ཁ་དོག་བསམ་གྱིས་མི་ཁྱབ་པར་མཛེས་ཤིང་གཟུགས་ཡིད་དུ་འོང་བ་དག་གོ །བཟའ་ཤིང་གི་ར་བ་ཀུན་ནས་བརྒྱན་པ་དེ། སྟེང་ནས་བླ་རེ་ཆེན་པོ་བརྒྱ་སྟོང་ཕྲག་བཅུས་ཀུན་ནས་ཁེབས་པ་སྟེ། འདི་ལྟར་གོས་ཀྱི་བླ་རེ་དང་ཁྲི་ཤིང་གི་བླ་རེ་དང་མེ་ཏོག་གི་བླ་རེ་དང་། ཕྲེང་བའི་བླ་རེ་དང་། སྤོས་ཀྱི་བླ་རེ་དང་། ནོར་བུ་རིན་པོ་ཆེའི་བླ་རེ་དང་། གསེར་གྱི་བླ་རེ་དང་། རྒྱན་གྱི་བླ་རེ་དང་། རིན་པོ་ཆེ་རྡོ་རྗེ་སྣང་བའི་བླ་རེ་དང་། གླང་པོའི་ཤུགས་དང་ལྡན་པས་སྤྲུལ་པའི་ལྷ་མོའི་བླ་རེ་དང་། ནོར་བུ་རིན་པོ་ཆེ་བརྒྱ་བྱིན་མངོན་པར་དགའ་བའི་བླ་རེ་དང་། དེ་དག་ལ་སོགས་པ་བླ་རེ་བརྒྱ་སྟོང་ཕྲག་བཅུས་ཀུན་ནས་ཁེབས་པར་བྱས་པའོ། །རིན་པོ་ཆེའི་དྲ་བ་བརྒྱ་སྟོང་ཕྲག་བཅུས་ཀུན་ནས་ཡོག་པ་སྟེ། འདི་ལྟར་རིན་པོ་ཆེ་དམ་པའི་དྲིལ་བུའི་དྲ་བ་དང་། རིན་པོ་ཆེའི་གདུགས་ཀྱི་དྲ་བ་དང་། རིན་པོ་ཆེའི་འབྲུའི་དྲ་བ་དང་། མུ་ཏིག་རྒྱ་མཚོའི་སྙིང་པོའི་དྲ་བ་དང་། ནོར་བུ་རིན་པོ་ཆེ་བཻཌཱུརྱ་སྔོན་པོའི་དྲ་བ་དང་། སེང་གེའི་ཁྲི་ཤིང་གི་དྲ་བ་དང་། ནོར་བུ་རིན་པོ་ཆེ་ཆུ་ཤེལ་གྱི་དྲ་བ་དང་། སྤོས་ཀྱི་གཟུགས་ཀྱི་དྲ་བ་དང་། རིན་པོ་ཆེའི་ཅོད་པན་དང་། རིན་པོ་ཆེའི་ཕྲེང་བའི་དྲ་བ་དང་། དེ་དག་ལ་སོགས་པ་རིན་པོ་ཆེའི་དྲ་བ་བརྒྱ་སྟོང་ཕྲག་བཅུས་ཀུན་ནས་ཡོག་པ། སྣང་བ་ཆེན་པོ་བརྒྱ་སྟོང་ཕྲག་བཅུས་ཀྱང་ཀུན་ནས་ཡོག་པ་སྟེ། འདི་ལྟར་ནོར་བུ་རིན་པོ་ཆེ་སྐར་མའི་འོད་ཟེར་གྱི་སྣང་བ་དང་། ནོར་བུ་རིན་པོ་ཉི་མའི་སྙིང་པོའི་སྣང་བ་དང་། ནོར་བུ་རིན་པོ་ཆེ་ཟླ་བའི་རྒྱལ་མཚན་གྱི་སྣང་བ་དང་། ནོར་བུ་རིན་པོ་ཆེ་སྤོས་ཀྱི་དུད་པ་འོད་འཕྲོ་བའི་སྣང་བ་དང་། ནོར་བུ་རིན་པོ་ཆེ་དཔལ་གྱི་སྙིང་པོའི་སྣང་བ་དང་། ནོར་བུ་རིན་པོ་ཆེ་པད་མོའི་སྙིང་པོའི་སྣང་བ་དང་། ནོར་བུ་རིན་པོ་ཆེ་སྐར་མའི་རྒྱལ་མཚན་གྱི་སྣང་བ་དང་། ནོར་བུ་རིན་པོ་ཆེ་སྒྲོན་མ་ཆེན་པོའི་སྣང་བ་དང་། ནོར་བུ་རིན་པོ་ཆེ་ཕྱོགས་ཀུན་ཏུ་རྣམ་པར་སྣང་བའི་སྣང་བ་དང་། ནོར་བུ་རིན་པོ་ཆེ་སྤོས་ཀྱི་སྤྲིན་ཆེན་པོ་དང་།