Degé Kangyur volume 76, F.224.a

བར་གྱུར་ནས། རྒྱའི་བློན་པོ་ཆེན་པོ་ཇང་ཤོ་ལ་སོགས་པས་རིམ་གྱིས་རྒྱ་དང་། རྒྱ་གར་གྱི་གྲོང་དང་། གྲོང་ཁྱེར་དང་། གྲོང་རྡལ་འདེབས་པར་འགྱུར་རོ། །​དེ་ལྟར་རྒྱལ་པོ་ས་ལས་ནུ་མ་ནུ་དེ་མི་རབས་དུ་མའི་བར་དུ་ཡུལ་འདིའི་རྒྱལ་པོ་བྱེད་པར་འགྱུར་རོ། །རྒྱལ་པོ་དེ་རྣམས་ཀྱིས་ཀྱང་རིམ་གྱིས་སོ་སོ་ནས་ཡུལ་འདིར་དགོན་པའི་གནས་དང་གཙུག་ལག་ཁང་བྱས་ན་ཞིང་ཆུ་དང་། འབངས་དང་། ཞལ་ཏ་བྱེད་པ་ཡང་འབུལ་ཞིང་། ལ་ལ་ཡང་བདག་ཉིད་ཀྱང་རབ་ཏུ་འབྱུང་བར་བྱེད་དོ། །​ལ་ལ་ནི་བུ་དང་བུ་མོ་རབ་ཏུ་འབྱིན་པར་བྱེད་དོ། །​ལ་ལ་ནི་འབངས་ལས་གྲངས་མེད་པ་ཞིག་རབ་ཏུ་འབྱུང་བར་གནང་བར་བྱེད་དོ། །​ཡུལ་འདིར་མི་བྱང་ཆུབ་སེམས་དཔའི་རིགས་ཅན་མང་པོ་ཞིག་འབྱུང་སྟེ། རྟག་ཏུ་དཀོན་མཆོག་གསུམ་ལས་དགེ་བའི་རྩ་བ་སོགས་ཤིང་བསོད་ནམས་བྱ་བའི་དངོས་པོ་བྱེད་པར་འགྱུར་རོ། །​དེ་ལྟར་ན་ཡུལ་འདི་ནི་རྒྱལ་པོ་ས་ལས་ནུ་མ་ནུས་ཡུལ་གཏོད་པའི་ཚུལ་དེ་ལྟ་བུས་འབྱུང་བར་འགྱུར་རོ། །​ཡུལ་འདི་ནི་སངས་རྒྱས་འབྱུང་བ་རེ་རེའི་ཚེ་ཡང་འབྱུང་ཞིང་རྒྱས་པར་འགྱུར་རོ། །​ཅིའི་ཕྱིར་ཡུལ་གཞན་དང་གཞན་དག་གི་ནི་ཞིག་ནས་ཡུན་རིང་མོ་ཞིག་ཏུ་སྟོང་ཞིང་དགོན་པར་འདུག་ལ་ཡུལ་དགེ་བ་ནི་སངས་རྒྱས་འབྱུང་བ་རེ་རེའི་ཚེ་མི་རྣམས་ཀྱིས་བརྒྱན་ཅིང་མཛེས་པར་འགྱུར་ཞེ་ན། འདི་ལྟར་ཡུལ་འདི་ནི་ཐུབ་པ་དྲང་སྲོང་ཆེན་པོའི་གནས། དེ་བཞིན་གཤེགས་པའི་སྤྱོད་ཡུལ་མཆོད་རྟེན་གོ་མ་ས་ལ་གན་ད་ཞེས་བྱ་བ་རི་གླང་རུ་དང་ཉེ་བ་ཆུ་བོ་གོ་མའི་འགྲམ་ན་ཡོད་པའི་ཕྱིར་རོ། །​མཆོད་རྟེན་འདི་མདོ་སྡེའི་ནང་ནས་ནི་མིང་གོ་མ་ས་ལ་གན་ད་ཞེས་བྱའི། འཇིག་རྟེན་ཕལ་གྱི་ཐ་སྙད་དུ་ནི་ཆུ་བོ་གོ་མའི་འགྲམ་ཞེས་བྱ་བར་འདོགས་པར་འགྱུར་ཏེ། འདི་ལྟར་ཇི་སྲིད་དུ་མཆོད་རྟེན་ཆུ་བོ་གོ་མའི་འགྲམ་ཞེས་བྱ་བ་དང་། འོད་སྲུང་གི་མཆོད་རྟེན་འདི་གཉིས་རྒྱས་ཤིང་མཆོད་གནས་སུ་བྱེད་པ་དེ་སྲིད་དུ་ནི་ཡུལ་དགེ་བ་ཡང་རྒྱས་ཤིང་བཟང་པོར་འགྱུར་རོ། །​ནམ་མཆོད་རྟེན་འདི་གཉིས་རྒུད་པ་དེའི་ཚེ་ཡུལ་ཡང་རྒུད་ཅིང་སྟོངས་པར་འགྱུར་རོ། །​དེ་ནས་དེའི་ཚེ་འཁོར་དེར་འདུས་པའི་ལྷ་རྣམས་ཀྱིས་བཅོམ་



The English translation of this folio by 84000 Translating the words of the Buddha can be found at:
https://read.84000.co/translation/toh357.html?part=UT22084-076-011-253#UT22084-076-011-253