སེམས་ཅན་མི་འཇལ་ལ་བསྒྲེས་པའི་ཕྱིར་མ་ཡིན། སེམས་ཅན་བསམ་ཕྱོད་ཀྱི་ཕྱིར་མ་ཡིན། སེམས་ཅན་བསམ་ཕྱོད་ལ་བསྒྲེས་པའི་ཕྱིར་མ་ཡིན། སེམས་ཅན་མཐའ་འབྱམ་གྱི་ཕྱིར་མ་ཡིན། སེམས་ཅན་མཐའ་འབྱམ་ལ་བསྒྲེས་པའི་ཕྱིར་མ་ཡིན། སེམས་ཅན་དཔག་ཐག་གི་ཕྱིར་མ་ཡིན། སེམས་ཅན་དཔག་ཐག་ལ་བསྒྲེས་པའི་ཕྱིར་མ་ཡིན། སེམས་ཅན་བརྗོད་དུ་མེད་པའི་ཕྱིར་མ་ཡིན། སེམས་ཅན་བརྗོད་དུ་མེད་པ་ལ་བསྒྲེས་པའི་ཕྱིར་མ་ཡིན། སེམས་ཅན་བརྗོད་དུ་མེད་པའི་ཡང་བརྗོད་དུ་མེད་པའི་ཕྱིར་མ་ཡིན། སེམས་ཅན་བརྗོད་དུ་མེད་པའི་ཡང་བརྗོད་དུ་མེད་པ་ལ་བསྒྲེས་པའི་ཕྱིར་མ་ཡིན། སེམས་ཅན་འཇིག་རྟེན་གྱི་ཁམས་གཅིག་ཏུ་གཏོགས་པ་རྣམས་ཀྱི་ཕྱིར་མ་ཡིན་པ་ནས། བརྗོད་དུ་མེད་པའི་ཡང་བརྗོད་དུ་མེད་པའི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་རྣམས་ཀྱི་ཕྱིར་མ་ཡིན། གླིང་བཞི་པའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་རྣམས་ཀྱི་ཕྱིར་མ་ཡིན། སྟོང་གི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་རྣམས་ཀྱི་ཕྱིར་མ་ཡིན། སྟོང་གཉིས་ཀྱི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་རྣམས་ཀྱི་ཕྱིར་མ་ཡིན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་རྣམས་ཀྱི་ཕྱིར་མ་ཡིན་པ་ནས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་རྣམས་ཀྱི་དོན་དུ་འདི་ལྟ་སྟེ་ཡོངས་སུ་སྨིན་པར་བྱ་བ་དང་། གདུལ་བའི་ཕྱིར་བྱང་ཆུབ་སེམས་དཔའ་རྣམས་ཀྱི་སེམས་བྱང་ཆུབ་ཏུ་སྐྱེ་བ་མ་ཡིན་གྱི།