Degé Kangyur volume 76, F.35.b

བུའི་གླིང་པ་ཐམས་ཅད་དུ་དྲིལ་བསྒྲགས་སོ། །​དེ་ནས་རྒྱལ་པོ་དཔལ་གྱི་སྡེས་དྲིལ་བསྒྲགས་པ་དེ་ཐོས་པ་དང་། འཛམ་བུའི་གླིང་པའི་མི་ཐམས་ཅད་དབུགས་ཕྱིན་པར་གྱུར་ཏོ། །​ཡང་དེའི་ཚེ་དེའི་དུས་ན་རྒྱལ་པོའི་ཕོ་བྲང་ཨ་རིཥྛའི་བྱང་ཕྱོགས་རྒྱང་གྲགས་ཙམ་གྱིས་ཕྱོགས་ན་རི་བོ་ཞིག་ཡོད་དེ། དེ་ན་དྲང་སྲོང་ལྔ་བརྒྱ་ཙམ་གནས་སོ། །​ཇི་ཙམ་ན་དུས་གཞན་ཞིག་གི་ཚེ་དེ་རྣམས་ཀྱི་དོན་དུ་འཇུག་པ་དྲང་སྲོང་གཅིག་དོན་གྱི་བྱ་བ་འགའ་ཞིག་གི་ཕྱིར་རྒྱལ་པོའི་ཕོ་བྲང་ཨ་རིཥྛར་འོངས་སོ། །​ཡང་དུས་དེའི་ཚེ་རྒྱལ་པོ་དཔལ་གྱི་སྡེ་ལྷ་མོ་རྒྱལ་བའི་འོད་དང་ལྷན་ཅིག་ཏུ་ནང་དུ་ཞུགས་ནས་སྐྱེད་མོས་ཚལ་གྱི་སར་སོང་ངོ་། །​དྲང་སྲོང་དེས་རྒྱལ་བ་དང་ཚེ་རིང་བའི་བརྗོད་པ་བྱས་པ་དང་། དྲང་སྲོང་དེས་ལྷ་མོ་རྒྱལ་བའི་འོད་རྒྱན་ཐམས་ཅད་ཀྱིས་བརྒྱན་པ་མཐོང་སྟེ། འདི་ལྟར་ཡང་དེའི་སྐྱེ་བ་སྔ་མའི་ཆུང་མར་གྱུར་པ་ཡང་ཡིན་པས་སྔོན་གྱི་ཆགས་པ་དང་འབྲེལ་པའི་དབང་གིས་ཚུལ་བཞིན་མ་ཡིན་པའི་ཡིད་ལ་བྱེད་པ་སྐྱེས་པར་གྱུར་ཏེ། དེ་ཡིད་ལ་སེམས་ཤིང་ལམ་དེ་ནས་སོང་སྟེ། ལམ་དེ་ནས་འདས་པ་དང་ཇི་ཙམ་ན་དྲང་སྲོང་དེ་རྒྱལ་པོའི་ཕོ་བྲང་གྲོང་ཁྱེར་ཨ་རིཥྛར་བྱ་བའམ། བྱེད་པ་ཐམས་ཅད་བྱས་ཏེ་ཡོངས་སུ་རྫོགས་པ་དང་བསྟི་གནས་སུ་སོང་ངོ་། །​ཇི་ཙམ་ན་དུས་གཞན་ཞིག་གི་ཚེ་དྲང་སྲོང་དེས་བྲམ་ཟེའི་ཁྱེའུ་གཅིག་རིག་བྱེད་འདོན་པ་ཡོངས་སུ་རྫོགས་པ་དང་། དེས་མཁན་པོའི་རྐང་པ་ལ་གཏུགས་ནས་སྨྲས་པ། མཁན་པོ་ལ་ནོར་ཇི་ལྟ་བུ་དབུལ་བར་བགྱི། མཁན་པོས་བཀའ་སྩོལ་ཅིག །​དྲང་སྲོང་གིས་སྨྲས་པ། དེ་བས་ན་བུ་རྒྱལ་པོ་དཔལ་གྱི་སྡེའི་བཙུན་མོའི་མཆོག་བཙུན་མོ་རྒྱལ་བའི་འོད་སློངས་ལ་ངའི་བསྙེན་བཀུར་བྱ་བ་དང་། མཁན་པོ་ལ་མཁན་པོའི་ནོར་དང་། བླ་མ་ལ་མཆོད་པར་བྱ་བའི་ཕྱིར་བྱིན་ཅིག །​དེ་སྐད་ཅེས་སྨྲས་པ་དང་། བྲམ་ཟེའི་ཁྱེའུ་དེ་གནད་དུ་བསྣུན་པའི་རི་དགས་བཞིན་དུ་སྡུག་བསྔལ་དྲག་པོས་གདུངས་ཏེ་མཆོག་ཏུ་ཡི་མུག་པ་དང་། བསམས་པ་གནས་འདི་ནི་འབྱུང་བར་དཀའ་བ་དང་རྙེད་པར་དཀའ་ན། ཇི་ལྟར་ཡང་བྲམ་ཟེ་ཉོན་མོངས་པ་དག་ལྟ་བུས་རྒྱལ་པོ་ལ་བཙུན་མོ་རྒྱལ་བའི་འོད་འདི་བྱིན་ཅིག །​ཅེས་ཇི་ལྟར་སྨྲ་བར་ནུས། འདི་ལྟར་བསླང་བར་བྱ་བ་མ་ཡིན་པའི་དངོས་པོ་འདི་ལ་ཀུན་



The English translation of this folio by 84000 Translating the words of the Buddha can be found at:
https://read.84000.co/translation/toh349.html?part=UT22084-076-003-311#UT22084-076-003-311