ཕྱག་རྒྱ་གང་དང་གང་གསུངས་པ། །དེ་དང་དེ་ནི་ཆོ་གས་བླངས། །དེ་དང་དེ་ཉིད་ཀྱིས་ནི་བསྒྲུབ། །གཏི་མུག་བདག་ཉིད་ངེས་བར་མ། །ལྷ་མོའམ་སྐྱེ་གཉིས་བདག་ཉིད་སྐྱེས། །གཏི་མུག་རྣམ་དག་བསམ་གཏན་པས། །བླངས་ནས་མངོན་དུ་རྣམ་སྣང་འགྱུར། །མ་ནི་རིག་མ་དམ་པ་སྟེ། །གལ་ཏེ་ཕ་ཡིས་སྔར་བསྟན་ཀྱང་། །དེ་བཞིན་དེ་ཉིད་ཀྱིས་ཀྱང་འགྲུབ། །བདེ་བ་ཆེན་པོས་བཀའ་སྩལ་ཏོ། །ཞེ་སྡང་བདག་ཉིད་གདོལ་པ་མོ། །བུ་མོའང་གནོད་སྦྱིན་བུ་མོ་བླང་། །ཞེ་སྡང་རྣམ་དག་བསམ་གཏན་པ། །མི་བསྐྱོད་པ་ནི་མངོན་དུ་འགྱུར། །འདོད་ཆགས་བདག་ཉིད་གར་མཁན་མ། །སྲིང་མོའམ་ཀླུ་མོ་ལྷ་མིན་བླངས། །འདོད་ཆགས་རྣམ་དག་བསམ་གཏན་པ། །འོད་དཔག་མེད་པ་བསྒོམ་པར་འགྱུར། །ཕྲག་དོག་བདག་ཉིད་བཟོ་ཤེས་མ། །ཆུ་འབྱུང་དགའ་མ་འམ་སྲིང་མོ་ཡི། །བུ་མོ་ཡང་དག་བླངས་ནས་ནི། །ཕྲག་དོག་རྣམ་དག་བསམ་གཏན་པ། །དཔའ་བོ་དོན་ཡོད་གྲུབ་པར་འགྱུར། །ང་རྒྱལ་བདག་ཉིད་མནའ་མའམ། །རྒྱལ་པོའི་བུ་མོའམ་རིག་འཛིན་མ། །བླངས་ནས་ང་རྒྱལ་རྣམ་དག་པའི། །བསམ་གཏན་པ་དེ་ནོར་བུའི་རིགས། །འབྱུང་གནས་སུ་ནི་འགྱུར་བའོ། །སྤྱན་དང་ལྷན་ཅིག་སངས་རྒྱས་ཉིད། །མཱ་མ་ཀཱི་དང་མི་བསྐྱོད་པར། །འགྲུབ་འགྱུར་དཀར་མོ་ལྷན་ཅིག་ཏུ། །པདྨ་ཅན་དང་སྒྲོལ་མ་ནི། །ལྷན་ཅིག་དོན་ཡོད་གྲུབ་པར་འགྱུར། །རིན་ཆེན་རིན་ཆེན་མ་དང་འགྲུབ། །རིགས་པས་འདོད་པ་འདི་དག་འགྲུབ། །གཞན་ཡང་འདིས་ནི་ཁྲོ་བོ་ཡི། །ལྷ་དང་རྒྱལ་བའི་སྲས་པོ་དང་། །ཁྲོ་བོ་རབ་གཏུམ་ཆོ་ག་དང་། །ཞི་ལ་ཞི་བའི་ཆོ་ག་ཡིས། །ཞི་བ་རབ་ཏུ་འགྲུབ་པར་འགྱུར། །འདོད་ཆགས་རྒྱ་ཆེན་ཞེན་པ་དང་། །ང་རྒྱལ་ལྡན་པས་འགྲུབ་པར་འགྱུར། །དེ་ལྟར་དཀའ་བ་མེད་པའི་ཐབས། །ཀུན་མཁྱེན་ཐུགས་རྗེ་བཅས་པས་བསྔགས། །ཤིན་ཏུ་བདེ་བ་སྒྲུབ་པའི་ཐབས། །བརྟུལ་ཞུགས་དཀའ་ཐུབ་སྤྱོད་པ་སྤངས། །དེ་ལྟར་བདུད་རྩིའི་རོ་རྙེད་ནས། །ཉོན་མོངས་གཞོམ་ཕྱིར་མི་བརྩོན་གང་། །