ཆོས་ཀྱི་དཀྱིལ་འཁོར་རྣམ་པར་དག་པའི་བློ་གྲོས་ལ་རྟེན་པ། ཐམས་ཅད་དུ་རྗེས་སུ་སོང་པའི་རིག་པ་རྣམ་པར་ཕྱེ་བས་འབྱུང་བ་བསྟན་པ་ལ་བརྩོན་པ། དུས་གསུམ་གྱི་དབྱིངས་སུ་མ་འདྲེས་པའི་སངས་རྒྱས་ཀྱི་ཡུལ་དང་ལྡན་པ། བསོད་ནམས་མི་ཟད་པའི་རྒྱ་མཚོ་ལས་བྱུང་བའི་སེམས་དང་ལྡན་པ། ཡེ་ཤེས་ཀྱི་སྣང་བ་ཆེན་པོ་ལ་དབང་བསྒྱུར་བ། ཁམས་གསུམ་གྱི་ཁྱིམ་དུ་སྡུད་པའི་སྒོ་ཤིན་ཏུ་གཅོད་པ་དེས། ཁྱེའུ་དབང་པོའི་དབང་ཕྱུག་གི་རྐང་པ་གཉིས་ལ་སྤྱི་བོས་ཕྱག་འཚལ་ནས། ཁྱེའུ་དབང་པོའི་དབང་ཕྱུག་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ནས། ཡང་དང་ཡང་བལྟས་ཏེ། ཁྱེའུ་དབང་པོའི་དབང་ཕྱུག་གི་དྲུང་ནས་སོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་དགེ་བའི་བཤེས་གཉེན་གྱི་གདམས་ངག་གི་སྤྲིན་གྱི་ཆར་ཡོངས་སུ་འཛིན་པ་བྱེད་ཅིང་། གང་ཆེན་མཚོ་ལྟར་སྤྲིན་ཆེན་པོའི་ཆར་གྱིས་ངོམས་མྱི་ཤེས་པ་དགེ་བའི་བཤེས་གཉེན་གྱི་ཉི་མའི་ཡེ་ཤེས་ཀྱི་འོད་གཟེར་གྱིས་དགེ་བ་ཡོངས་སུ་སྨིན་པར་བྱས་པའི་ས་གཞི་ལས་དབང་པོའི་མྱུ་གུ་འཐོན་ཅིང་སྐྱེས་བ། དགེ་བའི་བཤེས་གཉེན་གྱི་ཟླ་བ་ཉ་ཞིང་རྒྱས་པའི་གདམས་ངག་གི་འོད་གཟེར་གྱི་དྲ་བས་ལུས་དང་། སེམས་ཤིན་ཏུ་ཚིམ་པར་བྱས་བ། །དཔྱིད་ཀྱི་ཉི་མའི་འོད་ཀྱིས་གདུངས་པའི་རི་དགས་ཀྱི་ཚོགས་གསལ་ཞིང་བསིལ་བའི་གངས་ཆུ་ལ་འཐུང་བར་འདོད་པ་ལྟར། དགེ་བའི་བཤེས་གཉེན་གྱི་གདམས་ངག་གི་ཆུ་ལ་འཐུང་བར་འདོད་པ། བུང་བ་མང་པོ་འཁོར་ཞིང་ལྡིང་བས་རྒྱས་པར་གྱུར་པའི་པད་མོ་དང་ལྡན་པའི་པདྨོའི་མཚོ་ལྟར་དགེ་བའི་བཤེས་གཉེན་གྱི་གདམས་ངག་གིས་སེམས་ཀྱི་མེ་ཏོག་བུན་ད་རི་ཀ་ཁ་ཕྱེ་བ། རིན་པོ་ཆེ་སྣ་ཚོགས་ཀྱིས་ཡོངས་སུ་རྒྱས་པའི་རིན་པོ་ཆེའི་གླིང་ལྟར་དགེ་བའི་བཤེས་གཉེན་གྱི་གདམས་ངག་རིན་པོ་ཆེ་འཕེལ་བའི་སྣང་བས་སེམས་ཤིན་ཏུ་སྣང་བར་བྱས་བ། འཛམ་བུའི་ཤིང་ཆེན་པོའི་མེ་ཏོག་དང་། འབྲས་བུའི་ཚོགས་ཆེན་པོ་དང་ལྡན་པ་ལྟར་དགེ་བའི་བཤེས་གཉེན་གྱི་གདམས་ངག་བསོད་ནམས་དང་ཡེ་ཤེས་ཀྱི་ཚོགས་སུ་གྱུར་པ། །ཕུན་སུམ་ཚོགས་པ་དང་ལྡན་པ། ཀླུའི་དབང་པོ་ཆེན་པོ་རྩེད་མོ་དམ་པས་རྩེ་བ་ལས་བྱུང་བའི་ནམ་མཁའི་སྤྲིན་ཆེན་པོ་ལྟར་དགེ་བའི་བཤེས་གཉེན་གྱི་གདམས་ངག་ཐོས་པའི་ཚོགས་སུ་གྱུར་པའི་རྣང་ཤིན་ཏུ་ཆེ་བ།