Degé Kangyur volume 77, F.16.a

།ས་དང་རླུང་གི་རང་བཞིན་ཅན། །​དབུ་མའི་རྩ་དང་གཡོན་པ་ཡང་། །​འཁོར་ལོ་རལ་གྲི་འཛིན་པར་འདོད། །​སྟེང་དང་འོག་ཏུ་དབུ་མ་གཡས། །​སྒྲ་གཅན་ཁུ་བ་རབ་འབབ་པ། །​སྟོང་པ་ཡེ་ཤེས་རང་བཞིན་ཅན། །​རྡོ་རྗེ་རྡོ་རྗེ་འཛིན་པར་འདོད། །​ཟླ་བའི་ལམ་གྱིས་བཤང་བའི་རྩ། །​ཉི་མས་གཅི་བ་འབབ་པ་སྟེ། །​སྐྱེ་འཆི་མཉམ་པ་ཆགས་པ་ལ། །​སྒྲ་གཅན་ཁུ་བ་རབ་ཏུ་འབབ། །​ལྟེ་བའི་སྟེང་དུ་ཀུན་འདར་མ། །​གང་དེ་ཡིད་བཟང་མུན་པ་འབབ། །​འོག་ཏུ་ཁུ་བ་འབབ་གང་དེ། །​མཁའ་འགྲོ་གདོང་དང་དུང་ཅན་མ། །ལྟེ་བའི་ཆུ་སྐྱེས་སྙིང་མགྲིན་དང་། །​དཔྲལ་བ་གཙུག་ཏོར་འདམ་སྐྱེས་ལ། །​ས་ཆུ་མེ་རླུང་སྟོང་པ་རྣམས། །​རབ་ཏུ་འབབ་པ་སྡུད་པ་ཡིས། །​འབྱུང་འགྱུར་དེ་ནི་འཇུག་པ་དག །​བསྐྱེད་པས་འཇུག་སྟེ་ས་ལའོ། །​ལྟེ་བ་ནས་ནི་ལྟེ་བའི་དབུས། །​ཨ་བདྷཱ་ཏཱིར་འགྲོ་དང་འོང་། །​ལྟེ་གསང་ནོར་བུའི་ཆུ་སྐྱེས་ལ། །​ལུས་ངག་སེམས་རྣམས་འབབ་པ་ནི། །​འབྱུང་དང་དེ་ནི་འཇུག་པ་དག །​སྡུད་དང་སྐྱེད་པའི་རང་བཞིན་ཅན། །​དུང་ཅན་སྐྱེ་བོ་ཐམས་ཅད་ཀྱི། །​ཐུར་སེལ་རླུང་ནི་འབབ་པའོ། །​འདི་རྣམས་བུད་མེད་བདེ་བ་ལས། །​ཁུ་བ་ཁྲག་འབབ་དུས་དག་ཏུ། །​ཤེས་རབ་ཐབས་དངོས་ཡན་ལག་གིས། །​སྟེང་དུ་གཡས་དང་གཡོན་དག་དང་། །​འོག་ཏུ་བཤང་གཅི་འབབ་པ་དང་། །​རྔུལ་དང་ཁུ་བ་འབབ་པ་དག །​རྔུལ་འབབ་ཕྱིར་དེ་གཏུམ་མོ་སྟེ། །​ཁུ་བ་འབབ་ཕྱིར་མཁའ་འགྲོ་གདོང་། །​སྟེང་དུ་བརྗོད་དུས་བུད་མེད་ཀྱི། །​གཡུང་མོ་སྐྱེས་བུའི་ཀུན་འདར་མའོ། །​རྣམ་ཤེས་ལ་སོགས་དཀྱིལ་འཁོར་ལྔ། །​རྟག་ཏུ་གཡོན་པའི་རྩ་ལའོ། །​ས་སོགས་གཡས་པའི་རྩ་ལ་སྟེ། །​དབུས་སུ་དྲུག་པ་འབབ་པའོ། །​ལྟེ་བའི་པདྨའི་འདབ་མ་ལ། །​དཀྱིལ་འཁོར་དྲུག་ཅུ་རྣམས་རིམ་བཞིན། །​གཡོན་དང་གཡས་པའི་དུས་སྦྱོར་ནི། །​ལུག་སོགས་གླང་ལ་སོགས་པ་ལ། །​རྩ་བ་གཡོན་དང་དེ་ནས་གཡས། །​སྟེང་དང་དབུས་སུ་རིམ་པས་རླུང་། །​ས་སོགས་དཀྱིལ་འཁོར་རེ་རེ་ཞིང་། །​དབྱུག་གུས་སྣ་བུག་དག་ལའོ། །​རིམ་པས་ཆུ་ཚོད་འབབ་པ་ནི།



The English translation of this folio by 84000 - Translating the words of the Buddha can be found at:
https://read.84000.co/translation/toh361.html?part=UT22084-077-002-642#UT22084-077-002-642