།འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་བཙུན་མོའི་བྷ་ག་ལ་སྙོམས་པར་བཞུགས་སོ། །དེའི་ཚེ་འཁོར་འདུས་པ་དེ་དག་གི་ནང་ནས་མཁའ་སྤྱོད་མ། ས་སྤྱོད་མ་དང་། ས་འོག་ན་སྤྱོད་པ་མ་གསུམ་ལ་བཅོམ་ལྡན་འདས་ཀྱིས་ཞལ་འཛུམ་པ་མཛད་དེ། གསང་བའི་དོན་འདི་གསུངས་པ། །དད་ལྡན་སྙིང་རྗེར་ལྡན་དང་རྩེ་གཅིག་སེམས། །ལུས་ངག་གུས་བཅས་གཞན་ལ་ཕན་སེམས་ལྡན། །འཇིགས་མེད་བརྟུལ་ཞུགས་ལྡན་ཞིང་ཟབ་མོ་ཡི། །ལམ་ལ་སྤྲོ་བར་གྱིས་ལ་ལེགས་པར་ཉོན། །མཁའ་འགྲོ་ཁྱོད་ཀྱི་མཚན་ཉིད་ནི། །ང་ཡིས་ཁྱོད་ལ་བཤད་པར་བྱ། །མཁའ་སྤྱོད་སྟེང་སྒོའི་རླུང་ཡིན་ཏེ། །ས་སྤྱོད་བར་དུ་ཐིག་ལེའི་སྒོ། །ས་འོག་སྤྱོད་པ་ཤུ་ཀྲའི་སྒོ། །སྒོ་གསུམ་སྐུ་གསུང་ཐུགས་ཡིན་ཏེ། །དང་པོ་མཁའ་སྤྱོད་མཚན་ཉིད་ཀྱང་། །རྣམ་པ་གསུམ་དུ་ཤེས་བྱ་སྟེ། །བེམས་པོའི་རླུང་དང་རྣམ་རྟོག་རླུང་། །ཀུན་གྱི་མཚན་ཉིད་ཡེ་ཤེས་རླུང་། །མདོར་བསྟན་དེ་ཉིད་རིམ་པས་དབྱེ། །གཉིས་མེད་རླུང་ནི་མ་ནིང་སྟེ། །ཟུང་འཇུག་ཐབས་དང་ཤེས་རབ་རླུང་། །ལྡང་འཇུག་སྐུ་གསུང་ཐུགས་ཀྱི་རླུང་། །སྙིང་དང་གཞང་ཁ་མགྲིན་པ་དང་། །ལྟེ་བ་ལུས་ཀྱིས་ཁྱབ་པ་རུ། །རིགས་ལྔའི་རླུང་ནི་ཁྱབ་པར་གནས། །རྒྱུ་བ་བཞི་ནི་འབྱུང་བའི་རླུང་། །དངས་སྙིགས་འབྱེད་པ་བརྒྱད་དུ་འགྱུར། །འདི་ཉིད་རླུང་ནི་ཐུན་བརྒྱད་དེ། །ཐུན་རེ་ལ་ནི་འཕོ་བ་གཉིས། །རླུང་གི་འཕོ་བ་བཅུ་དྲུག་ཡིན། །འཕོ་བ་གཅིག་ལ་ཆུ་ཚོད་གཉིས། །ཆུ་ཚོད་རེ་ལ་དབྱུག་གུ་གཉིས། །རླུང་གི་དབྱུག་གུ་དྲུག་ཅུ་བཞི། །དེ་བཞིན་ཆུ་ཚོད་སུམ་ཅུ་གཉིས། །ཉི་ཁྲི་ཆིག་སྟོང་དྲུག་བརྒྱ་སོགས། །སེམས་དང་སེམས་མིན་འདྲེས་པའི་རླུང་། །རགས་པ་དང་ནི་ཕྲ་བ་ལ། །མཁས་པས་སེམས་ཀྱི་བཞོན་པར་གཟུང་། །རྣམ་རྟོག་གཟུང་འཛིན་སེམས་ཀྱི་རྟ། །གཟུང་འཛིན་གཉིས་འགགས་དབུ་མར་གནས། །དེ་ཉིད་ཡེ་ཤེས་རྡོ་རྗེའི་རླུང་། །དབྱེ་བ་ཐབས་དང་ཤེས་རབ་གཉིས། །འདི་རྣམས་མཁའ་སྤྱོད་རང་བཞིན་ཏེ། །དེ་དག་མན་ངག་མཁས་པས་བརྟག །ཡོན་ཏན་སྐྱོན་དང་རྟགས་རྣམས་ཀྱིས། །རླུང་གི་མཚན་ཉིད་ཤེས་པར་བྱ།