ཐམས་ཅད་ཡོངས་སུ་གཏོང་བ་མཐོང་ངོ་།