།མར་མེ་བསྟལ་ནས་གྷ་ན་དྷ་ཀའི་ཕྱེ་མ་བླུགས་ན་སླར་ཡང་འབར་བར་བྱེད་དོ། །མཎྜ་རཱི་དང་། སེ་བཱ་ལ་དང་། ཛ་ལོ་ཀ་དང་། སྦལ་པའི་ཚིལ་གྱིས་རྐང་པ་དག་མཉེས་ནས། ཆུ་ཤིང་གི་ལོ་མ་དཀྲིས་ནས་མེ་མ་དཀའ་བར་བའི་སྟེང་དུ་ཕྱིན་ན་ཚིག་པར་མི་འགྱུར་རོ། །ཤི་ཐིབ་ཏུ་དང་། བུ་རམ་ཟོས་ན་གཉིད་དུ་འགྱུར་རོ། །ཀ་མ་རྩའི་རྩ་བ་སྤྱི་བོར་བཅིངས་ན་གཉིད་དུ་འགྱུར་རོ། །ནཱ་ག་དམ་ན་ཀའི་རྩ་བ་དང་། གྲོ་ན་བུཥྚའི་བལ་དང་། ཡུང་བ་དང་། འབྲས་དང་བཏགས་ནས་དྲིལ་གྱིས་བྱས་ན། ཆུའི་བཏགས་པ་ལས་རྒྱལ་ལོ། །ཤལ་མ་ལའི་རྩ་བར་བྲུས་ནས། ཤིང་ཀུན་བཅུག་ན་མེ་ཏོག་རྣམས་ལྟུང་བར་འགྱུར་རོ། །ས་སྐྱུར་མོ་དང་། ཆང་བྱིན་ནས་གོ་ལ་བྱིན་ན་འཁྲུ་བར་བྱེད་དོ། །ཤི་རི་ཁ་ཎའི་འོ་མ་དང་། ཨརྐའི་ས་བོན་དང་། སྲིན་བུའི་ཟོས་པའི་ཤིང་ཕྱེ་དང་། བུ་རམ་ཟོས་ན་ཁྲག་ཏུ་འཛག་པར་འགྱུར་རོ། །སྤང་བྱེའི་ཕྱེ་མས་རྟའི་སྣ་ལ་མཉེས་ན་རྩྭ་ཟ་བར་མི་འགྱུར་རོ། །ཙནྡན་གྱིས་བཀྲུས་ན་དག་པར་འགྱུར་རོ། །ཀེ་ཏ་ཀའི་རྩ་བ་སྤྱི་བོར་བཅིང་བར་བྱའོ། །ཁ་རྫུ་རའི་རྩ་བ་དང་། ཧ་ཏེ་ཏ་ལའི་རྩ་བ་མུ་ཁ་རྒྱལ་གྱི་ཟླ་བ་ལ་བྱང་ཕྱོགས་སུ་གནས་པས། གཅེར་བུ་སྐྲ་གྲོལ་བར་བྱས་ནས་བཏོན་ནས་གསུམ་པོ་དང་ཅུང་ཟད་མཉེས་ནས་འཐུངས་ན་མཚོན་གྱིས་ཐེད་པར་མི་འགྱུར་རོ། །ཤོ་ན་ཀའི་ས་བོན་གྱིས་མཆིལ་ལྷ་མ་གཉིས་རི་དགས་ཀྱི་པགས་པ་ལ་བྱས་ནས། ནང་བཀང་ནས་ཆུ་ལ་ཕྱིན་ན་འབྱིང་བར་མི་འགྱུར་རོ། ཨོྃ་ཥ་ཎི་ཟོས་ནས་ལྕེ་འོག་ཏུ་གཞག་པར་བྱའོ། །ཐོང་ལྕགས་བསྲེགས་ནས་ལྡགས་ན་ཚིག་པར་མི་འགྱུར་རོ། །དངུལ་ཆུ་དང་ཀྵ་ར་དང་ལྡན་པའི་ཧ་སྟི་ཤུཎྜི་འཐུངས་ན་མངལ་ལྟུང་བར་བྱེད་དོ། །ཤར་པུང་ག་དཀར་པོའི་རྩ་བ་རྒྱུ་སྐར་རྒྱལ་ལ་བཏོན་ནས་བའི་མར་ལ་སྦངས་ནས་མགོ་བོ་འམ་དཔུང་བར་གདགས་པར་བྱའོ། །མདའ་དང་ཆོམ་པོའི་འཇིགས་པ་ལས་སྐྱོབ་པར་བྱེད་དོ། །བྱ་རྒོད་ཀྱི་ཞག་དང་། འུག་པའི་ཞག་མཆིལ་ལྷ་མ་ལ་བྱུགས་ནས་སྟེང་དུ་གནས་ནས་ཤིན་ཏུ་རིང་པོར་འགྲོ་འོང་ནུས་སོ། །ཡུངས་ཀར་གྱི་འབྲས་བུ་མཚོན་གྱིས་གཅད་པར་བྱ་སྟེ། ཉི་མ་བཟང་པོའི་དགོངས་མོའི་ཐུན་མཚམས་སུ་ལྷག་པར་གནས་པ་བྱས་ན་གཅེར་བུ་སྐྲ་གྲོལ་བར་བྱས་ནས་ལག་པ་གཡོན་པས་བཟུང་ནས་ས་ལ་མ་ལྷུང་བར་བཅོམ་ལྡན་འདས་ཀྱི་སྔགས་ཀྱིས་བསྲུངས་ནས། ཕྲེང་བའི་སྔགས་ཀྱིས་གང་དང་གང་གི་ཁྲག་གིས་སྦངས་ནས།