།མི་མཆོག་ཐུགས་ནི་བརྩེར་དགོངས་ཏེ། །བསོད་སྙོམས་འདི་ནི་བཞེས་པར་མཛོད། །བདག་གི་གདུགས་ཚོད་འདི་དག་ནི། །གྲོལ་བར་མཛད་ནས་དེང་བཞེས་ལ། །སང་ནི་བདག་གི་ཕ་མ་ཡི། །སྡུམ་པར་འདྲེན་པས་བརྩེར་དགོངས་ཏེ། །དགེ་སློང་ཀུན་དང་ཐབས་ཅིག་ཏུ། །གདུགས་ཚོད་དག་ནི་གསོལ་བར་མཛོད། །བཅོམ་ལྡན་འདས་ཅང་མི་གསུང་བར་གྱུར་པས་ཁྱེའུ་ཤེས་ལྡན་གྱིས་གསོལ་པ་གནང་ངོ་། །དེ་ནས་ཁྱེའུ་ཤེས་ལྡན་བཅོམ་ལྡན་འདས་ཅང་མི་གསུང་བར་གནང་བར་རིག་ནས་ཕ་མ་ག་ལ་བ་དེར་སོང་སྟེ། ཕ་མ་ལ་འདི་སྐད་ཅེས་སྨྲས་སོ། །ཡབ་ཡུམ་བདག་གིས་ནི་བཅོམ་ལྡན་འདས་ལ་བསོད་སྙོམས་ཕུལ་ལགས་ཏེ། སང་ཡང་གདུགས་ཚོད་ལ་སྤྱན་དྲངས་སོ། །དེ་ནས་ཁྱེའུ་ཤེས་ལྡན་གྱི་ཕ་མ་མགུ་ཞིང་དགའ་ལ་ཡི་རངས་ཤིང་རབ་ཏུ་དགའ་སྟེ། དགའ་བ་དང་ཡིད་བདེ་བ་སྐྱེས་ནས་དེའི་མཚན་མོ་བཟའ་བ་དང་བཅའ་བ་རོ་དང་ལྡན་པ་ཞིམ་པ་མང་པོ་མངོན་པར་བཤམས་ནས་ཡངས་པའི་གྲོང་ཁྱེར་ཆེན་པོ་ཐམས་ཅད་ཕྱག་དར་བྱས་ཏེ། དར་གྱི་ལྡ་ལྡི་བཏགས། པོག་ཕོར་ནས་སྤོས་ཀྱིས་བདུགས། སྤོས་ཆུས་ཆག་ཆག་བཏབ། མེ་ཏོག་གིས་མཛེས་པར་བཀྲམ་སྟེ། དེའི་མཚན་མོ་འདས་ནས་དུས་ལ་བབ་པ་དང་། བཅོམ་ལྡན་འདས་ག་ལ་བ་དེར་སོང་སྟེ། བཙུན་པ་བཅོམ་ལྡན་འདས་གདུགས་ཚོད་ལ་བབ་སྟེ། གདུགས་ཚོད་སྦྱར་ལགས་སོ་ཞེས་གསོལ་ཏོ། །དེ་ནས་བཅོམ་ལྡན་འདས་དེའི་སྔ་དྲོ་སྨད་གཡོགས་དང་ཆོས་གོས་གསོལ། ལྷུང་བཟེད་བསྣམས་ནས། དགེ་སློང་གི་ཚོགས་ཀྱིས་མདུན་དུ་བདར་ཅིང་། དགེ་སློང་གི་ཚོགས་ཀྱིས་ཡོངས་སུ་བསྐོར་ཏེ། ཤེས་ལྡན་གྱི་ཕ་མའི་ཁྱིམ་ག་ལ་བ་དེར་གཤེགས་ནས་གདན་བཤམས་པ་དེ་ལ་བཞུགས་སོ། །དེ་ནས་ཁྱེའུ་ཤེས་ལྡན་བཅོམ་ལྡན་འདས་དགེ་སློང་གི་དགེ་འདུན་དང་གདན་ལ་བཞུགས་པར་རིག་ནས་རང་གི་ལག་གིས་བཟའ་བ་དང་། བཅའ་བ་རོ་དང་ལྡན་པ་ཞིམ་ཞིང་མང་བ་དག་ལེགས་པར་བྲིམས་ལེགས་པར་གསོལ་ཏོ། །བཅོམ་ལྡན་འདས་གདུགས་ཚོད་གསོལ་བར་རིག་ནས། སོ་སོ་སོ་སོ་ལ་རས་བཅོས་བུ་ཟུང་དང་། སོ་སོ་ལ་ལྷམ་ཟུང་དག་ཕུལ་ལོ། །བཅོམ་ལྡན་འདས་ལ་ཆོས་གོས་སར་པ་གསུམ་དང་། ཆགས་སར་པ་ཟུང་དག་གསོལ་ཏོ།