Degé Kangyur volume 72, F.272.a

འཁར་གསིལ་འཛིན་པའི་གང་ཟག་གང་ཡིན་པ་དེ་དག་སྲིད་པ་གསུམ་ལས་ངེས་པར་འབྱུང་ཞིང་ཡང་མངོན་པར་ཞེན་པ་ཉིད་དུ་མི་འགྱུར་བའི་ཕྱིར་ཕྱིར་མི་ལྡོག་པར་བྱེད་པ་ཞེས་བྱའོ། །​འཁར་གསིལ་ཞེས་བྱ་བ་ནི་ཁོང་དུ་ཆུད་པར་བྱེད་པ་ཡིན་ཏེ། གང་འཁར་གསིལ་འཛིན་པར་བྱེད་པ་ཡིན་ཞེ་ན། སྡུག་བསྔལ་དང་། སྟོང་པ་དང་། ཁམས་གསུམ་གྱི་ཉོན་མོངས་པའི་ཀུན་ནས་དཀྲིས་པར་ཁོང་དུ་ཆུད་པ་དང་། བདེན་པ་བཞི་དང་། རྟེན་ཅིང་འབྲེལ་པར་འབྱུང་བ་བཅུ་གཉིས་པོ་འདི་དག་གསལ་བར་རྟོགས་པར་འགྱུར་བའི་ཕྱིར་ཁོང་དུ་ཆུད་པར་བྱེད་པ་ཞེས་བྱའོ། །​འཁར་གསིལ་ཞེས་བྱ་བ་ནི་ང་རྒྱལ་མེད་པར་བྱེད་པ་ཡིན་ཏེ། གང་འཁར་གསིལ་འཛིན་པ་དེ་དག་ང་རྒྱལ་གྱི་ལས་རབ་ཏུ་སྤོང་བར་འགྱུར་བའི་ཕྱིར་ང་རྒྱལ་མེད་པར་བྱེད་པ་ཞེས་བྱའོ། །​འཁར་གསིལ་ཞེས་བྱ་བ་ནི་རྒྱང་བསྲིངས་པ་ཡིན་ཏེ། གང་འཁར་གསིལ་འདི་འཛིན་པའི་གང་ཟག་གང་ཡིན་པ་དེ་དག་འདོད་པ་ལྔ་ཐག་རིང་དུ་བྱེད་པས་དེ་དག་འདོད་པས་སྲེད་པའི་ཀུན་ནས་དཀྲིས་པ་སྤོང་བ་དང་། ཕུང་པོ་ལྔ་པོ་རྣམས་རྣམ་པར་འཐོར་བ་དང་། སྲིད་པ་ལྔ་པོ་དག་ཡོངས་སུ་སྤོང་བ་དང་། མྱ་ངན་ལས་འདས་པ་ལ་ཕྱོགས་ཤིང་འདུ་བྱེད་ཀྱི་ལས་ཀྱང་ཐག་རིང་དུ་སྤོང་བའི་ཕྱིར་རྒྱང་བསྲིངས་པ་ཞེས་བྱའོ། །​འཁར་གསིལ་ཞེས་བྱ་བ་ནི་ལེན་པར་བྱེད་པ་ཡིན་ཏེ། གང་འཁར་གསིལ་འཛིན་པར་བྱེད་པ་དེ་དག་སངས་རྒྱས་རྣམས་ཀྱི་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་རིན་པོ་ཆེ་བླངས་པས་རྣམ་པར་གྲོལ་བ་ཐོབ་པར་འགྱུར་བའི་ཕྱིར་ལེན་པར་བྱེད་པ་ཞེས་བྱའོ། །​འཁར་གསིལ་ཞེས་བྱ་བ་ནི་ཡོངས་སུ་གྲུབ་པར་འགྱུར་བ་ཡིན་ཏེ། གང་འཁར་གསིལ་འཛིན་པ་དག་སངས་རྒྱས་ཀྱི་ཆོས་ཀྱི་སྡེ་སྣོད་མངོན་པར་གྲུབ་པ་དང་། ཇི་ལྟར་བསྟེན་པ་བཞིན་དུ་བསྒྲུབས་པས་མ་ཉམས་པར་ཕུན་སུམ་ཚོགས་པར་འགྱུར་བའི་ཕྱིར་མངོན་པར་འགྲུབ་པར་འགྱུར་བ་ཞེས་བྱའོ། །​བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་འཁར་གསིལ་ཞེས་བྱ་བའི་ཡི་གེའི་དོན་རྒྱ་ཆེ་ཞིང་མང་བས་ཡོངས་སུ་རྫོགས་པར་རྗོད་མི་ནུས་ཀྱང་ཁྱེད་ཀྱིས་རེ་ཞིག་དེ་བཞིན་དུ་ཡོངས་སུ་གཟུང་བར་བྱའོ།



The English translation of this folio by 84000 - Translating the words of the Buddha can be found at:
https://read.84000.co/translation/toh335.html?part=UT22084-072-035-180#UT22084-072-035-180