Degé Kangyur volume 76, F.49.b

ངོ་མཚར་དུ་གྱུར་ཅིང་རྨད་དུ་བྱུང་བ་སྐྱེས་ཏེ་ཆེད་དུ་རྗོད་པ་ཆེད་དུ་བརྗོད་དེ། ཨེ་མའོ་རྒྱལ་པོ་དཔལ་གྱི་སྡེའི་བསོད་ནམས་ཀྱི་སྟོབས། ཨེ་མའོ་ངོ་མཚར་ཆེའོ། །​དེ་ནས་ལྷའི་དབང་པོ་བརྒྱ་བྱིན་ལྷ་བརྒྱ་སྟོང་དུ་མ་དང་ཐབས་ཅིག་ཏུ་བྱང་ཆུབ་སེམས་དཔའ་ཡང་དག་པར་དགའ་བར་བྱས་ནས་རང་གི་གནས་སུ་སོང་ངོ་། །​རི་ལ་གནས་པའི་དྲང་སྲོང་དེ་ཡང་འཁོར་ལྔ་བརྒྱ་དང་བྱང་ཆུབ་སེམས་དཔའ་ལ་མངོན་པར་བསྟོད་དེ་བསྟི་གནས་ཉིད་དུ་སོང་ངོ་། །​དེ་ནས་བྱང་ཆུབ་སེམས་དཔས་སྐྱེ་བོའི་ཚོགས་ཆེན་པོས་མངོན་པར་བཏུད་ཅིང་ཡུན་རིང་དུ་ཆོས་ཀྱི་རྒྱལ་པོ་བྱེད་པར་གྱུར་ཏོ། །​འཛམ་བུའི་གླིང་གི་དམན་པ་དང་། ལོང་བ་དང་བཀྲེན་པ་དང་སྡུག་ཕོངས་པ་ཐམས་ཅད་ནོར་གྱིས་ཚིམ་པར་བྱས་ནས་དགེ་བ་བཅུའི་ལས་ཀྱི་ལམ་ལ་རབ་ཏུ་བཞག་སྟེ། འདོད་པ་ན་སྤྱོད་པའི་ལྷ་དྲུག་ཀུན་དགའ་བར་བྱས་ནས་དུས་གཞན་ཞིག་གི་ཚེ་སྲོག་ཆགས་བརྒྱ་སྟོང་དུ་མ་རྣམས་དང་དེ་ལྷན་ཅིག་ཏུ་དུས་བྱས་ཏེ་དགའ་ལྡན་གྱི་ལྷའི་རིས་སུ་སྐྱེས་སོ། །​བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེའི་ཚེ་དེའི་དུས་ན་རྒྱལ་པོ་དཔལ་གྱི་སྡེ་ཞེས་བྱ་བ་དེ་གཞན་ཞིག་ཡིན་པ་སྙམ་དུ་ཐ་ཚོམ་མམ་ཡིད་གཉིས་སུ་གྱུར་ན་ཁྱེད་རྣམས་ཀྱིས་དེ་ལྟར་མི་བལྟའོ། །​གཞན་དུ་ན་ང་ཉིད་དེའི་ཚེ་དེའི་དུས་ན་རྒྱལ་པོ་དཔལ་གྱི་སྡེ་ཞེས་བྱ་བར་གྱུར་ཏེ། དེའི་ཚེ་རང་གི་ལུས་ཡོངས་སུ་བཏང་ངོ་། །​དགེ་སློང་དག་དེའི་ཚེ་དེའི་དུས་ན་རྒྱལ་པོ་དཔལ་གྱི་སྡེའི་བཙུན་མོ་རྒྱལ་བའི་འོད་དུ་གྱུར་པ་གང་ཡིན་པ་དེ་ནི་གྲགས་འཛིན་མ་འདི་ཉིད་ཡིན་ཏེ། དེའི་ཚེ་དེའི་དུས་ན་བཙུན་མོ་རྒྱལ་བའི་འོད་ཅེས་བྱ་བར་གྱུར་ཏོ། །​དགེ་སློང་དག་བློན་པོའི་མཆོག་བློ་གྲོས་ཆེན་པོར་གྱུར་པ་གང་ཡིན་པ་དེ་ནི་དགེ་སློང་ཤཱ་རིའི་བུ་འདི་ཉིད་ཡིན་ཏེ། དེའི་ཚེ་དེའི་དུས་ན་བློན་པོ་བློ་གྲོས་ཆེན་པོར་གྱུར་ཏོ། །​དགེ་སློང་དག་ལྷའི་དབང་པོ་བརྒྱ་བྱིན་དུ་གྱུར་པ་གང་ཡིན་པ་དེ་ནི་རྒྱལ་པོ་གཟུགས་ཅན་སྙིང་པོ་འདི་ཉིད་ཡིན་ཏེ། དེའི་ཚེ་དེའི་དུས་ན་ལྷའི་དབང་པོ་བརྒྱ་བྱིན་དུ་གྱུར་ཏོ། །​དགེ་སློང་དག་སུམ་ཅུ་རྩ་གསུམ་གྱི་ལྷ་གང་ཡིན་པ་དེ་རྣམས་ནི་རྒྱལ་པོ་གཟུགས་ཅན་སྙིང་པོ་དང་ལྷན་ཅིག་ཏུ་བདེན་པ་མཐོང་བ་ལྷ་བརྒྱད་ཁྲི་པོ་འདི་ཉིད་ཡིན་ནོ། །​དགེ་སློང་དག་གྲོང་ཁྱེར་གྱི་སྐྱེ་བོའི་ཚོགས་གང་ཡིན་པ་དེ་ནི་རྒྱལ་པོ་གཟུགས་ཅན་སྙིང་པོ་གང་དག་དང་ཐབས་ཅིག་ཏུ་ངའི་ཐད་དུ་འོངས་པའི་མ་ག་དྷཱའི་བྲམ་ཟེ་དང་ཁྱིམ་བདག་འདི་དག་ཉིད་ཡིན་ནོ།



The English translation of this folio by 84000 - Translating the words of the Buddha can be found at:
https://read.84000.co/translation/toh349.html?part=UT22084-076-003-339#UT22084-076-003-339