།ཐམས་ཅད་བཏང་གི་འདིར་ནི་ཆོས་སྲུང་ངོ་། །ཆོས་སྤྱོད་པ་ལ་འཇིགས་སྐྲག་མེད་པ་ཉིད། །ཆོས་སྤྱོད་པ་དག་ངན་འགྲོར་མི་འགྲོ་སྟེ། །ཆོས་སྤྱོད་པ་ནི་འདོད་པའི་འགྲོ་བར་འགྲོ། །ཆོས་མི་སྤྱོད་པ་ཤི་ནས་གདུང་བར་འགྱུར། །མཁས་པ་ནོར་རྙེད་དགའ་བར་མི་འགྱུར་ལ། །ནོར་ཟད་ན་ཡང་བློ་གྲོས་མི་འཁྱིམ་པར། །འཇིག་རྟེན་དག་ན་ཅི་དགར་ལེགས་རྒྱུ་བ། །སེམས་ཅན་ནང་ན་མི་ཡི་སྙིང་པོར་ཆུད། །གང་ཞིག་དགའ་བས་གཞན་ལ་ནོར་སྦྱིན་ཞིང་། །ང་རྒྱལ་འཚེ་བ་རྣམ་སྤངས་བདེན་ལ་གནས། །རྒྱ་མཚོ་འདྲ་བའི་སེམས་ལྡན་དེ་དག་ནི། །དཔའ་བོ་རྟུལ་ཕོད་ཡ་རབས་ཐབས་ལྡན་ཡིན། །གང་ཞིག་དེ་དང་དེ་ལ་ལེགས་བསླབས་པས། །དོན་རྣམས་ཀུན་ལ་མཁས་པར་གྱུར་པ་དང་། །དེས་ལ་འགྲོགས་ན་བདེ་བ་དེ་དག་ནི། །དམ་པས་ལེགས་པ་ཡིན་ཞེས་བསྔགས་པ་མཛད། །ཉེ་རྔས་སྨྲས་པ། རྔ་ཁྱོད་ལ་ནི་ཕྱི་ཕྱིར་ཞིང་། །འདི་བདག་ནི་རབ་ཏུ་དད། །བདག་གི་ལུས་འདི་བསྐམས་པའམ། །ཡང་ན་སེམས་ནི་མེད་ཀྱང་སླ། །སྡུག་བསྔལ་ཤིན་ཏུ་མི་བཟད་པར། །ལྷུང་ཡང་ཕྱིན་ཆད་སྡིག་མི་བགྱིད། །ཚུལ་ཁྲིམས་ཉམས་པ་གསོན་པ་བས། །ཚུལ་ཁྲིམས་ལྡན་པ་ཤི་ཡང་སླ། །སྐྱེ་བ་གཅིག་ཏུ་འདི་ཡི་ཕྱིར། །ཇི་ལྟ་བུར་ནི་མི་ཟད་སྦྱང་། །བཅོམ་ལྡན་འདས་ཀྱིས་བཀའ་སྩལ་པ། །སྔོན་ཚེ་གང་དུ་རབ་གནས་ཤིང་། །དེ་དང་དེར་ནི་སྐྱེས་པ་ན། །མི་དགེའི་གྲོགས་དང་འགྲོགས་པ་ཡིས། །ང་ཡི་མི་དགེ་ལས་རྣམས་བྱས། །དགེ་བའི་བཤེས་དང་ཕྲད་པ་ན། །མི་དགེའི་ལས་རྣམས་སྤངས་པ་ཡིས། །བདག་གིས་མི་དགེའི་ལས་རྣམས་བསལ། །བཅོམ་ལྡན་དེ་བཞིན་གཤེགས་པ་ཡིས། །སྔོན་གྱི་གནས་རྣམས་མངོན་མཁྱེན་ནས། །དེ་ཕྱིར་དགེ་སློང་རྣམས་ལ་ནི། །ཐུབ་པས་ལུང་ཡང་བསྟན་པར་མཛད། །སྔོན་ཚེ་ང་ནི་རྔར་གྱུར་ཏེ། །ཀུན་དགའ་བོ་ནི་ཉེ་རྔ་ཡིན། །ལྷ་སྦྱིན་རྔ་སྒྲར་གྱུར་ཏོ་ཞེས། །སྐྱེས་རབས་དེ་ལྟར་གཟུང་བར་གྱིས། །ཆོས་རྣམས་སྡུད་པར་བྱེད་པ་ཡི། །དོན་རྒྱས་མདོ་སྡེ་འདི་ཐོས་ནས། །དགེ་སློང་ཐམས་ཅད་གུས་བཅས་པར། །ཆོས་ལ་སྤྱད་པ་ཉིད་དུ་གྱིས། །ཀླུའི་རྒྱལ་པོ་རྔ་སྒྲའི་ཚིགས་སུ་བཅད་པ་རྫོགས་སོ།། །།