།ཁོ་བོས་དེ་བཞིན་གཤེགས་པ་དེ་དག་ཐམས་ཅད་ཀྱི་སྔོན་གྱི་སྨོན་ལམ་རྣམས་ཀྱང་སྨོན་ལམ་གྱི་དཀྱིལ་འཁོར་གྱི་ཏིང་ངེ་འཛིན་མངོན་པར་བསྒྲུབ་པའི་སྟོབས་ཀྱིས་རང་གི་སངས་རྒྱས་ཀྱི་ཞིང་ཡོངས་སུ་དག་པར་བྱ་བའི་ཕྱིར་མངོན་པར་བསྒྲུབས་སོ། །ཁོ་བོས་དེ་བཞིན་གཤེགས་པ་དེ་དག་ཐམས་ཅད་ཀྱི་སྔོན་གྱི་བྱང་ཆུབ་སེམས་དཔའི་སྤྱོད་པ་རྣམས་ཀྱང་སྤྱོད་པ་ཐམས་ཅད་ལ་འཇུག་པའི་ཏིང་ངེ་འཛིན་ཐོབ་པའི་སྟོབས་ཀྱིས་རང་གི་སྤྱོད་པ་ཡོངས་སུ་དག་པར་བྱ་བའི་ཕྱིར་མངོན་པར་བསྒྲུབས་སོ། །ཁོ་བོས་དེ་བཞིན་གཤེགས་པ་དེ་དག་ཐམས་ཅད་ཀྱི་ཕ་རོལ་ཏུ་ཕྱིན་པ་རྣམ་པར་དག་པ་ཡང་ཀུན་ཏུ་བཟང་པོའི་སྤྱོད་པས་འབྱུང་བའི་སྟོབས་ཀྱིས་མངོན་པར་བསྒྲུབས་སོ། །གཞན་ཡང་རིགས་ཀྱི་བུ། ཁོ་བོ་འཆག་ས་འདི་ན་འཆག་པའི་ཚེ། ཕྱོགས་ཀྱི་རྒྱུད་ཀྱི་སྒོ་ཐམས་ཅད་ཀྱང་ཤིན་ཏུ་རྣམ་པར་ལྟ་བའི་ཡེ་ཤེས་ཀྱི་སྒོས་མངོན་དུ་འགྱུར་རོ། །འཇིག་རྟེན་གྱི་ཁམས་ཀྱི་རྒྱུད་ཀྱི་སྒོ་ཐམས་ཅད་ཀྱང་། སྨོན་ལམ་ཆེན་པོ་མངོན་པར་བསྒྲུབས་པའི་སྟོབས་ཀྱིས་སེམས་བསྐྱེད་པ་གཅིག་ལ་འཇིག་རྟེན་གྱི་ཁམས་བརྗོད་དུ་མེད་པའིའང་བརྗོད་དུ་མེད་པ་འདའ་ཞིང་ཡོངས་སུ་དག་པར་བྱ་བའི་ཕྱིར་རྣམ་པར་འགྲུབ་པར་འགྱུར་རོ། །སེམས་ཀྱི་སྐད་ཅིག་གཅིག་ལ་སེམས་ཅན་གྱི་སྤྱོད་པའི་ཚུལ་གྱི་སྒོ་བརྗོད་དུ་མེད་པའི་ཡང་། བརྗོད་དུ་མེད་པ་དག་ཀྱང་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་། སྨོན་ལམ་མངོན་པར་བསྒྲུབས་པའི་སྟོབས་ཀྱིས་སྟོབས་བཅུའི་ཡེ་ཤེས་ཡོངས་སུ་རྫོགས་པར་བྱ་བའི་ཕྱིར་མངོན་སུམ་དུ་འགྱུར་རོ། །སེམས་བསྐྱེད་པ་གཅིག་ལ་སངས་རྒྱས་བརྗོད་དུ་མྱེད་པའི་ཡང་། བརྗོད་དུ་མེད་པ་མཐོང་བ་རྣམ་པར་དག་པ་དག་ཀྱང་སྔ་ཕྱིའི་དེ་བཞིན་གཤེགས་པ་རྣམས་ལ་མཆོད་པའི་སྨོན་ལམ་མངོན་པར་བསྒྲུབས་པའི་སྟོབས་ཀྱིས། དེ་བཞིན་གཤེགས་པ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་། བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ལ་མཆོད་པ་དང་། བསྙེན་བཀུར་བ་དང་། རིམ་གྲོ་བྱ་བའི་ཕྱིར་མངོན་དུ་འགྱུར་རོ། །