ཁྲོ་བོའི་སྤྲིན་ཕྱུང་སྟེ། དེ་ཉིད་ཀྱིས་ཕྱོགས་བཅུའི་དེ་བཞིན་གཤེགས་པ་ཐམས་ཅད་འཁོར་དང་བཅས་པ་ལ་ཁྱེད་རྣམས་ཀྱིས་བྱིན་གྱིས་བརླབས་པའི་གནས་སུ་དགོངས་པ་མཛད་པ་དང་། སློབ་དཔོན་དང་དེའི་སློབ་མ་རྣམས་བསྲུང་བ་མཛད་དུ་གསོལ་ཞེས་བསྐུལ་ལོ། །དེ་ནས་དེ་བསྡུས་ནས་ནང་དུ་བཅུག་སྟེ། རང་གི་སྙིང་གར་ཟླ་བ་ལ་རིགས་ཀྱི་བདག་པོའི་ལྟེ་བའི་ནང་དུ་ཧཱུྃ་གནས་པར་བྱས་ནས། དེ་ཡང་རྡོ་རྗེ་འཛིན་པའི་གཟུགས་རང་གི་རིག་མ་དང་། རྣལ་འབྱོར་མ་དང་། བཅོམ་ལྡན་འདས་ལྷན་ཅིག་དེ་བཞིན་གཤེགས་པ་ཐམས་ཅད་དང་གཅིག་ཏུ་འདྲེས་པར་གྱུར་པས་དང་པོའི་ཡི་གེ་གསུམ་གྱིས་བྱིན་གྱིས་བརླབ་ཅིང་། འདོད་པའི་བསྐོར་བ་བྱས་ནས་ལག་པ་གཡས་པས་རྡོ་རྗེ་གསོར་བར་བྱ་བ་དང་། གཡོན་པས་དྲིལ་བུ་སྒྲ་སྙན་པར་དཀྲོལ་བར་བྱའོ། །རྐང་པའི་མཐིལ་དུ་ཧཱུྃ་ལས་རྡོ་རྗེ་འབར་བ་དགོད་པར་བྱ་ཞིང་། ཁྲོ་བོ་ཧཱུྃ་མཛད་ཀྱི་ང་རྒྱལ་གྱིས་བློ་དང་ལྡན་པས་དང་པོར་ཧཱུྃ་བརྗོད་པས་བསྐྲད་པར་བྱའོ། །ལྷ་དང་། ལྷ་མ་ཡིན་དང་། གསང་བ་པ་གདུག་པ་ཅན་ཐམས་ཅད་ལ་ཁྲོ་བོའི་སྐུར་བསྒོམས་པས། ཚིག་འདི་དག་བརྗོད་པར་བྱ་སྟེ། གང་ཡང་ལྷ་དང་། ལྷ་མ་ཡིན་དང་། གནོད་སྦྱིན་དང་། སྲིན་པོ་དང་། ཡི་དགས་དང་། ཤ་ཟ་དང་། བརྗེད་བྱེད་དང་། འབྱུང་པོ་དང་། མཁའ་འགྲོ་མ་དང་། ལུས་སྲུལ་པོ་དང་། གནོན་པོ་མཐུ་ཆེ་ཞིང་རྫུ་འཕྲུལ་ཆེ་བ་རྗེས་སུ་འབྲང་བའི་འཁོར་དང་བཅས་པ་དང་། ནམ་མཁའ་ལྡིང་དང་། མི་འམ་ཅི་དང་། རིག་སྔགས་གྲུབ་པ་ཁྱེད་སོང་ཤིག །སའི་ཕྱོགས་འདིར་སློབ་དཔོན་ཆེ་གེ་མོ་ཞེས་བྱ་བའི་སློབ་མ་ཆེ་གེ་མོ་ཞེས་བྱ་བ་རྫོགས་པའི་བྱང་ཆུབ་ཐོབ་པར་བྱ་བའི་དོན་དང་། སེམས་ཅན་ཐམས་ཅད་བླ་ན་མེད་པའི་ཡེ་ཤེས་ཐོབ་པར་བྱ་བའི་ཕྱིར་དཀྱིལ་འཁོར་གྱི་རྒྱལ་པོ་ཆེ་གེ་མོ་ཞེས་བྱ་བ་འདྲི་བས་རྡོ་རྗེ་འཛིན་པའི་བཀའ་ཐོས་ནས་དེ་དག་མྱུར་བ་ཉིད་དུ་སོང་ཤིག །གང་ཞིག་མི་འགྲོ་བ་དེ་དག་ལག་ན་རྡོ་རྗེ་ཧཱུྃ་མཛད་ཁྲོས་པའི་གདོང་རབ་ཏུ་འབར་བ་ཀུན་ཏུ་འབར་ཞིང་རབ་ཏུ་འབར་བས་ཡེ་ཤེས་ཆེན་པོའི་རྡོ་རྗེའི་ཡེ་ཤེས་ཀྱི་རྡོ་རྗེས་མགོ་བོ་བརྒྱར་འགས་པར་འགྱུར་རོ་ཞེས་ལན་གསུམ་དུ་བརྗོད་དོ།