བྱང་ཆུབ་སེམས་དཔའི་འགྲོ་བའི་བསམ་པ་ཇི་ལྟ་བ་བཞིན་དུ་རྗེས་སུ་འབྲང་བ་དང་། བྱང་ཆུབ་སེམས་དཔས་འཁོར་བ་དང་། མྱ་ངན་ལས་འདས་པའི་སྒོ་ཡོངས་སུ་བསྟན་པ་དང་། བྱང་ཆུབ་སེམས་དཔའ་རྣམས་ཀྱི་འདུས་བྱས་དང་། འདུས་མ་བྱས་ཀྱི་སྐྱོན་དང་། འཇིགས་པས་མི་གོས་པའི་རྒྱུད་ཡོངས་སུ་བཙལ་བ་འདི་ནི་དཀའོ། །ཤིན་ཏུ་དཀའོ། །རིགས་ཀྱི་བུ་ཁོ་བོ་ནི་མོས་པའི་སྟོབས་ཀྱི་དབང་གིས་མིག་གི་བློ་གྲོས་དང་། དད་པའི་མིག་རྣམ་པར་དག་པས་ཀུན་ཏུ་མངོན་པར་ལྟ་བའི་ཡེ་ཤེས་ཀྱི་འོད་སྣང་བ། ཕྱིན་ཕྱོགས་མེད་པ་དང་། ཡུལ་ཀུན་ལ་ཐོགས་པ་མེད་ཅིང་སྒྲིབ་པ་ཐམས་ཅད་དང་བྲལ་བའི་ལྷག་མཐོང་ལ་མཁས་པ་དང་། མིག་གི་ཡུལ་ཀུན་ནས་ཡོངས་སུ་དག་པའི་ལུས་རྣམ་པར་དག་པ་དང་། ཕྱོགས་ཀྱི་རྒྱུད་འབྱམ་ཀླས་པ་ཐམས་ཅད་དུ་མངོན་པར་འདུད་པའི་ལུས་ཀྱིས་འདུད་པ་ལ་མཁས་པ་དང་། སངས་རྒྱས་ཐམས་ཅད་ཀྱི་ཆོས་ཀྱི་སྤྲིན་ཡོངས་སུ་འཛིན་པའི་གཟུངས་ཀྱི་སྟོབས་ཀྱིས་ཕྱོགས་ཀྱི་རྒྱུད་ཐམས་ཅད་ནས་མངོན་དུ་གཟིགས་པའི་དེ་བཞིན་གཤེགས་པ་རྣམས་མཐོང་སྟེ། འདི་ལྟར་ཤར་ཕྱོགས་ཀྱི་དེ་བཞིན་གཤེགས་པ་གཅིག་ཀྱང་མཐོང་ངོ་། །སངས་རྒྱས་གཉིས་དང་བཅུ་དང་། སངས་རྒྱས་བརྒྱ་དང་། སངས་རྒྱས་སྟོང་དང་། སངས་རྒྱས་བརྒྱ་ཕྲག་སྟོང་དང་། སངས་རྒྱས་བྱེ་བ་དང་། སངས་རྒྱས་བྱེ་བ་བརྒྱ་དང་། སངས་རྒྱས་བྱེ་བ་སྟོང་དང་། སངས་རྒྱས་བྱེ་བ་བརྒྱ་ཕྲག་སྟོང་དང་། སངས་རྒྱས་བྱེ་བ་ཁྲག་ཁྲིག་བརྒྱ་ཕྲག་སྟོང་ནས་དེ་བཞིན་གཤེགས་པ་ཚད་མེད་པ། དཔག་ཏུ་མེད་པ། གྲངས་མེད་པ། བསམ་གྱིས་མི་ཁྱབ་པ་མཚུངས་པ་མེད་པ། ཀུན་ཏུ་མཐའ་ཡས་པས་མཚམས་མེད་པ། གཞལ་དུ་མེད་པ། བརྗོད་དུ་མེད་པའི་ཡང་བརྗོད་དུ་མེད་པ་དག་ཀྱང་མཐོང་ངོ་། །དེ་བཞིན་གཤེགས་པ་འཛམ་བུའི་གླིང་གི་རྡུལ་ཤིན་ཏུ་ཕྲ་བ་སྙེད་ཀྱང་མཐོང་ངོ་། །དེ་བཞིན་གཤེགས་པ་གླིང་བཞི་པའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་བསྙེད་དང་། སྟོང་དང་། སྟོང་གཉིས་པ་དང་། སྟོང་གསུམ་གྱི་སྟོང་ཆེན་པོའི་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱང་མཐོང་ངོ་། དེ་བཞིན་གཤེགས་པ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཀྱང་མཐོང་ངོ་།