དགེ་བསྙེན་མ་ཡིད་བཞིན་དེའི་དྲུང་དུ་ཤར་ཕྱོགས་ནས་ཚངས་པ་ཆེན་པོའམ། ཚངས་ལྷ་ཉེ་ཕན་དང་། ཚངས་པའི་རིས་སུ་གཏོགས་པའམ། དབང་བྱེད་དམ། གཞན་འཕྲུལ་དབང་བྱེད་ཀྱི་རིས་སུ་གཏོགས་པའམ། རབ་འཕྲུལ་དགའ་འམ། འཕྲུལ་དགའི་རིས་སུ་གཏོགས་པའམ། རབ་དགའ་ལྡན་ནམ། དགའ་ལྡན་གྱི་རིས་སུ་གཏོགས་པ་འམ། རབ་མཚེ་མ་འམ། མཚེ་མའི་རིས་སུ་གཏོགས་པའམ། ལྷའི་དབང་པོ་འམ། སུམ་ཅུ་རྩ་གསུམ་གྱི་རིས་སུ་གཏོགས་པའམ། གནོད་སྦྱིན་གྱི་དབང་པོའམ། གནོད་སྦྱིན་ནམ། དྲི་ཟའི་དབང་པོའམ། དྲི་ཟ་འམ། གྲུལ་བུམ་གྱི་དབང་པོའམ། གྲུལ་བུམ་འམ། ཀླུའི་དབང་པོ་འམ། ཀླུའམ། ལྷ་མ་ཡིན་གྱི་དབང་པོའམ། ལྷ་མ་ཡིན་ནམ། ནམ་མཁའ་ལྡིང་གི་དབང་པོའམ། ནམ་མཁའ་ལྡིང་ངམ། མིའམ་ཅིའི་དབང་པོའམ། མི་འམ་ཅི་འམ། ལྟོ་འཕྱེ་ཆེན་པོའི་དབང་པོའམ། ལྟོ་འཕྱེ་ཆེན་པོ་འམ། གཤིན་རྗེ་འམ། གཤིན་རྗེའི་བུ་མོ་འམ། ཡི་དགས་རྫུ་འཕྲུལ་ཆེན་པོའམ། ཡི་དགས་སམ། མིའི་དབང་པོའམ། མིའང་རུང་སྟེ། སེམས་ཅན་ཚད་མེད་གྲངས་མེད་པ་དག་འོང་བ་དང་། དེ་བཞིན་དུ་ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། བྱང་ཤར་གྱི་ཕྱོགས་མཚམས་དང་། ཤར་ལྷོའི་ཕྱོགས་མཚམས་དང་། ལྷོ་ནུབ་ཀྱི་ཕྱོགས་མཚམས་དང་། ནུབ་བྱང་གི་ཕྱོགས་མཚམས་དང་། འོག་དང་སྟེང་གི་ཕྱོགས་ནས་ཀྱང་། ཚངས་པ་ཆེན་པོའམ། ཚངས་ལྷ་ཉེ་ཕན་ནམ། ཚངས་པའི་རིས་སུ་གཏོགས་པའམ། དབང་བྱེད་དམ། དབང་བྱེད་ཀྱི་རིས་སུ་གཏོགས་པ་ནས། མིའི་དབང་པོའམ། མིའི་བར་གྱི་སེམས་ཅན་མང་པོ་འོང་བ། དེ་དག་ནད་སྣ་ཚོགས་ཞིག་གིས་བཏབ་པའམ། ཉོན་མོངས་པ་སྣ་ཚོགས་ཀྱིས་ཀུན་ནས་འཁོར་ཏམ། ལྟ་བའི་རྣམ་པ་སྣ་ཚོགས་ལ་མངོན་པར་ཞེན་ཏམ། ལས་ཀྱི་སྒྲིབ་པས་བསྒྲིབས་པ་ཞིག་ཡོད་ནའང་། དེ་དག་གིས་དགེ་བསྙེན་མ་ཡིད་བཞིན་དེ་མཐོང་མ་ཐག་ཏུ་ནད་ཐམས་ཅད་ཀྱང་རབ་ཏུ་ཞི་བར་གྱུར།