ནོར་བུ་རིན་པོ་ཆེ་དམ་པ་མཛེས་པར་བཀྲམ་པ་དང་། བཻ་ཌཱུརྱའི་ཀ་བས་མཛེས་པར་བྱས་པ། རིན་པོ་ཆེའི་རྒྱལ་པོ་འགྲོ་བ་རྣམ་པར་སྣང་བས་རྒྱན་ཤིན་ཏུ་རྣམ་པར་ཕྱེ་བ། རིན་པོ་ཆེ་བཟང་པོ་མང་པོ་དང་ལྡན་པའི་ནོར་བུ་རིན་པོ་ཆེ་འཛམ་བུའི་ཆུ་ཀླུང་གི་ཕུང་པོས་ཤིན་ཏུ་བརྒྱན་པ་དང་། རིན་པོ་ཆེ་ཐམས་ཅད་ལས་སྒོ་གང་དང་། རྟ་བབས་དང་། པུ་ཤུ་དང་། སྐར་ཁུང་བྱས་ཤིང་ཁྲི་འཕང་གྲངས་མྱེད་པ་རྣམ་པར་དག་པས་བརྒྱན་པ་དང་། འཇིག་རྟེན་གྱི་དབང་པོ་ཐམས་ཅད་དང་འདྲ་བའི་ནོར་བུ་རིན་པོ་ཆེའི་རྒྱན་དང་ལྡན་པ་དང་། འགྲོ་བ་རྒྱ་མཚོའི་ནོར་བུ་རིན་པོ་ཆེ་རྣམ་པར་ཕྱེ་བ་དང་། ནོར་བུ་རིན་པོ་ཆེ་ཐམས་ཅད་ཀྱི་དྲ་བས་ཀུན་ནས་ཡོག་པའི་གདུགས་དང་། རྒྱལ་མཚན་རབ་ཏུ་བསྒྲེང་བ་དང་། སྒོ་དང་རྟ་བབས་ཐམས་ཅད་ལས་འོད་ཟེར་ཆོས་ཀྱི་དབྱིངས་སུ་རྒྱས་པར་འགེངས་པ་རབ་ཏུ་འབྱུང་བས་རྣམ་པར་མཛེས་པར་བྱས་པ་དང་། ཕྱི་རོལ་གྱི་འཁོར་གྱི་དཀྱིལ་འཁོར་གྱི་སའི་གཞི་སྟེགས་བུ་བརྗོད་དུ་མྱེད་པས་བརྒྱན་པ་དང་། ཕྱོགས་ཀུན་ནས་ཐེམ་སྐས་ཀྱི་ཕྲེང་བ་ནོར་བུ་རིན་པོ་ཆེས་བརྩེགས་ཤིང་ཤིན་ཏུ་རྣམ་པར་ཕྱེ་བས་རབ་ཏུ་མཛེས་པར་ཀུན་ནས་གནས་པར་གྱུར་ཏོ། །ཛེ་ཏའི་ཚལ་ཐམས་ཅད་ཀྱང་ཆུ་ཞེང་གབ་པར་ཤིན་ཏུ་ཡངས་ཤིང་རྒྱ་ཆེ་བར་ཀུན་ནས་གནས་པར་གྱུར་ཏེ། སངས་རྒྱས་ཀྱི་མཐུས་སངས་རྒྱས་ཀྱི་ཞིང་བརྗོད་དུ་མྱེད་པའི་རྡུལ་ཤིན་ཏུ་ཕྲ་བ་སྙེད་ཀྱི་སངས་རྒྱས་ཀྱི་ཞིང་རྣམས་ཀྱང་ཆུ་ཞེང་ཀུན་ཏུ་རྒྱ་ཆེ་ཞིང་ཡངས་པ་དང་། རིན་པོ་ཆེ་ཐམས་ཅད་ཀྱི་རྒྱན་སྣ་ཚོགས་དང་ལྡན་ཞིང་། སའི་གཞི་ནོར་བུ་རིན་པོ་ཆེ་སྣ་ཚོགས་བརྗོད་དུ་མྱེད་པས་ཀུན་ནས་གྲུབ་པ་དང་། ནོར་བུ་རིན་པོ་ཆེ་གྲངས་མྱེད་པའི་ར་བས་ཀུན་ནས་བསྐོར་བ་དང་། རིན་པོ་ཆེ་སྣ་ཚོགས་ཀྱི་ཤིང་ཏ་ལའི་ཕྲེང་བས་མཛེས་པར་བརྒྱན་པར་ཀུན་ནས་གནས་པར་གྱུར་ཏོ། །སངས་རྒྱས་ཀྱི་ཞིང་དེ་དག་ན་སྤོས་ཆུའི་ཆུ་ཀླུང་ཚད་མྱེད་པ་ཀློང་མཐའ་ཡས་པར་འཁྱིལ་པའི་སྤོས་ཀྱི་ཆུས་ཡོངས་སུ་གང་བ། རིན་པོ་ཆེ་སྣ་ཚོགས་ཀྱི་མེ་ཏོག་མང་པོ་དང་འདྲེས་པར་གྱུར་ལ་གཡས་ཕྱོགས་སུ་འཁྱིལ་ཅིང་འབབ་པ། སངས་རྒྱས་ཀྱི་ཆོས་ཐམས་ཅད་དབྱིངས་སུ་སྒྲོག་པས་རབ་ཏུ་བརྒྱན་པར་དག་ཀྱང་ཀུན་ནས་གནས་པར་གྱུར་ཏོ།